Azərbaycan – Özbəkistan təhsil əməkdaşlığı: qarşılıqlı təşəbbüslər və yeni inkişaf perspektivləri
Bakı, 23 avqust, AZƏRTAC
Azərbaycan–Özbəkistan münasibətləri Prezident İlham Əliyevin uzaqgörən və ardıcıl siyasəti nəticəsində son illərdə strateji tərəfdaşlıq səviyyəsinə yüksəlib. İki ölkənin liderlərinin qarşılıqlı səfərləri siyasi, iqtisadi, humanitar və digər sahələrdə əməkdaşlığın daha da dərinləşməsinə mühüm töhfə verib. Bu münasibətlər sistemində təhsil sahəsində əməkdaşlıq da xüsusi əhəmiyyət daşıyır. Bu əməkdaşlıq konkret layihələr, məktəblər, tələbə mübadiləsi, universitetlərarası əlaqələr və birgə təşəbbüslərdə öz əksini tapır.
Bu fikirləri AZƏRTAC-a açıqlamasında Azərbaycan Respublikası Təhsil Cəmiyyətinin sədri Murad Ağalarov deyib. O, qeyd edib ki, bu əməkdaşlığın bariz nümunələrindən biri Özbəkistanın təşəbbüsü ilə Füzulidə inşa edilmiş Mirzə Uluqbəy adına 1 nömrəli tam orta məktəbdir. 960 şagird yerlik, müasir laboratoriya, informatika otaqları, idman və digər infrastruktura malik bu məktəb iki ölkə arasında dostluğun və qardaşlığın təhsil sahəsindəki real ifadəsidir.
“Azərbaycan da öz növbəsində Özbəkistanda təhsil əlaqələrinin inkişafına xüsusi diqqət ayırır. Bunun mühüm nümunələrindən biri 2025-ci ildə Daşkənddə keçirilmiş “Study in Azerbaijan” sərgisidir. Sərgidə Azərbaycanın 17 ali təhsil müəssisəsi iştirak edib və Özbəkistan gənclərinə ölkəmizdə təhsil imkanları, ixtisaslar və təqaüd proqramları təqdim olunub. Bu təşəbbüs Azərbaycan ali təhsilinin Özbəkistanda tanıdılması və tələbə mübadiləsinin genişləndirilməsi baxımından mühüm addımdır.
Eyni zamanda, 2024-cü ildə Azərbaycan ilə Özbəkistan arasında məktəbəqədər və ümumi təhsil sahəsində əməkdaşlıq haqqında, eləcə də peşə, orta ixtisas, ali təhsil və elm sahələrində əməkdaşlıq haqqında protokollar imzalanıb. 2025-ci ildə isə elm, peşə təhsili və ali təhsil sahələrində əməkdaşlığa dair hökumətlərarası saziş təsdiq edilib. Bu sənədlər əməkdaşlığın hüquqi bazasını daha da gücləndirir. Qarşıdakı dövrdə STEAM, müəllim hazırlığı, peşə təhsili, ali təhsil, elmi tədqiqatlar və tələbə mübadiləsi üzrə birgə layihələrin artırılması üçün ciddi imkanlar yaranır. 2026-cı ilin iyulunda keçirilən görüşlərdə də Azərbaycan ilə Özbəkistan məktəbləri arasında STEAM təhsilinin təşviqi, Azərbaycan və özbək dillərinin qarşılıqlı tədrisi, universitetlərarası əməkdaşlığın genişləndirilməsi və birgə elmi-tədqiqat fondunun yaradılması məsələləri müzakirə olunub”, - M.Ağalarov bildirib.
O əlavə edib ki, hazırda bu əməkdaşlığın nəticəsini tələbə mobilliyində də görmək mümkündür. 2025–2026-cı tədris ilində xeyli sayda Özbəkistan vətəndaşı Azərbaycanda və Azərbaycan vətəndaşı isə Özbəkistanda təhsil alıb. Bu, iki ölkənin gəncləri arasında təhsil əlaqələrinin artıq real və qarşılıqlı xarakter daşıdığını göstərir.
Prezident İlham Əliyevin Azərbaycan–Özbəkistan münasibətlərinin inkişafına göstərdiyi xüsusi diqqət təhsil sahəsində də yeni təşəbbüslərin həyata keçirilməsi üçün mühüm zəmin yaradır. Qarşılıqlı təcrübə mübadiləsinin genişləndirilməsi, birgə təhsil layihələrinin həyata keçirilməsi və innovativ istiqamətlər üzrə əməkdaşlığın gücləndirilməsi bu əlaqələrin gələcək inkişafında mühüm rol oynayacaq.
Azərbaycan və Özbəkistanı birləşdirən tarixi, mədəni və mənəvi bağlar təhsil sahəsində əməkdaşlığın daha da dərinləşdirilməsi üçün möhkəm əsasdır. Bu baxımdan, iki ölkənin təhsil sahəsində atdığı hər bir addım yalnız bugünkü əməkdaşlığa deyil, həm də gələcək nəsillər arasında əlaqələrin daha da möhkəmlənməsinə xidmət edir.
Müxbir: Xatirə Cəfərova
Bölmənin digər xəbərləri
