Astaralı gənc müəllim: Qarşıma qoyduğum məqsədə valideynlərimin köməyi ilə çatmışam
Astara, 2 yanvar, Bağır Əliyev, AZƏRTAC
İyirmi dörd yaşlı gənc müəllim Rufanə Cəfərli Astara şəhərində ziyalı ailəsində anadan olub. Anası müəllim, atası isə ali təhsilli zootexnikdir. Ailədə təhsilə, kitaba olan maraq balaca Rufanəni də öz ağuşuna alır. O da valideynləri kimi ali təhsil almağı qarşısına məqsəd qoyur. Elə bu həvəslə də orta məktəbi bitirdikdən sonra Lənkəran Dövlət Universitetinin kimya və biologiya müəllimliyi fakültəsinə daxil olur və 2015-ci ildə oranı bitirir.
AZƏRTAC-ın bölgə müxbiri xəbər verir ki, Rufanə Cəfərli ali təhsil müəssisəsini bitirdikdən sonra Təhsil Nazirliyinin təşkil etdiyi imtahanlarda yüksək bal toplayaraq müəllimlik fəaliyyətinə Astaranın ucqar dağ kəndi olan Sımda başlayıb.
O, sinifdə ilk dərsini xatırlayaraq deyir: “İçimdə həmişə macəra axtarmaq, yenilik hissi var. Təbiəti çox sevirəm. Kənd həyatını yaşamaq mənim üçün maraqlı idi. Xəyallarımı gerçəkləşdirmək üçün həmin imtahan bir şans oldu. Siyahıya ucqar kəndləri yazmışdım. Nədənsə dağlar məni özünə çox çəkirdi. İlk dərsimdə çox həyəcan keçirirdim. Ancaq uşaqlarla tez bir zamanda ünsiyyət yarada bildim”.
Rufanə Cəfərli elə həmin il paralel olaraq qonşu dağ kəndi olan Ağ körpünün tam orta məktəbində də dərs deyir.
Gənc müəllim demək olar ki, hər il müəllimlərin işə qəbulu imtahanlarında iştirak edir. O, bunun səbəbini belə izah edərək deyir: “Mənim ixtisasım kimya və biologiya müəllimliyidir. İmtahanlar mənim üçün əsil sınaq meydanıdır. Mən bu imtahanlarda iştirak etməklə, həm də böyük təcrübə toplayır, dərs dediyim fənni daha mükəmməl öyrənirəm”.
Rufanə 2016-cı ildə biologiya fənni üzrə biliyini sınamaq məqsədilə yenidən müəllimlərin işə qəbulu imtahanında iştirak edir və rayondakı Sərək kənd tam orta məktəbində dərs demək hüququ qazanır.
O, bir il burada işlədikdən sonra müəllimlərin yerdəyişmə müsabiqəsindən keçərək Astara şəhərindəki 6 nömrəli tam orta məktəbində, 2018-ci ildə isə yenidən müəllimlərin işə qəbulu imtahanında yüksək bal toplayaraq Astara şəhərindəki 3 nömrəli tam orta məktəbində dərs demək hüququ qazanır.
Rayonda keçirilən tədbirlərdə fəal iştirak edən gənc müəllimin Təhsil Nazirliyinin həyata keçirdiyi “Lənkəran Dövlət Universiteti, Astara və Yardımlı rayonlarının ümumtəhsil məktəbləri arasında elmi-pedaqoji əməkdaşlığın yaradılmasına dair pilot layihə”nin icrasının bir illiyi ilə əlaqədar keçirilən müşavirədəki çıxışı böyük maraqla qarşılanır. O, elə həmin tədbirdə Astara Pedaqoji Kollecin rəhbərliyi tərəfindən bu təhsil müəssisəsində işləmək təklifi alır.
Hazırda gənc müəllim Astara şəhərindəki 3 nömrəli tam orta məktəbi ilə paralel olaraq, Astara Pedaqoji Kollecində də fəaliyyətini davam etdirir.
Qazandığı uğurlarda valideynlərinin böyük əməyi olduğunu vurğulayan gənc müəllim deyir: “Valideynlərim bütün işlərdə mənə dəstək olublar. Onların köməyi ilə qarşıma qoyduğum məqsədə çatmışam. Özümü valideynlərimin qarşısında həmişə borclu hiss edirəm”.
Daim yeniliyə can atan gənc müəllimi qarşıda hələ neçə-neçə sınaqlar gözləyir. Biz inanırıq ki, Rufanə Cəfərli bu sınaqlardan da uğurla çıxacaq.
Bölmənin digər xəbərləri
