Astanada Qazaxıstan Xalqları Assambleyasının 34-cü sessiyası keçirilir
Astana, 24 aprel, AZƏRTAC
Astanada “Otuz il birlik və harmoniya naminə” devizi altında Qazaxıstan Xalqları Assambleyasının 34-cü sessiyası keçirilir.
AZƏRTAC “Kazinform”a istinadla xəbər verir ki, Qazaxıstan Prezidenti Kasım-Jomart Tokayevin sədrliyi ilə keçirilən forumda ölkənin bütün regionlarından olan parlament üzvləri, Qazaxıstan Xalqları Assambleyasının üzvləri, etnik-mədəni birliklərin rəhbərləri, dövlət qurumlarının, dini və ictimai təşkilatların nümayəndələri, eləcə də mədəniyyət xadimləri də daxil olmaqla 1600-dən çox insan iştirak edir.
1995-ci il martın 1-də yaradılmış Qazaxıstan Xalqları Assambleyasının bu il 30 illiyi qeyd olunur. Sabitlik və sülh müjdəçisinə çevrilmiş qurumun yubileyi çərçivəsində 150-dən çox böyük tədbirin keçirilməsi nəzərdə tutulur.
Qazaxıstanda 124 etnik qrup yaşayır. Milli Statistika Bürosunun 2025-ci il aprelin 1-nə olan məlumatına görə, əhalinin sayı 20 milyon 316 min 155 nəfərə çatıb.
Etnik tərkibinə görə ən çox doqquz millət bunlar hesab olunur: qazaxlar – 14 220 289 nəfər, ruslar – 2 983 344, özbəklər – 660 585, ukraynalılar – 375 925, uyğurlar - 301.592, tatarlar -219 212, almanlar -224 353, azərbaycanlılar - 152 852 və koreyalılar - 120 270 nəfər.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
