Azərbaycan ilə Serbiya arasında əməkdaşlığın perspektivləri müzakirə olunub
Belqrad, 10 iyun, AZƏRTAC
Azərbaycanın Serbiyadakı səfiri Eldar Həsənov bu ölkənin Baş naziri Aleksandar Vuçiç ilə görüşüb.
Söhbət zamanı ölkələrimiz arasında müxtəlif sahələrdə əməkdaşlığın bundan sonra da inkişaf etdirilməsinə dair fikir mübadiləsi aparılıb. Qeyd olunub ki, xüsusilə iqtisadi əlaqələr, birgə həyata keçirilən infrastruktur layihələri, rəsmilərin qarşılıqlı səfərləri Azərbaycan ilə Serbiya arasında münasibətlərin daha da genişlənməsinə təkan verir.
A.Vuçiç Serbiya Prezidenti Tomislav Nikoliçin “Bakı-2015” ilk Avropa Oyunlarının açılış mərasimində iştirak edəcəyini vurğulayaraq həm serb, həm də Azərbaycan idmançılarına bu möhtəşəm idman yarışmasında uğurlar arzulayıb.
Görüşdə A.Vuçiç Prezident İlham Əliyevin Serbiyaya diqqət və dəstəyini yüksək qiymətləndirib. Eyni zamanda, dövlətimizin başçısını bu ilin sonunadək onun çox sevildiyi Serbiyada görməkdən məmnun olacaqlarını deyib.
Maqsud Dadaşov
AZƏRTAC-ın xüsusi müxbiri
Belqrad
Bölmənin digər xəbərləri
