AZƏRBAYCAN DÖVLƏT AKADEMİK MİLLİ DRAM TEATRININ YARADICI HEYƏTİ TATARISTAN RESPUBLİKASINA QASTROL SƏFƏRİNƏ GEDƏCƏK
AZƏRTAC xəbər verir ki, Azərbaycan Dövlət Akademik Milli Dram Teatrının yaradıcı heyəti aprelin 16-dan 22-dək Kazan şəhərində qastrol səfərində olacaqdır.
Kollektivi Kazan teatrsevərlərinə rejissor, əməkdar incəsənət xadimi Bəhram Osmanovun səhnələşdirdiyi xalq yazıçısı Elçinin “Arılar arasında” və yazıçı-dramaturq Əli Əmirlinin “Mesenat” tamaşalarını təqdim edəcəkdir.
Teatr Tatarıstanda ölkəmizin tanınmış sənətkarları xalq artistləri Nurəddin Mehdixanlı, Şükufə Yusupova, Firəngiz Mütəllimova, İlham Əsgərov, əməkdar artistlər Cəfər Namiq Kamal, Kazım Abdullayev, Elxan Quliyev, Mehriban Xanlarova, Mətanət Atakişiyeva, Sənubər İskəndərova, Kazım Həsənquliyev, Münəvvər Əliyeva və Əli Əmirli ilə təmsil olunacaqdır. Ümumilikdə isə teatrın direktoru, əməkdar mədəniyyət işçisi Maqbet Bünyadovun rəhbərliyi ilə nümayəndə heyətinin tərkibi 40 nəfərə yaxındır.
Bu tədbir qardaş Azərbaycan və tatar xalqları arasında zəngin mədəni əlaqələrin bərpa olunması və genişləndirilməsi istiqamətində daha bir mühüm və məsuliyyətli addımdır. Gələcəkdə xalqlarımız arasında mədəniyyət sahəsində belə mübadilələrin sistemli şəkildə təşkil olunması nəzərdə tutulmuşdur.
Bölmənin digər xəbərləri
