Azərbaycan alimləri Stenford Universitetinin reytinq qiymətləndirmə siyahısına daxil edilib
Bakı, 15 noyabr, AZƏRTAC
ABŞ-ın Stenford Universiteti bu ilin oktyabr ayında dünyanın ən nüfuzlu alimlərinin reytinq qiymətləndirmə siyahısını dərc edib. Bu reytinq siyahısı iki mühüm göstərici - məqalə və istinadların sayı əsasında hazırlanır. İlkin mərhələdə 2020-ci ildə ən azı 5 məqaləsi “Scopus” bazasında indeksləşən alimlər seçilir. Sonrakı mərhələdə isə bu seçilmişlərin arasından həmin ildə ən çox istinad alan, başqa sözlə, ilk 2 faizə daxil olan alimlərin adı reytinq siyahısına daxil edilir.
Builki siyahıya Azərbaycanda və xaricdə fəaliyyət göstərən 25-dən çox azərbaycanlı alimin adı daxil edilib. Onlardan 8-i ölkəmizdə, digərləri isə Türkiyə, ABŞ, Avstraliya, Portuqaliya, Rusiya və s. ölkələrdə fəaliyyət göstərir. Azərbaycanda fəaliyyət göstərən və adı siyahıya daxil edilmiş 8 alimdən 5-i AMEA-nın əməkdaşıdır. Bu 5 alimdən 2-si isə İnformasiya Texnologiyaları İnstitutunun əməkdaşıdır.
İnstitutdan AZƏRTAC-a bildirilib ki, bunlar baş direktor, AMEA-nın vitse-prezidenti, akademik Rasim Əliquliyev və şöbə müdiri, AMEA-nın müxbir üzvü Ramiz Alıquliyevdir. Hər iki alim “İnformasiya və kommunikasiya texnologiyaları” elmi istiqaməti üzrə çalışan və məqalələri “Scopus” bazasında indeksləşən 253359 alim arasından seçilib.
Qeyd edək ki, AMEA-nın müxbir üzvü Ramiz Alıquliyev 2020-ci ildə də Stenford Universitetinin reytinq qiymətləndirmə siyahısına daxil olunub.
Bölmənin digər xəbərləri
