Prezidentin İcra Aparatının iqtisadi siyasət şöbəsinin müdiri Mail Rəhimov Prezident İlham Əliyevin Azərbaycan Respublikası Auditorlar Palatasının fəaliyyətə başlamasının 10 illiyi münasibətilə qurumun kollektivi və üzvlərinə ünvanladığı təbrik məktubunu oxumuşdur.

Palatanın sədri Vahid Novruzov onların əməyinə verdiyi yüksək qiymətə görə dövlətimizin başçısına minnətdarlığını bildirmiş, başçılıq etdiyi qurumun 10 il ərzində keçdiyi yoldan danışmışdır. Bildirmişdir ki, Palatanın yaradılmasından əsas məqsəd auditor xidmətinin dövlət tənzimlənməsinin təşkilini həyata keçirmək, Azərbaycan Respublikasında bu sahənin inkişafına və təkmilləşdirilməsinə yönəlmiş normativ aktların layihələrini, tədbirlər sistemini işləyib hazırlamaq, mülkiyyətçilərin əmlak hüquqlarını, dövlətin, təsərrüfat subyektlərinin və auditorların (auditor təşkilatlarının) mənafelərini gözləmək, habelə sərbəst auditorların və auditor təşkilatlarının öz fəaliyyətlərində qanunvericiliyin tələblərinə riayət olunmasına nəzarət etməkdir. Ötən dövr ərzində Auditorlar Palatası Azərbaycan Respublikasının ərazisində auditor fəaliyyəti ilə məşğul olmaq üçün 254 fiziki və 70 hüquqi şəxsə, o cümlədən 10 xarici hüquqi şəxsə lisenziya vermiş, ölkənin bütün ərazisini auditor xidməti ilə əhatə etməyə müvəffəq olmuşdur. Hazırda Bakı, Naxçıvan, Sumqayıt, Gəncə, Lənkəran, Mingəçevir, Şəmkir və Ağdaş şəhərlərində 46 auditor təşkilatı, Cəlilabad, Zaqatala, Ağcabədi, Beyləqan, Biləsuvar, Xanlar, Şərur rayonlarında isə 52 sərbəst auditor fəaliyyət göstərir.

Diqqətə çatdırılmışdır ki, Palatanın məqsədyönlü səyləri nəticəsində auditor xidməti göstərilməsinə dair yerinə yetirlmiş müqavilələrin sayı 20 dəfə, xidmətin həcmi isə 10 dəfə artmışdır. Sahənin normativ hüquqi bazasının yaradılması daim diqqətdə saxlanılmış, 1996-2006-cı illərdə 35 əsas və 3 köməkçi audit standartı, 50-dək təlimat, qayda və metodik göstəriş, sahəvi auditlərin aparılmasına dair 9 proqram, eləcə də “Auditorların Peşə Etikası Məcəlləsi” işlənib hazırlanmışdır.

Auditorlar Palatası müvafiq peşəkar kadrların hazırlanması sahəsində ardıcıl iş aparmış, 20-dək dərs vəsaiti, sənədlər toplusu, tədris proqramları və tematik məcmuələr nəşr etdirmişdir. Azərbaycan auditorları beynəlxalq və regional audit və mühasibatlıq qurumlarının təşkil etdiyi peşə təcrübəsinin öyrənilməsinə, təcrübə mübadiləsinə xidmət edən tədbirlərdə müntəzəm iştirak edirlər.

Qurumun təsisçiliyi ilə 2000-ci ilin iyulundan çıxan “İqtisadiyyat və audit” aylıq elmi-praktik jurnalı Azərbaycan Respublikası Prezidenti yanında Ali Attestasiya Komissiyasının elmi nəşrlər reyestrinə daxil edilmişdir.

Azərbaycan Respublikası Auditorlar Palatası beynəlxalq, regional və müxtəlif ölkələrin audit təşkilatları mühasibatlıq qurumları ilə sıx əlaqə saxlayır, mütərəqqi dünya təcrübəsinin öyrənilməsi və tətbiqi sahəsində ardıcıl iş aparır. Hazırda Palata Mühasiblərin və Auditorların “Avrasiya” Beynəlxalq Regional Federasiyasının həmtəsisçisi və Şura üzvü, Avropa Mühasiblər və Auditorlar Federasiyasının (EFAA) həqiqi, Beynəlxalq Mühasiblər Federasiyasının (İFAC) isə assosiativ üzvüdür. Palatanın müraciətinə əsasən, 1999-cu ildə MDB məkanında ilk dəfə olaraq respublikamızda ABŞ Daxili Auditorlar İnstitutunun “Audit-Azərbaycan” bölməsi yaradılmış və 2004-cü ildə bölmə tamhüquqlu üzv kimi Avropa Daxili Audit İnstitutları Konfederasiyasına daxil olmuşdur.

Auditorlar Palatası Rusiya, Gürcüstan, Türkiyə, Ukrayna, Litva, Qazaxıstan və Latviyanın müvafiq orqanları ilə də işgüzar münasibətlər qurmuş, əməkdaşlıq barədə saziş və niyyət protokolları imzalamışdır.

Palatanın təşkilatçılığı ilə Bakıda İqtisadi Əməkdaşlıq Təşkilatının (EKO) üzvü olan ölkələrin ali audit qurumları təşkilatının - EKOSAİ-nin İdarəetmə Şurasının iclası (1999), Mühasiblərin və Auditorların “Avrasiya” Beynəlxalq Regional Federasiyasının Şura və Komitə iclasları (2002), “Keçid iqtisadiyyatı ölkələrində auditin inkişaf problemləri” mövzusunda elmi-praktiki konfrans (2004) keçirilmişdir.

Xüsusi vurğulanmışdır ki, qurum fəaliyyət göstərdiyi illər ərzində həm ölkəmizin bazar infrastrukturları sistemində, həm də dövlət idarəetməsi və mərkəzi icra hakimiyyəti orqanları sistemində möhkəm yer tutmuş, dünyada sivil maliyyə nəzarəti forması kimi tanınan auditin Azərbaycanda bərqərar olması, dövlətin, təsərrüfat subyektlərinin və auditorların mənafelərinin müdafiəsi sahəsində öhdəsinə düşən vəzifələrin icrası istiqamətində ardıcıl iş aparır.

Nəticədə Azərbaycan cəmiyyətinin bütün təbəqələrində auditə maraq və etibar güclənmiş, auditorların dövlət əhəmiyyətli tapşırıqların icrasına cəlb olunması intensiv xarakter almışdır. 1996-2005-ci illərdə Prezidentin İcra Aparatı, Milli Məclis, Konstitusiya Məhkəməsi, Baş Prokurorluq, Ali Məhkəmə, Milli Təhlükəsizlik, Daxili İşlər nazirlikləri və s. səlahiyyətli dövlət orqanlarının sifarişi ilə auditor təşkilatları və sərbəst auditorlar tərəfindən 2000-dək yoxlama aparılmışdır. Eyni zamanda, ulu öndərimiz Heydər Əliyevin imzaladığı fərmanlara əsasən, auditor fəaliyyəti ilə məşğul olmaq üçün xüsusi razılığın (lisenziyanın) verilməsi və ekoloji auditin keçirilməsi hüquqları Auditorlar Palatasına verilmişdir. 2002-ci ilin avqustunda isə respublikamızda keçirilmiş referenduma əsasən, Auditorlar Palatasının Əsasnaməsinin təsdiq edilməsi və onun rəhbərinin təyin olunması məsələlərinin həlli Prezidentin səlahiyyətlərinə aid edilmişdir. Bundan əlavə, Auditorlar Palatası dövlət başçısının 2004-cü il 3 sentyabr tarixli Sərəncamı ilə təsdiq edilmiş “Korrupsiyaya qarşı mübarizə üzrə Dövlət Proqramının (2004-2006)” məsul içraçılarından biri kimi müəyyən edilmişdir.

Milli Məclisin daimi komissiyalarının sədrləri - akademik Ziyad Səmədzadə və Şəmsəddin Hacıyev, vergilər nazirinin müavini Natiq Qasımov, maliyyə nazirinin birinci müavini İlqar Fətizadə, Hesablama Palatası sədrinin müavini Abbas Allahverdiyev, Azərbaycan Banklar Assosiasiyasının sədri Zakir Nuriyev və digərləri auditorları təbrik etmiş, onlara gələcək fəaliyyətlərində uğurlar arzulamışlar.

Çıxışlarda xüsusi qeyd edilmişdir ki, respublikamızın sürətli iqtisadi inkişafı nəticəsində maliyyə axını həcminin artması auditorların işini çoxaltmışdır. Onlar belə vəziyyətdə maliyyə şəffaflığının təmin edilməsində mühüm rol oynayırlar.

İclasda müxtəlif dövlət orqanlarının, nazirliklərin, ictimai birliklərin, ayrı-ayrı şəxslərin yubiley münasibətilə kollektivə ünvanladığı təbrik məktubları oxunmuşdur.

Sonda yubiley iclasının iştirakçıları adından Prezident İlham Əliyevə müraciət qəbul edilmişdir.