AZƏRBAYCAN-MƏRAKEŞ AQRAR ƏLAQƏLƏRİ MÖHKƏMLƏNDİRİLİR
AZƏRBAYCANIN KƏND TƏSƏRRÜFATI NAZİRİ BU ÖLKƏDƏ SƏFƏRDƏDİR
Azərbaycan Respublikasının Mərakeş Krallığındakı Səfirliyindən AZƏRTAC-a bildirmişlər ki, kənd təsərrüfatı naziri İsmət Abasovun rəhbərlik etdiyi nümayəndə heyəti aprelin 16-dan bu ölkədə səfərdədir.
Aprelin 17-də İsmət Abasov həmkarı - Krallığın kənd təsərrüfatı, kəndlərin inkişafı və dəniz balıqçılığı naziri Mohand Laenserlə görüşmüşdür. Görüş zamanı iki ölkə arasında kənd təsərrüfatı sahəsində əlaqələrin inkişaf etdirilməsinin vacibliyi vurğulanmış, bu əməkdaşlığın inkişaf etdirilməsi üçün baza rolunu oynayacaq “Azərbaycan Respublikası Kənd Təsərrüfatı Nazirliyi və Mərakeş Krallığının Kənd Təsərrüfatı, Kəndlərin inkişafı və Dəniz Balıqçılığı Nazirliyi arasında Əməkdaşlıq haqqında Saziş” imzalanmışdır.
Həmin gün İsmət Abasov İslam Ölkələri Təhsil, Elm və Mədəniyyət Təşkilatının (İSESKO) Baş direktoru Əbdüləziz bin Osman Əl Tuveycri, ölkənin xarici ticarət naziri Mustafa Meşahuri, sənaye və ticarət naziri Səlahəddin Mezuarla görüşlər keçirmişdir. Görüşlər zamanı iki ölkə arasında müxtəlif sahələrdə əlaqələrin inkişaf etdirilməsi məsələləri müzakirə olunmuş, müvafiq sahələrdə potensial əməkdaşlıq imkanlarının mövcud olduğu vurğulanmış, bu imkanlar barədə fikir mübadiləsi aparılmışdır.
Səfər yerli kütləvi informasiya vasitələrində geniş işıqlandırılır.
Görüşlərdə Azərbaycanın Mərakeş Krallığındakı səfiri Sabir Ağabəyov iştirak etmişdir.
Səfər aprel ayının 21-dək davam edəcəkdir.
Bölmənin digər xəbərləri
