AZƏRBAYCAN İLƏ AVROPA ŞURASI ARASINDA MÜNASİBƏTLƏR YÜKSƏK SƏVİYYƏDƏDİR
Milli Məclisin beynəlxalq münasibətlər və parlamentlərarası əlaqələr daimi komissiyasının sədri, Avropa Şurası Parlament Assambleyasındakı (AŞPA) daimi nümayəndə heyətinin rəhbəri Səməd Seyidov AZƏRTAC-a bildirmişdir ki, beynəlxalq təşkilatların, o cümlədən Avropa Şurasının Azərbaycana marağı getdikcə artır.
Azərbaycanın sürətli inkişafı, Avropanın enerji təhlükəsizliyindəki rolu, antiterror əməliyyatlarındakı iştirakı hamının diqqət mərkəzindədir. Avropa Şurası kimi nüfuzlu bir təşkilatın ölkəmizə münasibəti müsbət mənada tam dəyişmişdir və indi Azərbaycanda demokratiyanın inkişafı, fikir və söz azadlığının, insan hüquqları və azadlıqlarının qorunması səviyyəsi, tolerantlıq digər dövlətlərə nümunə göstərilir.
S.Seyidov demişdir ki, Azərbaycanın Avropa Şurası qarşısında götürdüyü öhdəliklərin icrası ilə bağlı heç bir problem yoxdur. Onların, demək olar ki, hamısı yerinə yetirilmişdir. Azərbaycan Ermənistan tərəfindən təcavüzə məruz qalmışdır və biz hələ də müharibə şəraitindəyik. Ona görə də bəzi xırda məsələlər qalmaqdadır. Bunu Avropa Şurasında da başa düşürlər və münaqişənin tezliklə Azərbaycanın ərazi bütövlüyü çərçivəsində, beynəlxalq hüquq normaları əsasında həlli üçün addımlar atılır. AŞPA-nın yaz sessiyasında qəbul olunmuş qətnamədə də Azərbaycanın ərazi bütövlüyü bir daha təsdiqlənmişdir və Ermənistan silahlı qüvvələrinin torpaqlarımızdan qeyd-şərtsiz çıxarılması tələb olunur.
Bölmənin digər xəbərləri
