AŞPA-nın komitə iclasında bir sıra mühüm məsələlər müzakirə ediləcək
Bakı, 17 mart, AZƏRTAC
Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü Rafael Hüseynov qurumun hüquqi işlər və insan haqları komitəsinin iclasında iştirak etmək üçün Parisə səfər edib.
AŞPA komitəsinin yaz sessiyası ərəfəsindəki son yığıncağında “İnsan haqlarına hörmət və terrorizm təhlükəsi”, “Məhkəmə sistemində korrupsiya: Assambleyanın irəli sürdüyü təkliflərin təcili olaraq yerinə yetirilməsi zərurəti”, “İnterpol sistemindən qeyri-qanuni istifadələr: daha ciddi hüquqi təminatlara olan ehtiyac” və başqa mühüm məsələlər ətrafında fikir mübadilələri aparılacaq.
Komitə iclasında müzakirə ediləcək məruzələrin bir qismi yaz sessiyasının gündəliyinə daxil ediləcək. İclas çərçivəsində terrorizmlə mübarizə məsələləri ilə əlaqədar dəvətli qonaqlar və ekspertlərin iştirakı ilə dinləmələr də təşkil ediləcək. Rafael Hüseynov komitə iclasının gündəliyindəki mövzularla bağlı diskussiyalara qatılacaq, məsələlərə Azərbaycan tərəfinin mövqeyini ifadə edəcək.
Səfər martın 20-də başa çatacaq.
Bölmənin digər xəbərləri
