Azərbaycan parlamenti nümayəndələrinin Malayziyaya səfəri zamanı qarşılıqlı əməkdaşlıq məsələləri müzakirə olunub
Kuala Lumpur, 18 noyabr, AZƏRTAC
Noyabrın 10-dan 16-dək Azərbaycan-Malayziya parlamentlərarası əlaqələr üzrə işçi qrupunun rəhbəri Mahir Aslanov və işçi qrupunun üzvü Mirkazım Kazımov Malayziyada işgüzar səfərdə olublar.
Azərbaycan nümayəndə heyətinin Malayziyanın müdafiə nazirinin müavini Dato Sri Mohd Johari Baharum ilə görüşündə Azərbaycan parlamenti nümayəndə heyətinin bu səfərinin iki ölkə arasında əlaqələrin daha da inkişafına töhfə verəcəyi əminliklə bildirilib, qarşılıqlı səfərlərin mövcud əməkdaşlığın genişləndirilməsinə zəmin yaratdığı vurğulanıb.
Nümayəndə heyətinin rəhbəri Mahir Aslanov Azərbaycan və Malayziya arasında əlaqələrə toxunaraq ölkəmizin müstəqilliyini bərpa etdikdən sonra müsəlman ölkələri, xüsusilə də Malayziya ilə əlaqələrin inkişaf etdirilməsinə önəm verdiyini qeyd edib. Bildirib ki, iki ölkə arasında rəsmi səfərlər əlaqələrin inkişafına mühüm töhfə verir. Hər iki ölkənin parlamentlərində fəaliyyət göstərən dostluq qrupları da bu əməkdaşlığa töhfələr verməyə çalışır.
Azərbaycanın Malayziyadakı səfiri Qaley Allahverdiyev Qafqaz regionunun ən qabaqcıl dövləti olan Azərbaycanın güclü orduya malik olduğunu və burada hərbi sənaye müəssisələrinin fəaliyyət göstərdiyini diqqətə çatdırıb. O, Malayziyanın hərbi sənaye sahəsində Asiya bölgəsində aparıcı ölkələrdən biri hesab edildiyini diqqətə çatdırıb, bu sahədə ikitərəfli əməkdaşlıq üçün böyük potensialın mövcudluğunu vurğulayıb.
Azərbaycan parlamentinin nümayəndə heyəti səfər çərçivəsində Malayziya Baş nazirinin ofisində parlament və qanunvericilik məsələləri üzrə nazir xanım Dato Sri Azlina Binti Dato Osman Said ilə də görüşüb. Nazir qarşılıqlı səfərlərin ikitərəfli əlaqələrin möhkəmlənməsində böyük rol oynadığını diqqətə çatdırıb.
Mahir Aslanov beynəlxalq təşkilatlar, o cümlədən BMT və İƏT çərçivəsində Azərbaycan ilə Malayziya arasında qarşılıqlı dəstək və əməkdaşlığın mövcud olduğunu qeyd edərək, bu əməkdaşlığın gələcəkdə də davam etdiriləcəyinə əmin olduğunu bildirib.
Səfir Qaley Allahverdiyev bir sıra beynəlxalq əhəmiyyətli iqtisadi layihələrin Azərbaycanın iştirakı ilə həyata keçirildiyini, ölkəmizin son illərdə beynəlxalq səviyyəli tədbirlərə ev sahibliyi etdiyini bildirib. Səfir, həmçinin 2017-ci ildə Bakıda keçiriləcək IV İslam Həmrəyliyi Oyunları barədə məlumat verərək, xanım naziri Oyunların açılış mərasimində iştiraka dəvət edib.
Nümayəndə heyəti səfər çərçivəsində Malayziyanın Nümayəndələr Palatasının spikeri Datuk Seri Panqlima Pandikar Amin Hj Mulia ilə də görüşüb.
Görüşdə Mahir Aslanov hazırkı səfərin Malayziya parlamentinin dəvəti ilə həyata keçirildiyini qeyd edərək, Malayziyada olduğu müddətdə nümayəndə heyətinə göstərilən diqqətə və qonaqpərvərliyə görə təşəkkürünü bildirib. Azərbaycan və Malayziya parlamentləri arasında əlaqələrə toxunan Mahir Aslanov Milli Məclisin sədri Oqtay Əsədovun 2012-ci ildə Malayziyaya rəsmi səfərindən sonra bu sahədə ikitərəfli əlaqələrin daha da inkişafına zəmin yarandığını qeyd edib. 2015-ci ildə Malayziya parlamentində parlamentlərarası dostluq qrupunun yaradılmasından sonra bu əlaqələrin daha fəallaşdığını bildirib.
Mahir Aslanov, həmçinin beynəlxalq təşkilatlar, o cümlədən BMT və İƏT çərçivəsində Azərbaycan ilə Malayziya arasında qarşılıqlı dəstək və əməkdaşlığın olduğunu qeyd edib. O, parlamentlər çərçivəsində də əməkdaşlığın həyata keçiriləcəyinə əmin olduğunu diqqətə çatdırıb. Deputat Milli Məclisin sədri Oqtay Əsədov tərəfindən Malayziya parlamentinin spikerinin ölkəmizə dəvət olunduğunu xatırladaraq, bu dəvətin yaxın zamanlarda həyata keçiriləcəyinə ümid etdiyini bildirib.
Nümayəndə heyətinin rəhbəri Ermənistan-Azərbaycan, Dağlıq Qarabağ münaqişəsi haqqında spikerə ətraflı məlumat verib, münaqişə ilə bağlı Malayziya parlamentində müzakirələrin aparılacağına və ona hüquqi qiymət veriləcəyinə əmin olduğunu vurğulayıb.
Azərbaycan-Malayziya parlamentlərarası əlaqələr üzrə işçi qrupunun üzvü Mirkazım Kazımov qonaqpərvərliyə görə Malayziya tərəfinə təşəkkürünü çatdırıb.
Milli Məclisin nümayəndə heyəti Malayziyaya işgüzar səfəri çərçivəsində Sabah ştatında da olub. Səfər zamanı nümayəndə heyəti ştatın parlamentinin spikeri Syed Abas Syed Ali ilə görüşüb. Görüşdə iki ölkə parlamentləri arasında əlaqələrin gələcək inkişaf istiqamətləri ətrafında fikir mübadiləsi aparılıb.
Spiker Syed Abas Syed qonaqlara Sabah ştatı və rəhbərlik etdiyi qanunvericilik orqanının fəaliyyəti barədə ətraflı məlumat verib. O, Sabah ştatında əlverişli biznes və turizm mühitinin olduğunu bildirərək Azərbaycan iş adamlarını bu regionla əlaqələr qurmağa çağırıb.
Mahir Aslanov Azərbaycanın tarixi, mədəniyyəti, turizm imkanları, iqtisadi potensialı haqqında geniş məlumat verib. O, həmçinin Syed Abas Syed Alini Milli Məclisin fəaliyyəti haqqında məlumatlandırıb.
Görüşdə Azərbaycan nümayəndə heyətinin hazırkı səfərinin iki ölkənin parlamentləri arasında əlaqələrin genişlənməsinə töhfə verəcəyinə əminlik ifadə olunub.
Mahir Aslanov Sabah ştatının parlamentinin spikerini Azərbaycana səfərə dəvət edib.
Azərbaycan nümayəndə heyəti Malayziyaya səfər çərçivəsində, həmçinin Melaka ştatında olub. Ştat parlamentinin spikeri Mohd Khalil Yaakob ilə görüşdə parlamentlərarası əlaqələrin gələcək inkişaf istiqamətləri ətrafında fikir mübadiləsi aparılıb.
Vüqar Ağayev
AZƏRTAC-ın xüsusi müxbiri
Kuala Lumpur
Bölmənin digər xəbərləri
