ASTARADA RESPUBLİKA ŞAHMAT TURNİRİ BAŞA ÇATMIŞDIR
Astara, 16 dekabr (AZƏRTAC). Astara şəhərindəki şahmat məktəbində 31 dekabr - Dünya azərbaycanlılarının həmrəyliyi gününə həsr olunmuş Respublika şahmat turniri başa çatmışdır.
“Təhsil” İdman Mərkəzinin təşkilatçılığı ilə keçirilən yarışda 17 şəhər və rayondan gəlmiş 78 gənc idmançı qalib adı uğrunda mübarizə aparmışdır.
İsveçrə sistemi ilə keçirilən və 10 gün davam edən turnirdə 8-16 yaşlı oğlanlar və qızlar yarışmışlar.
Qızların yarışında Astara məktəblisi Sevin Fətəliyeva birinci, şirvanlı idmançı Xavər Kazımlı ikinci, Cəbrayıl rayonunun gənc şahmatçısı Nərgiz Nəcəfova üçüncü yerləri tutmuşlar.
Oğlanların yarışında 8 yaşlılar arasında Lənkəran rayonunun təmsilçisi Murad Rzayev, 10 yaşlılar arasında Şamaxı məktəblisi Niyaz Məmmədov, 12 yaşlılar arasında kürdəmirli Mustafa Hacıyev, 14 yaşlılar arasında İmişli məktəblisi Elnur Mehdiyev və 16 yaşlılar arasında Bakı şahmatçısı Ziya Zamanov daha çox bal toplayaraq birinci yerə layiq görülmüşlər.
Qaliblərə “Təhsil” İdman Mərkəzinin və Astara rayon təhsil şöbəsinin fəxri fərmanları, turnirin diplomları və qiymətli hədiyyələr təqdim edilmişdir.
Bölmənin digər xəbərləri
