AZƏRBAYCAN-İRAN SƏNƏDLƏRİNİN İMZALANMASI
“Azərenerji” Səhmdar Cəmiyyəti və İran İxrac İnkişaf Bankı arasında İmişli-Əli Bayramlı-Astara elektrik verilişi xətlərinin və yarımstansiyaların layihələşdirilməsi və tikintisinin maliyyələşdirilməsi üzrə maliyyə müqaviləsini Azərbaycan tərəfindən maliyyə naziri Əvəz Ələkbərov, “Azərenerji” Səhmdar Cəmiyyətinin prezidenti Etibar Pirverdiyev, İran tərəfindən İran İxrac İnkişaf Bankının prezidenti və idarəedici direktoru Novruz Kohzadi, “Azəriqaz” Qapalı Səhmdar Cəmiyyəti və İran Milli Qaz Satışı Şirkəti arasında təbii qaz mübadiləsi üzrə müqaviləni Azərbaycan tərəfindən iqtisadi inkişaf naziri Fərhad Əliyev, “Azəriqaz” Qapalı Səhmdar Cəmiyyətinin prezidenti Əlixan Məlikov, İran tərəfindən İran Qaz Satışı Şirkətinin prezidenti Davud Qasımzadə imzaladılar.
Azərbaycanın ekologiya və təbii sərvətlər naziri Hüseynqulu Bağırov və İranın xarici işlər naziri Kamal Xərrazi Azərbaycan Respublikasının Ekologiya və Təbii Sərvətlər Nazirliyi və İran İslam Respublikasının ətraf mühit departamenti arasında anlaşma memorandumunu imzaladılar. Azərbaycan Respublikası hökuməti və İran İslam Respublikası hökuməti arasında mədəniyyət sahəsində əməkdaşlıq haqqında sazişi Azərbaycan tərəfindən mədəniyyət naziri Polad Bülbüloğlu, İran tərəfindən xarici işlər naziri Kamal Xərrazi, Azərbaycan Respublikası və İran İslam Respublikası dəmir yolları arasında əməkdaşlıq haqqında protokolu Azərbaycan tərəfindən nəqliyyat naziri Ziya Məmmədov, İran tərəfindən yol və nəqliyyat nazirinin müavini Səid Nejat, Azərbaycan Respublikasının Nəqliyyat Nazirliyi və İran İslam Respublikasının Nəqliyyat Nazirliyi arasında nəqliyyat sahəsində əməkdaşlıq haqqında memorandumu Azərbaycan tərəfindən nəqliyyat naziri Ziya Məmmədov, İran tərəfindən yol və nəqliyyat nazirinin müavini Səid Nejat, Azərbaycan Respublikası hökuməti və İran İslam Respublikası hökuməti arasında Astara-Bakı yolunun maliyyələşdirilməsinə dair memorandumu Azərbaycan tərəfindən nəqliyyat naziri Ziya Məmmədov, İran tərəfindən İran İxrac İnkişaf Bankının prezidenti və idarəedici direktoru Novruz Kohzadi imzaladılar.
Azərbaycanın iqtisadi inkişaf naziri Fərhad Əliyev və İranın kooperasiya naziri Əli Sufi Azərbaycan Respublikası hökuməti və İran İslam Respublikası hökuməti arasında sərhədyanı ticarət sahəsində memorandumu, Azərbaycan Respublikası hökuməti və İran İslam Respublikası hökuməti arasında ticarət sazişini Azərbaycan tərəfindən iqtisadi inkişaf naziri Fərhad Əliyev, İran tərəfindən isə ticarət nazirinin müavini Müştəba Xosrovtac imzaladılar.
Sonra Azərbaycanın daxili işlər naziri Ramil Usubov və İran İslam Respublikasının daxili işlər naziri Əbdülvahid Musəvi Lari Azərbaycan Respublikası hökuməti ilə İran İslam Respublikası hökuməti arasında təhlükəsizlik və hüquq mühafizə fəaliyyəti sahəsində əməkdaşlıq haqqında sazişi imzaladılar.
Sənədlərin imzalanma mərasimində Prezident Administrasiyasının rəhbəri Ramiz Mehdiyev, Naxçıvan MR Ali Məclisinin sədri Vasif Talıbov, xarici işlər naziri Elmar Məmmədyarov, Azərbaycanın Tehrandakı səfiri Abbasəli Həsənov, İranın Bakıdakı səfiri Əhəd Qəzai, İran nümayəndə heyətinin üzvləri və digər rəsmi şəxslər iştirak edirdilər.
Bölmənin digər xəbərləri
