AVROPA ŞURASI PARLAMENT ASSAMBLEYASININ İCLASINDA
Avropa Şurası Parlament Assambleyasının sentyabrın 25-də keçirilmiş iclasında İnkişaf və Siyasət Komitəsinin üzvü, polşalı deputat Anjey Vieloviyeskinin “İqtisadi əməkdaşlıq və inkişaf təşkilatı və dünya iqtisadiyyatı” mövzusunda məruzəsi dinlənilmişdir.
Məruzə ətrafında müzakirələrdə Azərbaycan nümayəndə heyətinin başçısı, Milli Məclisin deputatı İlham Əliyev çıxış etmişdir.
AZƏRBAYCAN PARLAMENTİ NÜMAYƏNDƏ HEYƏTİNİN BAŞÇISI, MİLLİ MƏCLİSİN DEPUTATI İLHAM ƏLİYEVİN AŞPA-DA ÇIXIŞI
Əziz cənab Prezident,
Xanımlar və cənablar!
Mən Azərbaycanı təmsil edirəm. Bu o ölkədir ki, cəmi il yarım bundan əvvəl Avropa Şurasının üzvü olmuş və cəmi on il bundan əvvəl müstəqilliyini əldə etmişdir. Ola bilsin ki, bu səbəbdən, bəlkə də başqa səbəblərdən Azərbaycandakı vəziyyət, respublikamızın həyatındakı həqiqətlər və xüsusilə də ölkədə gedən iqtisadi inkişaf prosesləri Avropa Şurası üzvlərinə kifayət qədər məlum deyildir. Buna görə də mən istərdim ki, verilmiş bu imkandan istifadə edib Azərbaycandakı iqtisadi inkişaf prosesi haqqında qısa təqdimat verim.
Son beş il müddətində ölkədə aparılan iqtisadi islahatlar siyasəti nəticəsində həqiqi milli gəlir 54 faiz artmışdır. 2001-ci ildə milli gəlirin artımı 10 faiz, inflyasiya 2,5 faiz təşkil etmişdir.
Aparılan genişmiqyaslı özəlləşmə proqramının nəticəsidir ki, qeyri-dövlət sektorundan əldə edilən milli gəlirin çəkisi 71 faizə bərabərdir.
Uğurla aparılan Aqrar islahatı başa çatdıqdan sonra torpaq kəndlilərə paylanmış və 1,4 milyon hektar torpaq şəxsi mülkiyyətə verilmişdir.
1996-cı ildən 2001-ci ilə qədərki 5 il müddətində Azərbaycanda orta əmək haqqı 3 dəfə, xarici ticarət dövriyyəsi iki dəfədən çox artmışdır.
Elan edilən “açıq qapı” siyasətinin, ölkəyə xarici sərmayələrin cəlb olunmasının və respublikamızda yaxşı sərmayə mühiti yaranmasının nəticəsidir ki, Azərbaycana bütün mümkün maliyyə mənbələrindən 11 milyard ABŞ dolları sərmayə qoyulmuşdur. Azərbaycan uzun müddətdir ki, keçmiş Sovet İttifaqı respublikaları və Mərkəzi Avropanın bir sıra ölkələri arasında adambaşına düşən xarici sərmayənin miqdarına görə birincidir.
Növbəti 3-4 il müddətinə yalnız neft və qaz sektorlarına 10 milyarddan artıq ABŞ dolları sərmayə qoyulacaqdır.
Yaradılmış yaxşı sərmayə mühitindən əlavə, xarici şirkətlərin Azərbaycana bu məbləğdə böyük vəsait qoymasının daha bir səbəbi də ölkəmizdəki siyasi və sosial sabitlikdir. Xarici sərmayəçilər bu sabitliyi hiss etməsələr, rahat işləyə bilməsələr və bu sabitliyin gələcəkdə də davam etməsinə inanmasalar heç vaxt öz vəsaitləri ilə riskə getməzlər.
Azərbaycan özünün neft strategiyasını uğurla həyata keçirir. Bu strategiyanın bütün dünya iqtisadiyyatı üçün böyük əhəmiyyət daşıyan daha bir əsası bir neçə gün əvvəl, sentyabrın 18-də Bakıda qoyuldu. Bakı-Tbilisi-Ceyhan əsas ixrac boru kəmərinin inşasının başlanması Azərbaycanın ən firavan ölkələrdən birinə çevrilməsinə kömək edəcək və bütün regionda daha çox təhlükəsizlik və əməkdaşlığa səbəb olacaqdır.
Azərbaycan Dövlət Neft Fondunu yaratmışdır ki, burada da neftin hasilatı və ixracın əldə olunan bütün gəlirlər toplanır və biz bu işi dünyanın əsas neft şirkətləri ilə birlikdə aparırıq. Bugünkü gündə Azərbaycanın möhkəm valyuta ehtiyatlarının ümumi həcmi 1,2 milyard ABŞ dollarından çoxdur.
Bu yaxınlarda Prezident Heydər Əliyevin imzaladığı Fərmana əsasən Neft Fondundan 72 milyon ABŞ dolları ayrılmış və bu vəsaitlə Ermənistanın Azərbaycana qarşı işğalçı siyasəti nəticəsində qaçqınlığa düçar olmuş insanlara yeni evlər tikilmişdir.
Ermənistan Azərbaycan ərazilərinin 20 faizini hələ də işğal altında saxlamqda davam edir. Bu işğal nəticəsində Azərbaycanın 8 milyonluq əhalisindən bir milyonu qaçqın və ölkə daxilində köçkün olaraq daimi yaşayış yerlərindən məhrum olmuş və hələ bununla belə Ermənistan Azərbaycanla iqtisadi əməkdaşlıq əldə etməyə də cəhd edir. Ermənistan işğalçı ordunu işğal olunmuş Azərbaycan ərazilərindən geri çəkməyincə, Ermənistanla heç bir iqtisadi əlaqə olmayacaqdır.
Azərbaycanın hələ də problemləri, iqtisadi cətinlikləri çoxdur. Lakin dünya iqtisadiyyatına dərin inteqrasiya siyasəti artıq öz yaxşı nəticəsini vermişdir və gələcəkdə də bizə güclü iqtisadiyyat qurmağa kömək edəcəkdir. Sağ olun.
Milli Məclisin deputatı İlham Əliyevin çıxışı sürəkli alqışlarla qarşılanmışdır.
Bölmənin digər xəbərləri
