AŞPA ERMƏNİSTANA YENƏ VAXT VERMİŞDİR
AZƏRTAC-ın xüsusi müxbiri xəbər verir ki, Avropa Şurası Parlament Assambleyasının iyunun 25-də keçirilmiş yığıncağında “Avropada demokratiyanın vəziyyəti”, “Miqrantların demokratik iştirakının yaxşılaşdırılması” məsələləri ilə yanaşı qurumun Ermənistanla bağlı 1609 saylı qətnaməsinin yerinə yetirilməsi vəziyyəti də növbədənkənar müzakirə edilmişdir.
Böyük Britaniyalı deputat Con Preskott Ermənistanda baş vermiş mart hadisələri ilə bağlı AŞPA-nın yaz sessiyasında qəbul edilmiş qətnaməsinin yerinə yetirilməsinin vəziyyətini yoxlamaq məqsədilə iyunun 16-17-də Yerevana səfərinin nəticələri barədə məlumat vermişdir. Con Preskott bildirmişdir ki, Ermənistan rəhbərliyi qətnamədən irəli gələn vəzifələrin cüzi hissəsini yerinə yetirmiş, prezident mart hadisələrinin əsas müqəssirlərini üzə çıxarmaq üçün xüsusi işçi qrupu ayırmışıdr. Bütün bunlara baxmayaraq, ölkədə demokratik meyarları inkişaf etdirmək üçün hələ çox iş görülməlidir.
Məruzə ətrafında müzakirələr zamanı ermənipərəst deputatlar qısa vaxt ərzində demokratiyanın bərqərar olması sahəsində Ermənistanda nəzərəçarpacaq işlər görüldüyünü bildirmiş, bu ölkəni az qala dümokratik bir dövlət kimi qələmə verməyə cəhd etmişlər. Ermənistan nümayəndə heyəti ölkədəki ağır vəziyyəti pərdələmək məqsədilə xüsusi canfəşanlıq göstərərək 1609 saylı qətnamənin tam yerinə yetirilməməsinin səbəbini vaxtın qısalığı ilə əlaqələndirmiş, bunun üçün Ermənistana əlavə vaxt verilməsini xahiş etmişdir.
Ermənistan nümayəndə heyətinin üzvü Raffi Hovanesyan həmvətənlərindən fərqli olaraq ölkə həbsxanalarında çoxlu məhbusun olduğunu, ölkənin demokratiya testindən tam keçə bilmədiyini qeyd etmiş və olkədə siyasi vəziyyət düzəlmədiyi təqdirdə öz deputat mandatından imtina edəcəyini vurğulamışdır.
Amma həqiqətin gözünə açıq baxan avropalı deputatlar həbs olunmuş şəxslərin sayı barədə Ermənistan rəsmilərinin göstərdiyi rəqəmlərə şübhə ilə yanaşdıqlarını, işsizliyin, yoxsulluğun, yaşayış səviyyəsinin son həddə olduğu ölkədə saysız-hesabsız problemlərin öz həllini gözlədiyini, 1609 saylı qətnamənin əsas şərtlərinin yerinə yetirilmədiyini, ölkədə siyasi vəziyyətin ağır olduğunu göstərmişlər.
Azərbaycanlı deputat Rafael Hüseynov bildirmişdir ki, Ermənistan Avropa Şurasının 47 üzvü arasında ən “unukal” dövlətdir. Bu arzuolunmaz unikallıq Ermənistan dövlətinin də, erməni xalqının da faciəsidir. Bu unikallıq ondan ibarətdir ki, Ermənistan qurumun dövlət suverenliyi sırf rəmzi və şərti xarakter daşıyan yeganə üzvüdür. Faktiki olaraq bu ölkə, özünün elan etdiyi kimi, forpost funksiyası daşıyır, müstəqil siyasət apara bilmir, xaricdən idarə olunur. AŞPA-nın Ermənistanla bağlı qəbul etdiyi 1609 saylı qətnamənin əsas tələblərindən biri budur ki, bu ölkənin hakimiyyəti müxalifətlə, demək, öz xalqı ilə konstruktiv dialoqa girsin. Təəssüf ki, bu alınmır və ölkədə vəziyyət getdikcə ağırlaşır, xalqla hakimiyyət arasında ziddiyyət artır.
R. Hüseynov daha sonra vaxtilə öz xalqına və qonşularına qarşı Avropa Şurası prinsipləri ilə bir araya sığmayan siyasət aparan, kriminal rejim tərəfindən idarə olunan bu ölkənin belə bir mötəbər təşkilatın tərkibində qalmağa layiq olmadığı və onun AŞ-dan kənarlaşdırılması ilə bağlı məsələ qaldırdığını, müvafiq sənəd hazırladığını xatırlatmışdır. Deputat qeyd etmişdir ki, Ermənistanın regionda və Avropada getdikcə demokratiya əleyhinə daha artıq təhlükə mənbəyinə çevrilməsi ilə əlaqədar belə bir addımın atılmasını məqsədəuyğun hesab etməmişdir. Çünki bu, Ermənistan iqtidarına daha nəzarətsiz, daha kriminal fəaliyyət göstərmək və cinayərlərini daha sərbəst törətmək üçün əlverişli imkan yarada bilər.
Azərbaycanlı deputat bildirmişdir ki, öz xalqına qarşı silah qaldıran, onları gülləbaran edən, kütləvi halda siyasi məhbuslara çevirərək həbsxanalara dolduran, dinc vətəndaşlarının qanını tökən, total qorxu mühiti yaradan, ölkəni iqtisadi uçruma aparan rejimin başqalarına qarşı hansı qəddarlıqları törədə biləcəyini təsəvvür etmək çətin deyil.
Ermənistanın insan hüquqlarına necə riayət etməsi ilə əlaqədar ayrıca bir alt komitənin yaradılmasını məqsədəuyğun hesab edən R. Hüseynov Avropanın gələcək təhlükəsizliyi naminə qəti addımlar atılmasının vacibliyini vurğulamışdır.
Azərbaycan nümayəndə heyətinin rəhbəri Səməd Seyidov bugünkü müzakirənin mühüm olduğunu qeyd etmiş, yığıncaqda yalnız Ermənistanda mövcud olan problemlərdən deyil, həm də Avropa Şurasındakı problemlərdən danışmağın vacibliyini diqqətə çatdırmışdır. Deputat demişdir ki, iyunun 24-də avropalı deputatların Azərbaycanda müsbət irəliləyişlərin, Venesiya Komissiyası ilə birgə əməkdaşlığı sayəsində qəbul edilən seçki qanunvericiliyinin yaxşı hal olmasını vurğulamalarına baxmayaraq, Azərbaycanla bağlı məsələnin müzakirəsi ilə əlaqədar çap olunmuş məlumatda ölkəmiz barədə əsassız ifadələr işlənmişdir və bu, təəssüf doğurduğunu vurğulamışdır. Ermənistanda insan hüquqlarının açıq şəkildə pozulmasına toxunmuş millət vəkili bəzi deputatların orada mart hadisələri zamanı həbs edilənlər arasında siyasi məhbusların olduğunu bildirdikləri halda, ölkədə irəliləyişlər olması fikrini səsləndirməsinə etiraz etmiş, bunun ikili standartların, ikili yanaşmanın nümunəsi olduğunu bildirmişdir.
Yığıncağın sonunda müzakirə olunan məsələ barədə hər hansı qətnamə qəbul edilməsə də, deputatlar 1609 saylı qətnamədən irəli gələn müddəaların yerinə yetirilməsi üçün Ermənistana 2009-cu ilin yanvar ayına qədər vaxt verilməsi təklifini dəstəkləmişlər.
Bölmənin digər xəbərləri
