Məsim Məmmədov: Bu il ölkəmizdə şəhərsalma və memarlıq sahəsində mühüm hadisələrlə yadda qalır
Bakı, 14 oktyabr, AZƏRTAC
Laçın rayonunda bərpa və yenidənqurma işləri çərçivəsində şəhər və kəndlərin müasir şəhərsalma prinsipləri əsasında inkişaf etdirilməsi istiqamətində mühüm tədbirlər həyata keçirilir.
AZƏRTAC xəbər verir ki, bu sözləri Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov Xəzər İnşaat Həftəsinin açılış mərasimində söyləyib.
O bildirib ki, 2026-cı il ölkəmizdə şəhərsalma və memarlıq sahəsində mühüm hadisələrlə yadda qalır: “Qarabağ və Şərqi Zəngəzurda həyata keçirilən bərpa və yenidənqurma prosesinin nəticələrinin təqdim olunması, əldə edilmiş təcrübələrin paylaşılması və yeni tərəfdaşlıqların qurulması artıq ənənəvi xarakter alıb. İşğaldan azad olunmuş ərazilərdə bərpa və quruculuq prosesi uğurla davam etdirilir. Hazırda həmin ərazilərdə həyat yenidən canlanır, şəhər və kəndlər müasir standartlar əsasında formalaşdırılır. Qarabağ və Şərqi Zəngəzurda şəhər və rayonların inkişafında əsas məqsəd yalnız yaşayış obyektlərinin yenidən qurulması deyil, insanların doğma torpaqlarında təhlükəsiz, rahat və firavan yaşamalarının təmin edilməsidir”.
M.Məmmədov Laçında görülən işlərə də toxunaraq bildirib ki, bərpa və yenidənqurma prosesinin mühüm istiqamətlərindən biri Laçının inkişaf etdirilməsidir: “Hazırda rayonda 980 ailə, 4 minə yaxın sakin doğma torpaqlarına qayıdıb. Laçında yaşayış obyektləri ilə yanaşı, əsas xidmət sahələrinin və sosial infrastrukturun yaradılması, yeni iş yerlərinin açılması və rayonun iqtisadi potensialının inkişaf etdirilməsi istiqamətində də işlər görülür. Müasir şəhərsalma yanaşmaları əsasında həyata keçirilən layihələr Dövlət Proqramlarının əsas məqsədlərinə uyğun olaraq insanların yaşayış şəraitinin yaxşılaşdırılmasına və sosial rifahının yüksəldilməsinə xidmət edir”.
Bölmənin digər xəbərləri
