“Azerbaijan airlines” jurnalı Rusiyada mükafata layiq görülüb
Moskva, 19 dekabr, AZƏRTAC
“Azərbaycan Hava Yolları” ASC-nin bort jurnalı olan “Azerbaijan airlines” nəşri Rusiyada mükafata layiq görülüb.
AZƏRTAC xəbər verir ki, jurnal Rusiya kütləvi informasiya vasitələrinin Peşəkar Fotoqraflar Beynəlxalq Gildiyasının “Rusiyanın qızıl peqası” mükafatına layiq görülüb. Mükafat jurnalın kollektivinə ölkəmizin Rusiyadakı səfirliyində təşkil olunmuş təntənəli tədbirdə təqdim edilib.
Azərbaycanın Rusiyadakı səfiri Polad Bülbüloğlu jurnalın kollektivini təbrik edib. Hər zaman AZAL şirkətinin xidmətlərindən istifadə etdiyini deyən Polad Bülbüloğlu “Azerbaijan airlines” jurnalının daimi oxucusu olduğunu bildirib. Səfir Azərbaycanın aviasiya tarixi barədə məlumat verib, bu ənənələri layiqincə davam etdirən AZAL-ın yüksək nəticələr əldə etməsi və populyarlıq qazanmasında şirkətin prezidenti Cahangir Əsgərovun xidmətlərini xüsusi vurğulayıb. “Mənim üçün çox xoşdur ki, AZAL-ın bort jurnalı Rusiyada mükafata layiq görülüb. Düşünürəm ki, bu, jurnalın daha maraqlı və oxunaqlı olmasına stimul verəcək”, - deyə diplomat bildirib.
Jurnalın baş redaktoru, Azərbaycanın Əməkdar jurnalisti Musa Mərcanlı bu günlər “Azerbaijan airlines” nəşrinin 10 yaşının qeyd edildiyini diqqətə çatdırıb. O deyib: “On il ərzində jurnalın 55 nömrəsi çapdan çıxıb. Jurnalımızın hər nömrəsini təxminən 400 minə yaxın sərnişin oxuyub. Redaksiyamızın peşəkar kollektivi Azərbaycanın tarixi, bu günü, AZAL şirkəti haqqında məqalələr, AZAL-ın uçuşlar həyata keçirdiyi ölkələr və şəhərlər barədə maraqlı məlumatlar hazırlayır. Çox sevindirici haldır ki, Azərbaycan KİV-ləri sırasında bu mükafat ilk dəfə “Azerbaijan airlines” jurnalına təqdim edilir”.
Rusiya kütləvi informasiya vasitələrinin Peşəkar Fotoqraflar Beynəlxalq Gildiyasının prezidenti Sergey Lidov Azərbaycan jurnalının mükafata materialların təqdimatında və bədii tərtibatda yüksək peşəkarlığa görə layiq görüldüyünü bildirib. Bu mükafatı indiyədək bir çox məşhurlar, o cümlədən Hollivud aktyoru Riçard Gir, kosmonavtlar, tanınmış fotoqraflar alıblar. “Azerbaijan airlines” jurnalının digər aviaşirkətlərin bort jurnallarından tərtibatı və maraqlı, peşəkar fotoları ilə fərqləndiyini qeyd edən S.Lidov deyib: “Biz bir çox aviaşirkətin bort jurnallarını müqayisə etdik. Məşhur fotoqraflardan ibarət Gildiya Şurası AZAL şirkətinin jurnalına üstünlük verdi. Çox şadam ki, bu gün “Rusiyanın qızıl peqası” mükafatını “Azerbaijan airlines” jurnalına təqdim etmək şərəfi mənə qismət olub”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
