ATLETİKANIN İNKİŞAFINA DAİR YENİ STRATEJİ PLAN HAZIRDIR
Bakı, 18 fevral (AZƏRTAC). Azərbaycanda atletikanın inkişafı yeni mərhələyə qədəm qoyur. Bu gün Milli Olimpiya Komitəsində atletikanın inkişafına dair strateji planın təqdimat mərasimi keçirilmişdir.
Böyük Britaniyanın İdman Şurası (UK Sport) ilə birgə həyata keçiriləcək plan 2009-2012-ci illəri əhatə edir. Əsas məqsəd cinsindən, sosial statusundan asılı olmayaraq, bütün yaş qruplarında gənclərin atletika növündə iştirakını təmin etməklə milli və olimpiya komandalarına istedadlı idmançıları cəlb etməkdir.
Təqdimat mərasimində çıxış edən gənclər və idman naziri Azad Rəhimov Azərbaycanda atletika məktəbinin böyük ənənələrinin olduğunu vurğulayaraq, onların bərpasının vacibliyini vurğulamışdır.
Strateji plan yaxın gələcəkdə məhəlli atletikanın inkişafını, ixtisaslaşdırılmış idman məktəbləri vasitəsilə ölkədə atletika mərkəzlərinin yaradılmasını, peşəkar mütəxəssislərin, məşqçilərin hazırlanaraq tədris prosesinə cəlb olunmasını ehtiva edir.
Plana əsasən, dörd il ərzində Mingəçevirdə, Xaçmazda, Qax-Zaqatala bölgəsində və Gəncədə atletika mərkəzlərinin yaradılması nəzərdə tutulmuşdur.
######
Bölmənin digər xəbərləri
