Azərbaycan-Özbəkistan iqtisadi tərəfdaşlığı yeni imkanlar açır ŞƏRH
Bakı, 22 avqust, AZƏRTAC
Azərbaycanla Özbəkistan arasında ticari-iqtisadi və investisiya əməkdaşlığı son illərdə dinamik inkişaf edir. Prezident İlham Əliyevin Özbəkistan Milli İnformasiya Agentliyinə verdiyi müsahibədə səsləndirilən göstəricilər də iki ölkə arasında iqtisadi tərəfdaşlığın getdikcə daha geniş və çoxşaxəli xarakter aldığını göstərir.
Bu fikirləri AZƏRTAC-a açıqlamasında Milli Məclisin deputatı Sevinc Fətəliyeva deyib.
O bildirib ki, 2025-ci ildə iki ölkə arasında ticarət dövriyyəsi əvvəlki illə müqayisədə üç dəfədən çox artaraq 795 milyon ABŞ dolları təşkil edib. 2026-cı ilin yanvar-may aylarında isə ticarət dövriyyəsi ötən ilin müvafiq dövrü ilə müqayisədə daha 33 faiz artaraq 144 milyon dollara çatıb. İqtisadi əlaqələrin inkişafında artıq 15 iclası keçirilmiş Hökumətlərarası Komissiya mühüm rol oynayır. Bu yaxınlarda Daşkənddə keçirilən növbəti iclasda iqtisadi əməkdaşlığın mövcud vəziyyəti, əldə olunan nəticələr və gələcək inkişaf istiqamətləri geniş müzakirə edilib. İnvestisiya əməkdaşlığının inkişafında əsas platformalardan biri üç il əvvəl ümumi kapitalı 500 milyon ABŞ dolları həcmində müəyyənləşdirilən Azərbaycan–Özbəkistan İnvestisiya Şirkətidir. Şirkət hər iki ölkədə iqtisadiyyatın müxtəlif sahələrində perspektiv layihələrin maliyyələşdirilməsinə və həyata keçirilməsinə mühüm töhfə verir.
“İki ölkə arasında əməkdaşlığın mühüm istiqamətlərindən biri energetika sektorudur. Özbəkistanın OZLITINEFTGAZ institutu və SOCAR NIPI Neftqazın bazasında yaradılmış “Neftqaztexnologiya” birgə müəssisəsi 2016-cı ildən neft-qaz sahəsində fəaliyyət göstərir. 2024-cü ildə isə SOCAR və “Uzbekneftqaz” tərəfindən “Turan Energy AFEZCO” birgə müəssisəsi yaradılıb. Müəssisə “Azərikimya” İstehsalat Birliyində istehsal olunan yüksək təzyiqli polietilenin Özbəkistana ixracını həyata keçirir.
Yaşıl energetika sahəsində əməkdaşlıq da ardıcıl şəkildə genişlənir. 2025-ci ildə Bakıda Azərbaycan, Qazaxıstan və Özbəkistanın energetika sahəsi üzrə müvafiq qurumları tərəfindən “Green Corridor Union” Məhdud Məsuliyyətli Cəmiyyəti təsis edilib. Birgə müəssisənin yaradılmasında əsas məqsəd Azərbaycan–Mərkəzi Asiya yaşıl enerji dəhlizi layihəsinin həyata keçirilməsinin əlaqələndirilməsi, bərpaolunan enerjinin ixracı və onun Xəzər dənizinin dibi ilə nəqli imkanlarının reallaşdırılmasıdır”, - deyə S.Fətəliyeva bildirib.
Onun sözlərinə görə, ölkələr arasında tranzit daşımaların həcmində də artım müşahidə olunur. 2025-ci ildə daşımaların həcmi 6,7 faiz artaraq 1,4 milyon tona çatıb, cari ilin yanvar-iyun aylarında isə 12,2 faizlik artım qeydə alınaraq 675 min ton təşkil edib. Perspektivli istiqamətlərdən biri Çin–Qırğızıstan–Özbəkistan dəmir yolunun Orta Dəhliz və TRIPP marşrutu ilə inteqrasiyasıdır. Bu inteqrasiya bütövlükdə region üçün yeni iqtisadi və tranzit imkanlarının yaranmasına mühüm töhfə verə bilər.
“Birgə layihələr sırasında işğaldan azad edilmiş Füzuli rayonunda 100 hektar sahədə “Bağı Dostluq” nar bağının salınması, eləcə də “Chevrolet” və “Isuzu” markalı nəqliyyat vasitələrinin istehsalı sahəsində əməkdaşlıq xüsusi yer tutur. Azərbaycanda Özbəkistan investisiyalı 130-dan çox kommersiya təşkilatı qeydiyyatdan keçib. Bu şirkətlər sənaye, kənd təsərrüfatı, tikinti, nəqliyyat və xidmət sahələrində fəaliyyət göstərirlər. Prezident İlham Əliyevin qeyd etdiyi kimi, Özbəkistan şirkətlərinin Azərbaycandakı fəaliyyəti qarşılıqlı etimadın, əlverişli investisiya mühitinin və iki ölkə arasında möhkəm iqtisadi tərəfdaşlığın göstəricisidir” , - deyə deputat əlavə edib.
Sevinc Fətəliyeva qeyd edib ki, Azərbaycan da Özbəkistanda mühüm investisiya layihələri həyata keçirir. Bunlara “PASHA Holding” tərəfindən Daşkənddə “The Ritz-Carlton” brendi altında mehmanxana-yaşayış kompleksinin və Daşkənd vilayətində iri “Sea Breeze Uzbekistan” turizm-yaşayış kompleksinin inşası daxildir.
“Azərbaycanın və Özbəkistanın iqtisadi imkanları bir-birini tamamlayır və əməkdaşlığın yeni formatlarının formalaşdırılması üçün geniş imkanlar açır. Tərəflər Azərbaycan şirkətlərinin Özbəkistanda, Özbəkistan şirkətlərinin isə Azərbaycanda daha fəal iştirakını, həmçinin birgə istehsal və investisiya layihələrinin sayının artırılmasını dəstəkləyirlər. Azərbaycan ilə Özbəkistan arasında qarşılıqlı faydalı iqtisadi tərəfdaşlıq bundan sonra da uğurla inkişaf edəcək, yeni təşəbbüslərlə zənginləşəcək və müttəfiqlik münasibətlərinin mühüm dayaqlarından biri kimi hər iki ölkə xalqlarının maraqlarına xidmət edəcək”, - deyə deputat vurğulayıb.
Bölmənin digər xəbərləri
