Auditorlar Palatası Türkiyədə zəlzələdən zərərçəkənlərə maddi yardım göstərib
Bakı, 17 fevral, AZƏRTAC
Auditorlar Palatası Türkiyədə zəlzələnin fəsadlarının aradan qaldırılması üçün yaradılmış müvafiq hesaba maddi yardım köçürüb.
Bu barədə AZƏRTAC-a Palatadan verilən məlumatda bildirilib.
Qeyd olunub ki, fevralın 6-da Türkiyədə baş vermiş çoxsaylı insan itkisi, yaralanması və infrastrukturun dağılması ilə nəticələnən zəlzələ xəbəri hamımızı dərindən kədərləndirib: “Təbii fəlakətin nəticələrinin tezliklə aradan qaldırılmasını Ulu Tanrıdan diləyir, hər zaman sevincimizin və kədərimizin bir olduğu dost və qardaş Türkiyənin yanında olduğumuzu bildiririk.
Acı faciənin fəsadlarının aradan qaldırılması üçün Azərbaycan Respublikasının Prezidenti İlham Əliyevin və Birinci vitse-prezident Mehriban xanım Əliyevanın göstərişləri ilə təxirəsalınmaz tədbirlər həyata keçirilməkdə və qardaş Türkiyə xalqına humanitar yardım göstərilməkdədir. Eyni zamanda, Azərbaycan xalqının nümayəndələri könüllü olaraq yardım təşəbbüsləri irəli sürür, maddi və mənəvi dəstək göstərirlər.
Bütün Azərbaycan xalqı kimi, Auditorlar Palatasının əməkdaşları və üzvləri də bu çətin günlərdə Türkiyə xalqının yanında olduqlarını nümayiş etdirir, öz imkanları daxilində köməyini əsirgəmirlər”.
Bölmənin digər xəbərləri
