Avropa məkanında media problemləri müzakirə edilib
Bakı, 4 iyun, AZƏRTAC
İyunun 1-3-də Monteneqronun Budva şəhərində Avropa ölkələrində fəaliyyət göstərən jurnalist təşkilatlarının illik toplantısı keçirilib. Avropa Jurnalistlər Federasiyasının təşkilatçılığı və ATƏT-in dəstəyi ilə keçirilən toplantıya Avropanın 40 ölkəsindən 49 jurnalist təşkilatı qatılıb. Azərbaycandan toplantıda Jurnalistlərin Həmkarlar İttifaqı (JuHİ) iştirak edib.
JuHİ-nin sədri Müşfiq Ələsgərli bildirib ki, ATƏT və Avropa İttifaqı təmsilçilərinin də qatıldığı tədbir “Avropa məkanında medianın spesifik problemləri və yeni çağırışlar” mövzusuna həsr edilib. O deyib: “Tədbirin şüarı bu oldu ki, qlobal media məkanının mütərəqqi inkişafında lokomotiv rolunu oynamalı olan Avropa mediası özü ciddi sınaqlarla üz-üzə qalıb. Xüsusi olaraq media sahibkarlığı məsələsində qeyri-şəffaflığın artması, nüfuzlu media qurumlarının qeyri-rəsmi güclərin təsir dairəsinə düşməsi və onların maraqlarının təmsilçisinə çevrilməsi, reklam işinin media üçün gəlir mənbəyi olmaq mahiyyətini itirərək iri korporasiyalar üçün maliyyə maxinasiyası vasitəsinə çevrilməsi, redaksiyalarda peşəkar jurnalist heyətlərinin kütləvi ixtisar edilməsi, əmək hüquqlarının qorunmaması, əməkhaqqının azlığı kimi səbəblərdən media məkanında qeyri-peşəkarlığın sürətlə artması, jurnalist ölümü hallarının çoxalması, jurnalist təhlükəsizliyi məsələsinin aktuallaşması, onlayn medianın inkişafı ilə əlaqədar müəllif hüquqlarının qorunması məsələsində problemlərin yaranması konfransda müzakirə edilib”.
M.Ələsgərli bildirib ki, beynəlxalq jurnalist təşkilatlarında narahatlıq doğuran digər bir məqam sadalanan problemlərin ayrı-ayrı ölkələr üçün deyil, ümumilikdə Avropa məkanı üçün xarakterik hala çevrilməsidir: “Konkret nümunələr gətirilərək isbat edildi ki, sadalanan problemlər ucqar məkanlar üçün deyil, Avropanın mərkəzi və inkişaf etmiş dövlətləri üçün də xarakterik hala çevrilməkdədir”.
JuHİ-nin sədri bildirib ki, konfrans iştirakçıları neqativ tendensiyaların qarşısının alınması üçün media qurumları arasında həmrəyliyin artırılmasının, əlaqələrin gücləndirilməsinin zəruriliyini bildiriblər.
Konfrans çərçivəsində Rusiya Jurnalistlər Birliyi ilə Ukrayna Media İşçilərinin Həmkarlar İttifaqı arasında dialoq da keçirilib. Hər iki qurum Rusiya və Ukrayna arasında yaşanan gərginliyə baxmayaraq, münaqişə bölgəsində fəaliyyət göstərən jurnalistlərin hüquqlarının müdafiə edilməsi yönündə əməkdaşlıq etmək barədə qərar veriblər.
Bölmənin digər xəbərləri
