AZƏRBAYCAN AVROPA YENİDƏNQURMA VƏ İNKİŞAF BANKI İLƏ ƏLAQƏLƏRİN İNKİŞAFINA BÖYÜK ÖNƏM VERİR
AZƏRTAC xəbər verir ki, bu fikir iqtisadi inkişaf naziri Heydər Babayevin Avropa Yenidənqurma və İnkişaf Bankının (AYİB) Qafqaz ölkələri, Moldova və Belarus üzrə direktoru Maykl Devi ilə görüşündə səslənmişdir.
Tədbirdə H.Babayev AYİB ilə əməkdaşlığın hər iki tərəf üçün faydalı olduğunu vurğulamış, bu əlaqələrin daha da möhkəmlənəcəyinə əminliyini bildirmişdir. Azərbaycanda beynəlxalq maliyyə qurumları, o cümlədən AYİB-lə əlaqələrin inkişafına böyük önəm verildiyi diqqətə çatdırılmışdır.
Bildirilmişdir ki, indiyədək AYİB-in maliyyə dəstəyi ilə dövlət və özəl sektorda bir sıra layihələr həyata keçirilmiş, yerli özəl banklara kredit xətləri ayrılmışdır. Azərbaycan tərəfi bundan sonra da AYİB ilə əlaqələrin genişləndirilməsində maraqlıdır.
AYİB-in Qafqaz ölkələri, Moldova və Belarus üzrə direktoru Maykl Devi Azərbaycanda sahibkarlığın inkişafı, biznes mühitinin yaxşılaşdırılması istiqamətində atılan addımların bankın diqqət mərkəzində olduğunu vurğulamışdır.
Tədbirdə Azərbaycanda yeni sement zavodunun və Müstəqil Elektrik Stansiyasının (MES) tikintisi və bu sahədə AYİB-in iştirakı məsələləri də müzakirə olunmuşdur. Tikinti sektorunun inkişafı ilə əlaqədar sementə olan tələbatın artması və sement bazarında azad rəqabətin genişlənməsi baxımından yeni zavodun tikintisinin zəruriliyi söylənilmişdir.
######
