Azərbaycan Respublikasının Prezidenti Heydər Əliyev iyunun 3-də Prezident sarayında Böyük Britaniya parlamentinin Lordlar palatasının üzvləri lord Altonu, lord Hiltonu və lord Əhmədi qəbul etmişdir. 

Dövlətimizin başçısı Heydər Əliyev qonaqları səmimiyyətlə salamlayaraq, onların Azərbaycana səfərinin əhəmiyyətli olduğunu, keçirdikləri görüşlər və ölkəmizlə tanışlığın yaxşı təəssürat bağışladığı barədə məlumatı olduğunu vurğuladı.

Lord Alton səmimi qəbula, Azərbaycanda onlara göstərilən qonaqpərvərliyə görə minnətdarlığını bildirdi, həmkarlarını Prezident Heydər Əliyevə təqdim etdi. O, dedi ki, Azərbaycanın Londondakı səfiri öz ölkəsinin maraqlarını yaxşı təmsil edir və Azərbaycanla, Dağlıq Qarabağla bağlı bizə dəyərli məlumatlar verir.

Prezident Heydər Əliyevin Londona səfərlərini xatırladan qonaq bu günlərdə məcburi köçkünlərlə görüşdüklərini, münaqişə ilə bağlı əsl həqiqət barədə onlarda tam fikir formalaşdığını söyləyərək, bu insanların yaşayışının yaxşılaşdırılaması haqqında Prezidentin Fərmanını böyük mənəvi dəstək kimi qiymətləndirdi. Lord Alton ölkəsinin Azərbaycanda iqtisadi marağı olduğunu, Ermənistan-Azərbaycan münaqişəsinin nizama salınmasının vacibliyini və bu sahədə müəyyən yardım göstərə biləcəcklərini söylədi. Qonaq dedi ki, biz baş nazir Toni Bleyerə məktubla müraciət edib buradakı qaçqın və məcburi köçkünlərin vəziyyəti haqqında geniş məlumat verəcək və çalışacağıq ki, ölkəmiz bu məsələnin həllində fəal rol oynasın. Biz Azərbaycanın Avropa Şurası və NATO ilə əlaqələrinin möhkəmlənməsini də dəstəkləyirik.

Roma papasının Azərbaycana səfərini yüksək dəyərləndirən lord Alton dedi ki, cənab Prezident, bu, çox cəsarətli bir addım idi ki, Siz onu Bakıya dəvət etdiniz. Çox şadıq ki, Siz sovet dövründə dağıdılmış kilsənin yenidən tikilməsinə razılıq vermisiniz. Biz beynəlxalq təşkilatlar çərçivəsində əməkdaşlıq edəcəyik. Bizim üçün böyük başucalığıdır ki, ölkənizdəyik və şəxsən Sizin tərəfinizdən qəbul olunuruq.

Azərbaycanın vəziyyətini düzgün qiymətləndirdiklərinə, Ermənistan-Azərbaycan, Dağlıq Qarabağ münaqişəsi nəticəsində yurd-yuvasından zorla qovulmuş və hazırda çadırlarda yaşayan soydaşlarımızın ağır vəziyyəti ilə tanış olduqlarına görə qonaqlara təşəkkür edən Prezident Heydər Əliyev dedi ki, düşünrəm ki, oradakı dəhşətli vəziyyət, mənzərə sizi də narahat etməlidir. Çadır düşərgəsində yaşayanlar Ermənistanın Azərbaycana etdiyi hərbi təcavüzün və apardığı müharibənin qurbanlarıdır. Siz, Lordlar palatasının üzvləri bunları gözlərinizlə görmüsünüz və güman edirəm ki, ölkənizdə Ermənistan-Azərbaycan münaqişəsi haqqında səhv fikir yaradanlara, söz deyənlərə cavab verməyə dəlilləriniz vardır. Təəssüflər olsun ki, Ermənistan Azərbaycana təcavüz etdiyi, torpaqlarımızın 20 faizini işğal etdiyi halda, bu torpaqlardan bir milyon azərbaycanlını zorla çıxardığı halda və onlar on ildən çoxdur ağır vəziyyətdə çadırlarda yayşadığl halda, erməni lobbisi və sizdə olan ermənipərəst parlament üzvləri, o cümlədən bəzi lordlar hər dəfə nitq söyləyir, erməniləri müdafiə etməyə dəvət edirlər, Dağlıq Qarabağın ağır vəziyyətdə olmasından danışırlar. Amma bunları gəlib görmək istəmirlər. Sizin həmkarınız baronessa Koks ən azı ildə bir dəfə Ermənistanı ziyarət edir, Dağlıq Qarabağa gedir. Sonra gəlib Böyük Britaniyanın parlamentində dezinformasiya yayır.

Prezident Heydər Əliyev 1994-cü ildə baronessa Koksla Londonda görüşüb danışdığını və Azərbaycana dəvət etdiyini, lakin onun buraya gəlmədiyini və əsl həqiqəti, günahkarın kim olduğunu bilmək istəmədiyini də xatırlatdı.

Dövlətimizin başçısı Lordlar palatası üzvlərinin Azərbaycandakı vəziyyət və qaçqınlar haqqında məlumat vermək üçün baş nazir Toni Bleyerə xüsusi məktubla müraciət etmək niyyətlərini yüksək qiymətləndirərək vurğuladı ki, biz Böyük Britaniya ilə bütün sahələrdə əlaqələrimizə xüsusi əhəmiyyət veririk və bu əməkdaşlıq xarici siyasətimizin üstün istiqamətlərindən biridir. Böyük Britaniyanın onlarca şirkəti Azərbaycanda çox uğurlu fəaliyyət göstərir, sərmayə qoyur. Neft və qaz sahəsində xarici dövlətlərlə əməkdaşlığımızda Böyük Britaniya xüsusi yer tutur və Azərbayacnın neft-qaz sektoruna çox böyük marağı var. Biz bu marağı təmin etmişik və əməkdaşlığımız uzunmüddətlidir.

Azərbaycan Prezidenti daha sonra dedi ki, Ermənistanla heç bir iqtisadi marağı olmayan Böyük Britaniyada erməni lobbisi Ermənistanı dəstəkləyir, bu bölgə haqqında yalan məlumatlar verir. İqtisadi maraqların həyata keçirilməsi naminə Böyük Britaniya gərək Azərbaycanın bu problemləri ilə də yaxından məşğul olsun. Ümid edirəm ki, siz bu sahədə bizə yardımçı olacaqsınız və bu səfərinizin müsbət nəticələrini müşahidə edəcəyik.

Lordlar palatasının digər üzvləri lord Hilton və lord Əhməd görüşdə çıxış edərək, Prezident Heydər Əliyevin fikirləri ilə razılaşdıqlarını və bu region haqqında kifayət qədər məlumatları olduqlarını bildirərək dedilər ki, məlum münaqişənin həlli üçün Minsk qrupu çərçivəsində səylər göstərilir. Amma bu günədək daimi sülhün yaranmamasını Minsk qrupunun mükəmməl addım atmaması ilə izah etmək olar. BMT Təhlükəsizlik Şurasının üzvü kimi Böyük Britaniya, biz burada bir milyondan çox insanın əziyyət çəkməsinə biganə qala bilmərik və onların daimi yaşayış yerlərinə qayıtmaları barədə qəti düşünməliyik. Biz qaçqınlarla görüşərkən onların öz dövlət başçılarına böyük inamlari olduğunu gördük.

Cənab Hilton Bakı ilə Yerevan arasında dəmir yolunun açılması məsələsi barədə Azərbaycan Prezidentinin fikri ilə də maraqlandı.

Prezident Heydər Əliyev bildirdi ki, biz dəmir yolunun açılmasını dəfələrlə müzakirə etmişik, ancaq Ermənistan buna imkan vermir. Bu dəmir yolu Ermənistana lazımdır. Amma bunu açmaq üçün gərək Ermənistan Azərbaycanın işğal olunmuş dörd rayonunu azad etsin. Çünki bizim dəmir yolunun təxminən 130 kilometri indi Ermənistan silahlı qüvvələrinin işğalı altındadır. Bu, eyni zamanda bizim İranla olan sərhəddimizdir. Həmin ərazi Ermənistan tərəfindən işğal edilmişdir. Ermənistan dəmir yolunun açılmasını istəyir, ancaq torpaqların azad edilməsinə razılıq vermir. Əgər dəmir yolu keçən rayonlar işğaldan azad olmasa, Ermənistan silahlı qüvvələri ordan çəkilməsə, dəmir yolunun açılması real deyildir.

Lord Alton terrorizmlə mübarizədən söz açaraq, Azərbaycanın bu sahədə fəaliyyətini yüksək qiymətləndirdi. O, terrorizmə qarşı mübarizə ilə bağlı təcrübə mübadiləsi aparmaq üçün Azərbaycan parlament nümayəndə heyətinin Britaniyaya səfər etməsini arzuladı və əlavə etdi ki, cənab Prezident, mən baronessa Koks ilə də görüşəcək, Sİzin dəvətinizi ona çatdıracağam ki, gəlib hər şeyi gözü ilə görsün.

Prezident Heydər Əliyev qonağın təklifinin əhəmiyyətli olduğunu bildirərək dedi ki, əgər belə bir dəvət gələrsə, parlamentimizin sədri məmnuniyyətlə Böyük Britaniyada görüşlər keçirər və Azərbaycan həqiqətlərini parlamentinizin bəzi başqa üzvlərinə də çatdırar.

Görüşün sonunda lord Əhməd həmkarları adından Prezident Heydər Əliyevə xatirə hədiyyəsi və öz kitabını təqdim etdi.

Milli Məclisin sədri Murtuz Ələsgərov, Prezidentin Katibliyinin rəisi Dilarə Seyidzadə, Prezidentin İcra Aparatının şöbə müdiri Novruz Məmmədov, Böyük Britaniyanın Bakıdakı səfiri Endryü Taker və Azərbaycanın Londondakı səfiri Rəfael İbrahimov qəbulda iştirak edirdilər.

AZƏRTAC

Foto Yaşar Xəlilovundur