Fransızların 23 faizi maliyyə səbəblərinə görə tibbi müayinədən imtina edib
Paris, 11 iyun, AZƏRTAC
Fransada səhiyyə xidmətlərinə çıxış getdikcə daha çox maliyyə imkanlarından asılı vəziyyətə düşür. “Que Choisir Ensemble” təşkilatının keçirdiyi sorğuya əsasən, 2025-ci ildə fransızların 23 faizi maddi çətinliklər səbəbindən tibbi müayinədən və ya müalicədən imtina edib. Bu göstərici 2023-cü illə müqayisədə 5 faiz artıb.
AZƏRTAC xəbər verir ki, sorğu oftalmoloq, diş həkimi və ailə həkimi kimi vacib tibbi xidmətlərdən istifadə etməyin bir çox ailələr üçün çətinləşdiyini göstərib.
Aylıq 1200 avro gəlirlə yaşayan xərçəng xəstəsi bir neçə il əvvəl xərçəng xəstəliyi keçirsə də, növbəti tibbi müayinələrini maliyyə səbəbindən daim təxirə saldığını bildirib. Onun sözlərinə görə, məhdud büdcə şəraitində övladlarının sağlamlığına üstünlük verməyə məcburdur.
Başqa bir valideyn isə oğlunun diş müalicəsini artıq bir ildən çoxdur təxirə saldığını, əvvəlcə qızının müalicə xərclərini ödəməli olduğunu deyib.
Mütəxəssislər xəbərdarlıq edirlər ki, tibbi xidmətlərdən imtina sağlamlıq vəziyyətinin pisləşməsinə və sonradan daha ağır, daha bahalı müalicələrə səbəb ola bilər. Fransa Xəstəxanalar Federasiyasının baş nümayəndəsi Zynab Riet bildirib ki, həkimə müraciətin gecikdirilməsi xəstəliklərin ağırlaşması riskini artırır və nəticədə həm pasiyentlər, həm də səhiyyə sistemi üçün əlavə yük yaradır.
Sorğunun nəticələri Fransada artan həyat xərclərinin səhiyyəyə çıxış üzərində yaratdığı təzyiqi bir daha ortaya qoyur.
Bölmənin digər xəbərləri
