Azadlığın, qurtuluşun, yeni dövrün mübarək, Şuşa!
Şuşa, 8 may, Tahir Ağaməmmədov, AZƏRTAC
Şuşa! Qarabağın üzük qaşı, baş tacı. Tarixlərin yadigarı, dühalar diyarı. Mədəniyyətimizin beşiyi, qürur mənbəyimiz, şairlərin, bəstəkarların doymadan vəsf etdiyi dağlar gözəli.
Düz 28 il xain düşmənin qurduğu tələ ilə doğma övladlarından ayrı düşərək zindan həyatı yaşadın. Mənfur düşmən səni yaraladı, odladı, yağmaladı, taladı. Mədəniyyətinə, incəsənətinə, mənəvi dəyərlərinə əl uzatdı. Torpağını, sərvətini zəbt edib tarixini saxtalaşdıraraq səni bizdən qoparıb özününkü etməyə çalışdı.
İllərlə sənə nə əlimiz çatdı, nə ünümüz yetdi. Nə də doğma torpağına ayaq basa bildik. Əsrə bərabər bu illər ərzində səni xatirələrimizdə və xəyallarımızda yaşatdıq. Adına qoşulmuş mahnıları dilimizə belə gətirməyə mənəvi haqqımız olmadan qəlbimizdə oxuduq.
Gözəl Şuşa
Bir Tamaşa
Yay günləri sərin.
Cıdır düzün
Mavi gündüzün
Tarixidir keçmişlərin.
Əziz Şuşa! 28 il sənin işğal gününü - o məşum 8 may tarixini dərin hüzn və kədərlə andıq. O gün yaddaşlara ən qiymətli sərvətimizin itən günü, qürurumuzun sınan günü, Qarabağ dağlarında Günəşin batan günü kimi həkk olundu. Ancaq nəhayət ki, ötən il noyabrın 8-də sənin qarlı zirvələrinə də Günəş doğdu - azadlıq Günəşi. Uğrunda ölən və ölməyə hazır olan Vətən oğulları və düşmənin başını əzən "dəmir yumruq" müqəddəs torpağını yenidən Vətən etdi. 28 il qanı yerdə qalan günahsız insanların qisası alındı. Onların sənin dumanlı göylərində dolaşan narahat ruhları rahatlıq tapdı. Bu gözəlliklər diyarını öz alçaq nəfsinə qurban edərək hərb meydanına çevirənləri isə tarix nifrət, lənət və şərəfsizlik damğası ilə damğaladı.
Gözəl Şuşa, gözün aydın! Sənə göz dikərək qocaları, uşaqları belə amansızlıqla qətlə yetirən mənfur düşmənin bayrağı müzəffər Ordumuzun, igid əsgərlərimizin ayaqları altında tapdalandı. İndi sənin zirvələrində üçrəngli, ay-ulduzlu bayrağımız dalğalanır. Zaman-zaman Azərbaycan anaları səni və bütöv Azərbaycanı göz bəbəyi kimi qoruyacaq Mübarizlər, Poladlar, Raquflar... yetirəcək. Sələflərindən igidlik və vətənpərvərlik dərsi alan bu oğullar üçrəngli bayrağımızı həmişə zirvələrdə dalğalandıracaq.
İndi irəlidə səni işıqlı və gözəl bir gələcək gözləyir. Müzəffər Ali Baş Komandan İlham Əliyevin dediyi kimi, “Əziz Şuşa, sən azadsan! Əziz Şuşa, biz qayıtdıq! Əziz Şuşa, biz səni dirçəldəcəyik!”
Artıq Prezidentimiz tərəfindən sənin işıqlı gələcəyinin təməli olan quruculuq işlərinə start verilib. İndi igid oğullarımızın qanı-canı bahasına azad edilmiş dağların, meşələrin qoynundan müasir, geniş yollar çəkilir. Bu yollar səni abadlığa və səadətə aparan yollardır. Sənin qaranlığa qərq edilmiş hər guşən indi nura bürünür. Düşmənin sənə vurduğu yaralar tezliklə xalqımızın şəfalı əlləri və dövlətimizin qüdrəti ilə sağalacaq. Sən yenidən qurulub abadlaşaraq dünyanın ən gözəl şəhərinə çevriləcəksən. Erməni vandalizminə məruz qalan tarixi-mədəni abidələrin, məktəb və muzeylərin, mədəniyyət ocaqların, xəstəxana və sanatoriya-kurort komplekslərin bərpa edilib yenidən qurulacaq. Doğma qucağından didərgin düşmüş sakinlərin 28 illik həsrətdən sonra yenə sənə dönəcək. Yenə mehriban qollarını açıb dünyanın hər yerindən gələn qonaqlarını qarşılayacaq, təmiz havan, saf suların, ecazkar təbiətinin möcüzəsi olan Xarı bülbülün və qonaqpərvərliyin ilə hər kəsi heyran edəcəksən. Yenə gözəl İsa bulağında çal-çağır başlanacaq, Cıdır düzündə Qarabağ atları şaxə qalxacaq, "Koroğlu"nun uvertürası dağlara səs salacaq. Doğma qoynunda yenə də ənənəvi hal alacaq Vaqif poeziya günləri, Natəvan qızlar bayramı, Xarı bülbül festivalı, 8 noyabr - Zəfər günü kimi bayramlar keçiriləcək və kim bilir daha hansı möhtəşəm tədbirlərə ev sahibliyi edəcəksən.
Doğma torpağın, füsunkar təbiətin yeni Natəvanlar, Üzeyirlər, Bülbüllər yetirəcək. Yeni şərəfli tarixini yazan qəhrəmanlarına və füsunkar gözəlliklərinə şeirlər həsr olunacaq, mahnılar bəstələnəcək. Gələcək nəsillər sənin qəhrəmanlıq salnaməni tarix dərsliklərindən oxuyacaq.
Yüz illər keçsə də, yenə də bu mahnı Azərbaycanın hər guşəsindən sənə üz tutanların sevimli nəğməsi olacaq:
Hər yay doğma qucağına
Uçub gələn azad quşam.
Nə gözəlsən, mənim Şuşam!
Nə gözəlsən, mənim Şuşam!
Düşmən tapdağından qəhrəmanlıqla azad edilmiş qəhrəman şəhər! Artıq sənin üçün yeni bir dövr başlayır. Artıq 8 may günü hər bir azərbaycanlını kədərləndirən gün kimi anılmayacaq. O, tariximizin bir günü kimi əbədilik qan yaddaşımıza yazılacaq və gələcək nəsillərə ötürüləcək. Hər il fəxarət və qürur hissi ilə qeyd edəcəyimiz gün isə, tariximizə qızıl hərflərlə yazılmış 8 noyabr olacaq.
Azadlığın, qurtuluşun, yeni dövrün mübarək, Şuşa!
Bölmənin digər xəbərləri
