Azər Badamov: Azərbaycanla Özbəkistan arasında iqtisadi və ticarət əlaqələri sürətlə genişlənir
Bakı, 22 avqust, AZƏRTAC
Azərbaycanla Özbəkistan arasında möhkəmlənən dostluq və qardaşlıq münasibətləri sürətlə genişlənən iqtisadi əməkdaşlıda da özünü təsdiq edir. Son 15 ildə Azərbaycan ilə Özbəkistan arasında münasibətlər yüksək inkişaf dinamikası ilə səciyyələnir. Dövlət başçıları arasında formalaşmış şəxsi dostluq və qarşılıqlı etimada əsaslanan münasibətlər xalqlarımız arasında qardaşlıq əlaqələrinin daha da möhkəmlənməsinə, dövlətlərarası əməkdaşlığın isə bütün istiqamətlərdə uğurla inkişafına möhkəm zəmin yaradıb. Bu yüksəksəviyyəli siyasi münasibətlər iqtisadi-ticari əməkdaşlıqda da özünü aydın şəkildə göstərir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
O bildirib ki, ölkələrimiz arasında ticarət dövriyyəsinin artım dinamikası bunun bariz nümunəsidir. 2025-ci ildə Azərbaycan ilə Özbəkistan arasında ticarət dövriyyəsi 2024-cü illə müqayisədə üç dəfədən çox artaraq 795 milyon ABŞ dollarını ötüb. Cari ilin ilk beş ayında isə ticarət dövriyyəsi daha 33 faiz artaraq 144 milyon ABŞ dollarına çatıb. Bu göstəricilər qarşılıqlı ticarət əlaqələrinin sürətlə inkişaf etdiyini və mövcud iqtisadi potensialdan daha geniş istifadə etmək üçün böyük imkanların olduğunu göstərir.
İqtisadi əməkdaşlığın genişləndirilməsində investisiya layihələri də mühüm rol oynayır. Nizamnamə fondu 500 milyon ABŞ dolları olan Azərbaycan–Özbəkistan İnvestisiya Şirkəti ölkələrimizin iqtisadiyyatlarının müxtəlif sektorlarında perspektivli layihələrin həyata keçirilməsinə mühüm töhfə verir. Bu şirkətin fəaliyyəti qarşılıqlı investisiyaların təşviqi və yeni iqtisadi layihələrin reallaşdırılması baxımından xüsusi əhəmiyyət daşıyır.
“İkitərəfli iqtisadi əlaqələrin inkişafında mühüm institusional mexanizm kimi çıxış edən Hökumətlərarası Komissiyanın fəaliyyətini də xüsusi qeyd etmək lazımdır”, - deyən deputatın sözlərinə görə, komissiyanın fəaliyyəti iqtisadi əlaqələrin sistemli şəkildə inkişaf etdirilməsi və yeni əməkdaşlıq istiqamətlərinin müəyyənləşdirilməsi baxımından mühüm əhəmiyyət kəsb edir.
A.Badamov deyib: “Enerji sektoru da Azərbaycan–Özbəkistan iqtisadi əməkdaşlığının mühüm istiqamətlərindən biridir. Bu sahədə əlaqələrimiz ilbəil daha da dərinləşir. 2016-cı ildən fəaliyyət göstərən “Neftegaztexnologiya” birgə müəssisəsi neft-qaz sahəsində uğurla fəaliyyət göstərir. 2024-cü ildə yaradılmış “Turan Energy AFEZCO” birgə müəssisəsi isə “Azərikimya” İstehsalat Birliyi tərəfindən istehsal olunan yüksəktəzyiqli polietilenin Özbəkistana ixracını həyata keçirir”.
Deputat, həmçinin qeyd edib ki, yaşıl enerji sahəsində əməkdaşlıq da ölkələrimiz üçün yeni və geniş perspektivlər açır. Bu istiqamətdə formalaşan əməkdaşlıq yalnız Azərbaycan və Özbəkistan arasında ikitərəfli münasibətlər baxımından deyil, regional əməkdaşlıq çərçivəsində də mühüm əhəmiyyət daşıyır.
Digər önəmli əməkdaşlıq sahəsi yükdaşımalarıdır. Azərbaycan ilə Özbəkistan arasında münasibətlərin yüksək səviyyədə inkişafı nəqliyyat və logistika sahəsində də öz müsbət nəticələrini verir. 2025-ci ildə ölkələrimiz arasında tranzit daşımaların həcmi 6,7 faiz artaraq 1,4 milyon ton təşkil edib. Cari ilin ilk altı ayında isə bu göstərici 12,2 faiz artaraq 675 min tona çatıb. Tranzit daşımaların dinamik artımı ölkələrimizin nəqliyyat-logistika imkanlarının genişləndirilməsi istiqamətində həyata keçirilən əməkdaşlığın əhəmiyyətini bir daha nümayiş etdirir.
İqtisadi əməkdaşlığımızın mühüm xüsusiyyətlərindən biri də birgə müəssisələrin və konkret investisiya layihələrinin sayının artmasıdır. Füzuli rayonunda 100 hektar ərazidə yaradılmış “Dostluq bağı” nar bağı bu baxımdan diqqətəlayiq layihələrdəndir. Özbəkistanda “Chevrolet” və “Isuzu” markalı avtomobillərin istehsalı sahəsində əməkdaşlıq isə sənaye kooperasiyasının inkişafına və ölkələrimizin istehsal potensiallarının daha səmərəli şəkildə birləşdirilməsinə xidmət edir.
Deputat əlavə edib ki, bu gün Azərbaycan–Özbəkistan münasibətləri qarşılıqlı etimad, dostluq və qardaşlıq üzərində qurulan strateji tərəfdaşlığın iqtisadi müstəvidə uğurlu nəticələrini nümayiş etdirir. Mövcud siyasi iradə və formalaşmış qarşılıqlı etimad ölkələrimiz arasında iqtisadi əməkdaşlığın bundan sonra da ardıcıl şəkildə inkişaf etdirilməsi, yeni birgə layihələrin həyata keçirilməsi və qarşılıqlı iqtisadi potensialın daha səmərəli reallaşdırılması üçün geniş imkanlar yaradır.
Bölmənin digər xəbərləri
