Avropa Xəbər Agentlikləri artan dezinformasiyaya qarşı mübarizədə səylərini birləşdirirlər
Bakı, 8 sentyabr, AZƏRTAC
Brüsseldə Bolqarıstan Xəbər Agentliyi (BTA) də daxil olmaqla, 20-dən çox Avropa İttifaqı ölkəsinin xəbər agentlikləri tərəfindən yaradılmış birgə informasiya mübadiləsi platforması - “European Newsroom” (enr) fəaliyyətə başlayıb.
AZƏRTAC xəbər verir ki, yeni platformanın fəaliyyətə başlamasına həsr olunan tədbirə Avropa Komissiyasının vitse-prezidentləri Vera Jourova və Marqaritis Şinas, BTA-nın baş direktoru Kiril Valçev və agentliyin baş direktor müavini Yevgeniya Drumeva ilə yanaşı, iştirakçı agentliklərin rəhbərləri qatılıblar.
Tədbirdə çıxış edən Vera Jurova bildirib ki, Avropa İttifaqı bu cür layihələri dəstəkləyir, çünki faktlar aydın şəkildə təqdim edilməlidir. Əsl şər qüvvənin nə olduğunu və bunun Ukraynada Rusiyanın təcavüzü ilə baş verdiyini demək üçün Avropanın vahid mövqedən çıxış etməsi zamanıdır.
Aİ-də media mühitinin pisləşdiyini deyən Jurovanın sözlərinə görə, növbəti həftə Avropa Komissiyası media azadlığının təkmilləşdirilməsi üçün təkliflər təqdim edəcək. O əlavə edib ki, jurnalistlərdən və mediadan bu qədər çox gözlənti olduğu halda, onlar kifayət qədər qorunmurlar. Bəzi Aİ ölkələrində media azadlığına dövlət müdaxiləsi də var. Avropa Komissiyasının heç bir prosedur həyata keçirə bilməyəcəyini və medianın milli hakimiyyət orqanlarının səlahiyyətinə aid məsələ olduğunu qeyd edən Jourova deyib ki, jurnalistlərin iqtisadi və siyasi təzyiq altında olduqlarını, təhdid edildiyini görmək olar.
Kiril Valçev bildirib ki, hər kəsin “enr” platforması üzərindən xəbərləri heç bir ödəniş etmədən oxuya bilməsi gələcəkdə informasiya məkanında əsas yeri hamı üçün açıq olan xəbər agentliklərinin tutacağını göstərir. BTA agentliyi 2022-ci ildən etibarən ödənişli abunəliyi ləğv edib. Avropa Komissiyası saxta xəbərlərə qarşı mübarizə aparmaq və bütün KİV-lər tərəfindən pulsuz istifadə edilə bilən real xəbərlər üçün kifayət qədər büdcə təmin etmək məqsədilə BTA da daxil, 16 tamhüquqlu üzv olan xəbər agentlikləri konsorsiumunu maliyyələşdirib.
"DPA və AFP kimi qlobal agentliklər və Avropanın bütün milli xəbər agentlikləri arasında həyata keçirilən bu ümumi layihə həm milli xəbər agentliklərinin, həm də digər tərəfdaşların qoşulmaq istədiyi əməkdaşlığımızın artan əhəmiyyətini nümayiş etdirir", - deyə BTA-nın baş direktoru vurğulayıb.
“European Newsroom” platformasının Avropa İttifaqının mühüm qərarlar qəbul etməli olduğu, həmçinin keyfiyyətli kommunikasiya və qarşılıqlı anlaşmanın vacib olduğu bir vaxtda fəaliyyətə başladığını bildirən Evgeniya Drumeva öz çıxışında layihədə iştirak edən hər bir agentliyin ona öz töhfəsini verəcəyinə əminliyini ifadə edib.
Avropa Komissiyasının 1,76 milyon avro maliyyə dəstəyi ilə reallaşan “enr” layihəsinin məqsədi artan dezinformasiyaya və birtərəfli təbliğata qarşı faktların yoxlanılması və təsdiqlənməsi vasitəsilə mübarizə aparmaqla peşəkar jurnalistikanı dəstəkləməkdir. Bu platforma Avropa agentlikləri üçün informasiyaya bərabər çıxış imkanı yaradır ki, bu da ölkə hüdudlarından kənarda hərtərəfli və müxtəlif informasiyaların hazırlanmasına və verilməsinə yol açır.
İlkin olaraq, “enr” platformasının 2023-cü ilin sonunadək fəaliyyət göstərəcəyi nəzərdə tutulur.
Layihə barədə daha ətraflı məlumatı europeannewsroom.com saytından əldə etmək olar.
Bölmənin digər xəbərləri
