MƏDƏNİYYƏT
Azərbaycan ilə Özbəkistan arasında mədəniyyət sahəsində əməkdaşlığın genişləndirilməsinə dair müzakirələr aparılıb
Daşkənd, 22 fevral, AZƏRTAC
Özbəkistan mədəniyyət nazirinin köməkçisi Marufjon Yuldaşev Daşkənddəki Heydər Əliyev adına Azərbaycan Mədəniyyət Mərkəzinin (AMM) direktoru Samir Abbasovla görüşüb.
AZƏRTAC xəbər verir ki, Samir Abbasovun dəvəti ilə baş tutan görüşdə əməkdaşlığın daha da genişlənməsinə dair təkliflərin hazırlanması, tədbir və layihələrin reallaşdırılması məqsədilə yaxın günlərdə Özbəkistanın mədəniyyət naziri ilə Mədəniyyət Mərkəzinin direktoru arasında görüşün keçirilməsi razılaşdırılıb.
S.Abbasov xalqlarımızın tarixi dostluğu, ölkələrimiz arasında yüksək səviyyəli münasibətlər, mədəniyyət sahəsində əməkdaşlıq haqqında danışaraq, ötən ilin Azərbaycan üçün olduqca əhəmiyyətli və tarixi hadisələrlə yaddaqalan olduğunu qeyd edib. O, Azərbaycanın 44 günlük Vətən müharibəsi apardığını, 30 ilə yaxın işğal altında qalan torpaqlarını azad etdiyini qeyd edib. O, işğal nəticəsində şəhərlərin yer üzündən silindiyini, tarixi abidələrimizin, mədəni irsimizin, dini ocaqlarımızın erməni vandalları tərəfindən tamamilə dağıdıldığını vurğulayıb. O, Azərbaycan mədəniyyətinin paytaxtı, Qafqazın konservatoriyası olan Şuşa şəhəri, onun dünya mədəniyyətinə, sənətinə verdiyi töhfələr barədə danışıb, dövlət başçısının göstərişi və birbaşa rəhbərliyi ilə Şuşanın tamamilə bərpası, əvvəlki şöhrətinin özünə qaytarılması, habelə bütün azad olunmuş bölgələrdə geniş quruculuq işlərinə start verildiyini qeyd edib.
S.Abbasov bu il Azərbaycanda Prezident İlham Əliyevin müvafiq Sərəncamı ilə “Nizami Gəncəvi İli” elan edildiyini və il ərzində Özbəkistanda Azərbaycan səfirliyi və AMM tərəfindən dahi şairlərimiz Nizami Gəncəvinin 880, Əlişir Nəvainin 580 illik yubileyləri münasibətilə tədbirlərin həyata keçiriləcəyini bildirib.
Marufjon Yuldaşev Mədəniyyət Mərkəzinin aktiv fəaliyyətini xüsusi qeyd edib, xarici ölkələrin təmsilçiləri arasında AMM-in ilk dəfə olaraq Özbəkistanın paytaxtı ilə yanaşı, Səmərqənd, Xivə, Urgənc, Fərqanə, Namanqan, Gülüstan şəhərlərində mədəniyyət və ədəbiyyat günləri keçirdiyini, Azərbaycanın İsmayıllı, Özbəkistanın Fərqanə vilayətinin Riştan şəhərləri arasında “Qardaşlaşmış şəhərlər” müqaviləsinin imzalandığını qeyd edib. M.Yuldaşev Özbəkistan Mədəniyyət Nazirliyinin bu il ərzində də birgə mədəni layihələrin həyata keçirilməsi, əməkdaşlığın daha da genişləndirilməsində maraqlı olduğunu və yaxın günlərdə qeyd olunan məsələlərin müzakirəsi məqsədi ilə nazir Azadbek Nazarbekovla görüşün keçirilməsini təklif edib.
Samir Abbasov bu il ərzində Özbəkistanın Buxara Vilayəti və Qaraqalpaqstan Respublikasında Azərbaycan mədəniyyət və ədəbiyyat günlərinin keçirilməsinin planlaşdırıldığını qeyd edib. İki ölkənin şəhərləri və mədəniyyət ocaqları arasında əməkdaşlıq əlaqələrinin və “qardaşlaşmış şəhərlər, müəssisələr” haqqında müqavilələrin imzalanması, Mədəniyyət Mərkəzində yenidənqurmadan sonra “Azərbaycan-Özbəkistan Dostluq Muzeyi”nin açılması, Azərbaycanda keçiriləcək “Xarı bülbül” Beynəlxalq Musiqi Festivalı və “Vaqif Poeziya günləri”ndə özbək sənətçilərin, Özbəkistanda keçiriləcək “Şərq təranələri”, “Şəhrisəbz” Beynəlxalq Makom festivallarında Azərbaycan sənətçilərinin iştirakı, habelə Nizami Gəncəvi, Əlişir Nəvaiyə dair Özbəkistan, Azərbaycan və Türkiyədə saxlanılan əlyazmaların, miniatürlərın surətlərinin Daşkənddə geniş təqdimatının keçirilməsi və s. barədə təkliflərin olduğunu və bu məsələlərin Özbəkistan mədəniyyət naziri ilə keçiriləcək görüşdə müzakirə ediləcəyini bildirib.
Daha sonra Samir Abbasov Marufjon Yuldaşevla birgə Mərkəzin Heydər Əliyev muzeyi və Azərbaycan tarixi muzeyinə baxıblar. Qonağa Azərbaycan xalqının ümummilli lideri Heydər Əliyevin xalqımız qarşısında xidmətləri, müstəqil Azərbaycanın keçdiyi tarixi yol, Prezident İlham Əliyevin rəhbərliyi ilə ölkəmizin əldə etdiyi nailiyyətlərə dair məlumat verilib. Qonaq “Nizami Gəncəvi İli” ilə əlaqədar Mərkəzin foyesində hazırlanan kompozisiya və sərgi ilə də tanış olub.
Sonda Samir Abbasov qonağı yaxın zamanlarda açılışı nəzərdə tutulan “Azərbaycan-Özbəkistan Dostluq Muzeyi” ilə də tanış edib.
Qulu Kəngərli
AZƏRTAC-ın xüsusi müxbiri
Daşkənd