AZƏRBAYCAN PREZİDENTİ HEYDƏR ƏLİYEV İSTANBULA GƏLMİŞDİR
Azərbaycan Respublikasının Prezidenti Heydər Əliyev Qara Dəniz İqtisadi Əməkdaşlıq Təşkilatının üzvü olan ölkələrin dövlət başçılarının bu qurumun 10 illiyinə həsr edilmiş zirvə görüşündə iştirak etmək üçün iyunun 24-də günorta İstanbula gəlmişdir.
Dövlətimizin başçısını İstanbulun Atatürk beynəlxalq hava limanında Türkiyə Respublikasının yüksək vəzifəli şəxsləri, Azərbaycanın Ankaradakı səfiri Məmməd Əliyev, İstanbuldakı baş konsulu Xeyrəddin Qoca mehribanlıqla qarşıladılar. Azərbaycan Prezidentinə gül dəstəsi təqdim olundu.
Prezident Heydər Əliyevin şərəfinə hava limanında fəxri qarovul dəstəsi düzülmüşdü. Fəxri qarovul dəstəsinin rəisi Azərbaycan dövlətinin başçısına raport verdi. Prezident Heydər Əliyev fəxri qarovul dəstəsinin qarşısından keçdi.
Respublikamızın rəhbəri hava limanından onun üçün ayrılmış iqamətgaha - “Çırağan” hotelinə gəldi.
Elə həmin gün “Çırağan” hotelində Azərbaycan Prezidenti Heydər Əliyevin Gürcüstan Prezidenti Eduard Şevardnadze ilə təkbətək görüşü oldu. Dostluq və mehribanlıq şəraitində keçən görüşdə ölkələrimiz arasında ikitərəfli əlaqələrin perspektivləri, Cənubi Qafqazda vəziyyətlə bağlı fikir mübadiləsi oldu. Görüşdən sonra dövlət başçıları jurnalistlərin suallarına cavab verdilər. Prezidentlər bildirdilər ki, Trabzon şəhərində keçirilmiş görüşdən çox vaxt ötməsə də, qonşu və dost ölkələrin dövlət başçılarının görüşlərinə və fikir mübadiləsinə həmişə ehtiyac var.
Azərbaycan Prezidenti Heydər Əliyev iyunun 24-də öz iqamətgahında ATƏT-in Minsk qrupunun ABŞ, Rusiya və Fransadan olan həmsədrlərini qəbul etdi. Görüşdə Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması barədə fikir mübadiləsi aparıldı.
Prezident Heydər Əliyev həmin gün öz iqamətgahında Türkiyə Cümhuriyyətinin xarici işlər naziri İsmayıl Cəmi də qəbul etdi. Mehribanlıq şəraitində keçən görüşdə dost və qardaş ölkələrimiz arasında strateji əməkdaşlıq məsələləri diqqət mərkəzində oldu.
Aslan Aslanov,
AZƏRTAC-ın xüsusi müxbiri
İstanbul
Bölmənin digər xəbərləri
