AZƏRBAYCAN-ÇİN DOSTLUQ VƏ ƏMƏKDAŞLIQ CƏMİYYƏTİNİN İNTERNET SƏHİFƏSİ AÇILMIŞDIR
Azərbaycan-Çin Dostluq və Əməkdaşlıq Cəmiyyətinin İnternet səhifəsinin açılması dost Çin və Azərbaycan xalqlırı arasında informasiya mübadiləsində daha bir mühüm addımdır.
Səhifənin redaktoru, Cəmiyyətin məsul katibi Rafiq Abbasov AZƏRTAC-ın müxbiri ilə söhbətində materialların hazırlanmasında göstərdiyi köməyə görə Cəmiyyətin prezidenti, akademik Cəlal Əliyevə, Çinin Azərbaycandakı səfiri Çjan Siyuna, idarə heyətinin üzvlərinə təşəkkürünü bildirərək demişdir ki, gələcəkdə səhifənin materiallarını Çin dilində də hazırlamaq nəzərdə tutulur.
Yeni səhifə abonentlərə siyasətçilərin və mədəniyyət xadimlərinin daxil olduğu Cəmiyyətin fəaliyyəti ilə, müxtəlif sahələrdə dinamik inkişaf edən Azərbaycan-Çin münasibətlərindəki yeniliklərlə tanış olmağa imkan verir. Burada Azərbaycan Prezidenti Heydər Əliyevin 1994-cü ilin martında ÇXR-ə rəsmi səfəri, orada imzalanmış sənədlər və dövlətimizin başçısının Çin rəhbərləri ilə görüşləri barədə ətraflı məlumat var. Cəmiyyətin prezidenti Cəlal Əliyevin bu il ölkəmizdə səfərdə olmuş Çin nümayəndə heyətinin üzvləri ilə görüşləri haqqında xəbər də maraqlıdır.
Bundan əlavə, səhifənin köməyi ilə iki ölkənin iqtisadi, elmi və mədəni əməkdaşlığı barədə də məlumat almaq olar, Çin dilinin incəlikləri ilə maraqlananlar üçün isə “Çin dilini öyrənirik” guşəsi var.
Bölmənin digər xəbərləri
