Avropada ümumi müdafiə fondunun yaradılması müzakirə edilir
Bakı, 27 fevral, AZƏRTAC
Avropa İttifaqına (Aİ) üzv ölkələr Böyük Britaniyanın iştirakı ilə Avropa Silahlanma Bankının və ümum-Avropa müdafiə maliyyələşdirilməsi fondunun yaradılmasını müzakirə edirlər.
AZƏRTAC xəbər verir ki, “Financial Times” qəzeti bu barədə avropalı məmurlara istinadla məlumat yayıb.
Məlumata görə, Aİ-nin maliyyə nazirləri Cənubi Afrika Respublikasında toplaşaraq Böyük Britaniyanın iştirakı ilə Yenidən Silahlanma Bankının və ya ümumi fondun yaradılması məsələsinin müzakirəsinə başlayıblar.
Yenidən Silahlanma Bankı həm özəl sektora, həm də hökumətlərə hərbi texnikanın alınması, eləcə də müdafiə sahəsində sənaye layihələri üçün kreditlər verə bilər. Hazırda Avropa İttifaqına sədrlik edən Polşanın bu təklifi dəstəklədiyi bildirilir.
Analitiklərin fikrincə, Böyük Britaniya və Avropa İttifaqı arasında ümumi fondun təşkil olunması inzibati baxımdan daha asandır və məhdud miqyası onu bankdan daha tez yaratmağa imkan verə bilər.
Nəşr qeyd edir ki, Avropanın müdafiə büdcəsinin artırılması hökumətlərin dövlət kəsirlərini və borclarını azaltmağa çalışdığı bir vaxta təsadüf edir.
Bölmənin digər xəbərləri
