Milli Qurtuluş Günü Qaxda silsilə tədbirlərlə qeyd olunub
Qax, 15 iyun, AZƏRTAC
Hər bir ölkənin tarixində onun gələcək taleyinə bilavasitə təsir göstərən əhəmiyyətli dönüş nöqtələri olur. Azərbaycan xalqının müasir tarixinin çox əhəmiyyətli dönüş nöqtəsi Ulu Öndər Heydər Əliyevin 1993-cü ildə xalqın təkidi və tələbi ilə hakimiyyətə qayıdışı oldu. Həmin ilin iyununda ölkəmiz vətəndaş müharibəsi təhlükəsi ilə üzləşdiyi bir vaxtda xalqın çağırışı ilə Naxçıvandan Bakıya dönən Ulu Öndərin qətiyyəti sayəsində müstəqil respublikamız məhv olmaq təhlükəsindən xilas olub, Azərbaycanın gələcək inkişafının təməli qoyulub, müstəqilliyimizin əbədiliyi və dönməzliyi təmin edilib. Ümummilli Lider müasir tariximizə dövlətçiliyimizin xilaskarı, banisi və qurucusu kimi daxil olub.
AZƏRTAC-ın bölgə müxbiri xəbər verir ki, bu fikirlər Milli Qurtuluş Günü münasibətilə iyunun 15-də Qax şəhərində keçirilən rayon tədbirində səsləndirilib.
Rayon rəhbərliyi və ictimaiyyətin nümayəndələri əvvəlcə Ümummilli Lider Heydər Əliyevin şəhər parkındakı abidəsini ziyarət edib, önünə gül dəstələri düzüblər.
Rayon Heydər Əliyev Mərkəzində keçirilən tədbirin əvvəlində Dövlət Himni səsləndirilib, Ulu Öndərin və şəhidlərin xatirəsi bir dəqiqəlik sükutla yad edilib.
Sonra Ümummilli Lider Heydər Əliyevin həyat və fəaliyyətinə həsr olunan videolent nümayiş olunub.
Tədbirdə rayon icra hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Vəfa Heydərovanın məruzəsi dinlənilib. Məruzədə 1993-cü ilin iyun hadisələri ərəfəsində respublikada yaranmış ağır vəziyyət, hökm sürən hərc-mərclik, baş verən ictimai-siyasi proseslər geniş təhlil olunub. Bildirilib ki, XX əsrin sonlarında yenidən müstəqilliyinə qovuşan Azərbaycan qısa vaxtdan sonra onun itirilməsi təhlükəsi ilə üz-üzə qalıb. Həmin dövrdə iqtidarda olanların səriştəsiz və xəyanətkar əməllərinin məntiqi nəticəsi olan hakimiyyət böhranı 1993-cü ilin iyununda artıq kulminasiya həddinə çatıb. Ölkəni xaos və anarxiya bürüyüb, dövlət müstəqilliyimiz çox ciddi təhlükə ilə üzləşib. 1993-cü il iyunun 15-də xalqın təkidli tələbi ilə yenidən hakimiyyətə qayıdan Ulu Öndər Heydər Əliyev öz müdrik siyasəti ilə Azərbaycan dövlətçiliyini məhv olmaq təhlükəsindən xilas edə bilib. Bu səbəbdən də iyunun 15-i Milli Qurtuluş Günü, eyni zamanda, Azərbaycan dövlətçiliyinin xilası günüdür.
Tədbirdə çıxış edən Qax Rayon İcra Hakimiyyətinin başçısı Elvin Paşayev müstəqil respublikamızın son illər əldə etdiyi uğurların birbaşa Ümummilli Lider Heydər Əliyevin adı ilə bağlı olduğunu vurğulayıb. Bildirilib ki, məhz Ulu Öndərin respublika rəhbərliyinə qayıdışından sonra ölkəmiz sürətli inkişaf yoluna qədəm qoyub, Ümummilli Liderin layiqli davamçısı İlham Əliyevin məqsədyönlü siyasəti nəticəsində ölkəmizin iqtisadi qüdrəti daha da artıb, müstəqil Azərbaycan dünya birliyində öz layiqli yerini tutub.
İcra başçısı çıxışında Milli Qurtuluş Gününün Azərbaycanın müstəqillik tarixinin ən şərəfli səhifələrindən biri olduğunu, bu tarixin ölkəmizin dünya birliyinə inteqrasiyası, beynəlxalq aləmdə layiqli yer tutması və bugünkü niliyyətlərimizlə nəticələndiyini vurğulayıb. Bildirilib ki, 44 günlük Vətən müharibəsində qazandığımız Zəfər məhz 1993-cü il iyunun 15-dən başlayaraq Azərbaycan naminə, ölkəmizin inkişafı və bütövlüyü uğrunda aparılan mübarizənin, yürüdülən siyasətin hərbi-siyasi yekunu, möhtəşəm nəticəsidir.
Tədbirdə Yeni Azərbaycan Partiyası Qax rayon təşkilatının sədr müavini İlkin Abbasov, rayon Mədəniyyət Mərkəzinin direktoru Kəmalə Məcidova, Əmbərçay kənd ümumi orta ümumi təhsil məktəbinin direktoru Rövşən Hədisov, Dövlət Sosial Müdafiə Fondunun 2 saylı Şəki-Zaqatala Regional Filialının Qax rayon qəbul şöbəsinin müdiri Şahin Qurbanov çıxış edərək, Ümummilli Liderin xalqımız qarşısındakı əvəzsiz xidmətlərindən ətraflı bəhs ediblər.
Tədbir bədii-musiqili proqramla başa çatıb.
Müxbir – Mustafa Dadaşov
Bölmənin digər xəbərləri
