Bakı, 17 avqust, AZƏRTAC

“CNN Türk” dünya ictimaiyyəti tərəfindən maraqla izlənilən televiziya kanallarından biridir. Prezident İlham Əliyev ”CNN Türk” kanalına verdiyi müsahibədə Azərbaycanın erməni işğalına qarşı mübarizəsini diqqətə çatdırıb. Həmçinin torpaqlarımızın işğaldan azad edilməsini, xalqımızın arzularının gerçəkləşməsini böyük qürurla vurğulayıb. Prezident İlham Əliyev, həmçinin 44 günlük Vətən müharibəsində yaratdığımız yeni reallıqda regionun gələcəyinin qurulmasında Azərbaycanın məqsədlərini geniş şəkildə beynəlxalq ictimaiyyətin diqqətinə çatdırıb.

Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.

Deputat deyib ki, Prezident İlham Əliyevin müsahibələrində reallığa söykənən və beynəlxalq ictimaiyyətin sülhə çağırışları ilə dolu düşüncələri xarici KİV-lərdə izləmə rekordu qırır. Çünki, Azərbaycan Prezidenti öz müsahibəsində ölkəmizin ərazi bütövlüyünün təmin edildiyini bildirməklə yanaşı, məqsədimizin bölgədə firavan yaşayışın və əməkdaşlıq mühitinin yaradılması olduğunu diqqətə çatdırıb. Bu, həm də Prezident İlham Əliyevin rəhbərliyi ilə ölkəmizdə yaranmış milli birlik və həmrəyliyin bir çalarıdır. Həmçinin Azərbaycanda baş verən hər bir çətinliyi dəf etməyə qadir olduğumuzun bir nümunəsidir.

“Prezidentin müsahibəsində qeyd etdiyi mühüm məqamlardan biri də ATƏT-in Minsk qrupunun nəticəsiz fəaliyyətinin dünya ictimaiyyətinə çatdırılmasıdır. ATƏT-in Minsk qrupunun 28 ildən çox bir müddətdə münaqişənin sülh danışıqları yolu ilə həll ediləcəyi adı altında regiona səfərlərinin təşkil edilməsinin məqsədi münaqişənin dondurulmasına və əbədi olmasına xidmət etdiyini bir daha göstərdi. Azərbaycan həmişə sülh danışıqları ilə münaqişənin həll olunmasının tərəfdarı olub. Bununla yanaşı öz torpaqlarının erməni işğalı altında qalması ilə razılaşmayacağını dəfələrlə bildirib.

Problem danışıqlar yolu ilə öz həllini tapsaydı müharibəyə zərurət yaranmazdı. Amma beynəlxalq qurumların səssiz və fəaliyyətsiz davranması, Azərbaycana qarşı ikili standartların tətbiq olunması müharibənin baş verməsinin prioritetlərindəndir. İlk növbədə qeyd etmək istəyirəm ki, BMT Təhlükəsizlik Şurasının qəbul etdiyi qətnamələr bəzi ölkələrə tətbiq olunan zaman dərhal icra olunur, amma Azərbaycan-Ermənistan münaqişəsinə qarşı yanaşmada işğalçıya heç bir təsir göstərilmədi. Əksinə işğalçı Ermənistanı həvəsləndirəcək addımlar atmaqla münaqişənin dondurulmasına xidmət etdilər. İkili standartların digər bir nümunəsi isə 100 il əvvələ aparan və heç bir tarixi fakta əsaslanmayan saxta “erməni soyqırımı”nın beynəlxalq səviyyədə tanınması oldu. Bunu qəbul etmək üçün inkişaf etmiş ölkələr öz parlamentlərində və dövlət səviyyələrində müzakirələr apardıqları halda 29 il əvvəl hamının gözü qarşısında baş vermiş və tarixi faktlarla nümayiş olunan Xocalı soyqırımını müzakirə etmək istəmədilər. Prezident İlham Əliyevin rəhbərliyi ilə aparılan məqsədyönlü beynəlxalq siyasət sayəsində 13 ölkə tərəfindən Xocalı soyqırımı qəbul edilib. Bu ikili standart deyilmi? Vətən müharibəsi dövründə Azərbaycanın müzəffər Ordusu pozulmuş beynəlxalq hüququnun tələblərini öz gücü ilə bərpa etdiyi zaman bəzi dövlətlər ölkəmizə təzyiq göstərməyə çalışırdılar. Həmçinin Ermənistanı silahlandıraraq ruhlandırması istiqamətində atılan addımlar ikili standartların göstəricisi idi. Azərbaycan hər zaman ədalətin tərəfdarı olduğunu göstərib. Buna görə də müharibəni də öz ərazisində apararaq, ərazi bütövlüyünü təmin etdi. Beynəlxalq güclərin görə bilmədiyi işi Azərbaycan Ordusu öz hərbi gücü ilə edərək tarixi Zəfər qazandı”, - deyə deputat bildirib.

Azər Badamov deyib: “Bu gün ölkəmiz müharibənin bitdiyini elan edib. Azərbaycan regionda yaranmış yeni reallığa uyğun gündəliyi müəyyənləşdirərək maraqlı tərəflərə təqdim edir. Bu gündəlik bölgədə sülhün və təhlükəsizliyin təmin olunmasına, əməkdaşlıq mühitinin formalaşmasına istiqamətlənib. Ölkəmiz bu gün Ermənistana sərhədlərin delimitasiya və demarkasiya edilməsini və iki ölkənin ərazi bütövlüyünün tanınmasını təklif edir. Prezident İlham Əliyev müsahibəsində qeyd edib: “Biz bu təklifi masa üzərində əbədi saxlamalı deyilik, əgər buna etiraz edirlərsə, açıq söyləsinlər ki, Azərbaycanla sülh müqaviləsi imzalamaq istəmirlər”.

Burada bir məqamı yaddan çıxarmaq lazım deyil ki, sadə ermənilər Ermənistanın acı məğlubiyyətini qəbul ediblər və bununla barışıblar. Çünki belə olmasaydı məğlub olmuş birini yenidən səs verərək hakimiyyətə qaytarmazdılar. Sadə ermənilər İkinci Qarabağ müharibəsində yaşadıqları faciəni bir daha yaşamaq istəmirlər. Hətta İrəvanda ermənilər arasında aparılan sorğularda respondentlər Qarabağın Azərbaycanın ərazisi olduğunu və yenidən müharibə olacağı təqdirdə Azərbaycan Ordusu ilə savaşa getməyəcəklərini bildiriblər. Bu, o deməkdir ki, Ermənistanın əksər əhalisi Azərbaycanla qonşuluq münasibətlərində yaşamağa hazırdır”.

Deputat vurğulayıb ki, Prezident İlham Əliyevin qeyd etdiyi kimi: “Rusiya sülhməramlı missiyasının nəzarətində olan ərazidə yaşayan erməniləri biz yolunu azmış Azərbaycan vətəndaşları sayırıq”. Azərbaycan Ermənistandan fərqli olaraq çoxmillətli və çox konfessiyalı ölkədir. Ölkəmizdə bütün xalqlar dostluq və qardaşlıq mühitində yaşayırlar. Hətta Bakıda minlərlə erməni yaşayır və onlar heç bir diskriminasiyaya məruz qalmırlar. Bakının mərkəzində yerləşən erməni kilsəsi dövlətimiz tərəfindən təmir olunaraq qorunur. Həm də 5 minə yaxın erməni dilində kitablar bu kilsədə saxlanılır. Ermənilər isə torpaqlarımızı işğal etdikləri 30 il ərzində Azərbaycan xalqının tarixi və mədəniyyət abidələrini, o cümlədən 60-dan çox məscidini dağıdıblar. Buradan azərbaycanlıların və ermənilərin niyyətləri, səviyyələri, humanizmi bəlli olur. Bütün bunlara baxmayaraq biz köhnə səhifəni bağlamaq və yeni səhifəni açmaq istəyirik. Ona görə də qeyd etmək istəyirəm ki, Azərbaycan Qarabağ ərazisindəki erməniləri də öz vətəndaşları kimi qəbul etməyə hazırdır. Təbii ki, bu, onların gələcəyi üçün bir şansdır.

Amma havadarları Ermənistanı yenidən silahlandıraraq, müharibəyə sövq etməyə çalışırlar. Məqsədləri isə Cənubi Qafqaz regionunun gərginlik altında saxlanmasından başqa bir şey deyil. Təbii ki, Azərbaycan hər bir vəziyyətə hazırdır. Müasir silahlar alınaraq Azərbaycan Ordusunun arsenalı təkmilləşdirilir. “Dəmir yumruq” yenidən işə düşəcəyi təqdirdə nəticəsinin daha ağır olacağı Ermənistana bəllidir. Ona görə də erməni rəhbərliyi revanşist bəyanatlardan çəkinməli, regionda sülhün və əməkdaşlığın davamlı olmasına xidmət edəcək addımlar atmalıdır. Bunun üçün imzalanmış üçtərəfli Bəyanatların yerinə yetirilməmiş maddələri icra olunmalı, sərhədlərin delimitasiya və demarkasiya prosesi başa çatdırılmalıdır. Həmçinin sülh müqaviləsinin imzalanması ilə bağlı təşəbbüsümüzə də cavab verilməlidir. Təbii ki, Ermənistan sülh təklifimizə müsbət cavab verərək müqaviləni imzalamağa hazır olduğunu bildirsə, bu ilk növbədə Ermənistanın özü üçün fayda verəcək, həm də bütün region ölkələri üçün. O cümlədən Avrasiya regionunda əməkdaşlığın möhkəmlənməsi üçün yeni imkanlar yaranacaq. Avropa İttifaqının Prezidenti Şarl Mişel ölkəmizə səfəri zamanı Azərbaycanın gələcək planlarını dəstəklədiyini bildirməklə Zəngəzur dəhlizinin açılmasının İttifaq dövlətləri üçün də maraqlı olduğunu bildirdi. Burada həm yeni əməkdaşlıq formatları yaranır, həm də müasir beynəlxalq nəqliyyat dəhlizi əmələ gəlir. Təbii ki, bu, həm də regiona uzun müddətli sülhün gəlişinin başlanğıcı ola bilər.

“Ümumiyyətlə, regionun gələcəyi Ermənistanın özünü necə aparacağından asılı olacaq. Biz Ermənistanın hər bir addımını izləyirik və hər bir addımına adekvat cavab verəcəyik. Əgər Ermənistan havadarlarına arxalanaraq yenidən müharibəyə aparacaq addımlar atmazsa, bu, regiona uzunmüddətli və dayanıqlı sülh gətirəcək. Cənubi Qafqazın sülh və əməkdaşlıq regionu olması üçün tək Azərbaycan yox, regionun bütün dövlətləri bu istiqamətdə ciddi addımlar atmalıdır. Ən azından Cənubi Qafqaz coğrafiyası bunu tələb edir”, - deyə A.Badamov fikirlərini yekunlaşdırıb.