Azərbaycan İstiqlal Muzeyi beynəlxalq videomüsabiqədə mükafata layiq görülüb
Bakı, 21 noyabr, AZƏRTAC
Azərbaycan İstiqlal Muzeyi 2018-ci ildə Rusiya Federasiyası Qələbə Muzeyi ilə imzaladığı memoranduma uyğun olaraq qarşılıqlı əməkdaşlıq etmiş müxtəlif layihələr çərçivəsində sərgi və yarışmalarda iştirak edib.
AZƏRTAC xəbər verir ki, Qələbə Muzeyi tərəfindən “Muzeylər Qələbə haqqında” beynəlxalq videomüsabiqə keçirilib. Azərbaycan İstiqlal Muzeyi qeyd olunan yarışmada videoçarxla iştirak edib. Qələbə Muzeyinə Azərbaycan, Rusiya, Belarus, Qazaxıstan və Moldovanın 120-dən çox muzeyindən XX əsrin ortalarında hərb tarixinin hadisələri ilə bağlı muzey ekspozisiyalarından bəhs edən 130-dan çox videoçarx daxil olub. Müsabiqənin məqsədi İkinci Dünya müharibəsi illərində sovet xalqının hərbi və əmək şücaətinə aid muzey ekspozisiyalarını təbliğ etməkdir.
Qələbə Muzeyinin rəsmi internet saytında onlayn səsvermə keçirilib və bu səsvermədə 60 mindən çox internet istifadəçisi muzey videolarına səs verib. Onlayn səsvermənin nəticələrinə əsasən “Tamaşaçıların seçimi” mükafatı 10 mindən çox səs toplayan Azərbaycan İstiqlal Muzeyinə verilib.
Bölmənin digər xəbərləri
