AZƏRBAYCAN PREZİDENTİ HEYDƏR ƏLİYEV “2002-Cİ İLİN ADAMI”DIR
ANS Müstəqil Yayım və Media Şirkətinin və Çingiz Mustafayev Fondunun keçirdiyi ənənəvi sorğu nəticəsində Azərbaycan Respublikasının Prezidenti Heydər Əliyev “2002-ci ilin adamı” elan edilmişdir. Şirkətdən AZƏRTAC-a daxil olmuş məlumatda deyilir ki, dövlətimizin başçısının fəaliyyətini nəzərdən keçirən ekspertlər bir neçə çoxillik problemin həlli üçün əlverişli şərait yaratdığına görə Prezident Heydər Əliyevi ilin adamı seçmişlər. Məhz 2002-ci ildə Bakı-Tbilisi-Ceyhan ixrac boru kəmərinin təməli qoyulmuşdur. Azərbaycan-Gürcüstan-Türkiyə təhlükəsizlik sisteminin əsasının qoyulması da yola saldığımız ilə təsadüf edir. Keçən il Azərbaycan və İran arasında dostluq və əməkdaşlıq haqqında müqavilə imzalanmışdır. Qəbələ PLS-in statusu da 2002-ci ildə müəyyənləşdirilmişdir. Həmin ildə Bakı və Moskva Xəzərin dibinin bölünməsi barədə saziş imzalamışlar.
İlin adamı mükafatını Prezident Heydər Əliyevə yanvar ayının birinci ongünlüyündə təqdim etmək nəzərdə tutulur.
Bölmənin digər xəbərləri
