Azərbaycan Respublikasının Prezidenti Heydər Əliyev iyulun 9-da Prezident iqamətgahında Yaponiyanın ölkəmizdə yeni təyin olunmuş fövqəladə və səlahiyyətli səfiri Toşiyuki Fucivaranın etmadnaməsini qəbul etmişdir. 

Səfir TOŞİYUKİ FUCİVARA etimadnaməsini Azərbaycan dövlətinin başçısına təqdim edərək dedi:

-Zati-aliləri cənab Prezident Əliyev!

Yaponiyanın Azərbaycan Respublikasında səfiri təyin edilməyim barədə etimadnaməni və sələfim səfir Tetsuya Xirosenin geri çağırılması haqqında məktubu zati-alinizə təqdim etmək mənim üçün böyük şərəfdir.

Bu fürsətdən istifadə edərək, imperator Akihitonun ölkələrimiz arasında dostluq əlaqələrini genişləndirmək istəklərini zati-alinizə çatdırmaq istəyirəm.

1992-ci ilin sentyabr ayında iki ölkə arasında qurulmuş diplomatik əlaqələr getdikcə inkişaf etmiş və 1998-ci ilin fevralında zati-alinizin Yaponiyaya rəsmi səfərindən sonra genişlənən mehriban münasibətlər həm Yaponiya hökuməti, həm də Azərbaycan üçün birgə əməkdaşlıq sahəsində yeni perspektivlər açmışdır. Mən Yaponiya ilə ölkəniz arasında mövcud olan qarşılıqlı anlaşmanın gələcəkdə də təmin olunması, ikitərəfli münasibətlərin inkişaf etdirilməsi üçün öz vəzifəmi var qüvvəmlə yerinə yetirəcəyəm. Zati-alinizi və Azərbaycan hökumətini əmin edirəm ki, dövlətlərarası münasitbətlərimizin daha da inkişafı naminə səylərimi və bacarığımı əsirgəməyəcəyəm. Sağ olun.

X X X

Azərbaycan Prezidenti HEYDƏR ƏLİYEV səfirə müraciətlə dedi:

-Hörmətli cənab səfir!

Sizi Yaponiyanın Azərbaycanda fövqəladə və səlahiyyətli səfiri təyin olunmağınız münasibətilə təbrik edir və bu işinizdə uğurlar arzulayıram.

Yaponiya ilə Azərbaycan arasında diplomatik əlaqələrin 10 illik tarixi var. Bu illərdə biz ölkələrimiz arasındakı əlaqələri inkişaf etdirməyə çalışmışıq. Məmnuniyyətlə qeyd etmək istəyirəm ki, Yaponiya hökuməti Azərbaycana xüsusi münasibət, qayğı və diqqət göstəribdir. Yəni Azərbaycan ilə əlaqələrin inkişaf etdirilməsində çox maraqlı olduğunu bildiribdir. Bütün bunların nəticəsində 1998-ci ilin fevral ayında mənim Yaponiyaya rəsmi səfərim zamanı Yaponiya-Azərbaycan əlaqələrinin keçdiyi yol müzakirə olundu və gələcəkdə görüləsi işlər haqqında qərarlar qəbul etdik. Demək olar ki, o vaxtdan, yəni 1998-ci ildən Yaponiya-Azərbaycan əlaqələrində yeni bir inkişaf mərhələsi başlayıbdır.

Biz bu inkişafdan da çox məmnunuq.

Yaponiya inkişaf etmiş dövlətdir, qabaqcıl texnikaya və texnologiyaya malik olan bir ölkədir. Yaponiya dünyanın müxtəlif böləgələrində böyük sərmayələr qoyan bir ölkədir. Ona görə də Yaponiyanın Azərbaycana olan marağı və indiyədək görülən əməli işlər bizim üçün çox böyük əhəmiyyət kəsb edir. Bu işlər məlumdur. Biz həm neft sahəsində yaxşı əməkdaşlıq edirik, həm də elektrik stansiyalarının yaradılması sahəsində əməkdaşlıq edirik. Yaponiya Azərbaycanda başqa sahələrə də maraq göstərir. Mən fürsətdən istifadə edib, bunlara görə məmnun olduğumu bildirmək isəyirəm.

Biz Yaponiyanı özümüz üçün çox dəyərli tərəfdaş hesab edirik. Yaponiyanın Azərbaycanda daimi səfirliyi açılandan sonra bu işlərin daha da sürətlə getdiyini hiss edirik.

Mən ümidvaram ki, Yaponiyanın Azərbaycanda yeni səfiri kimi siz indiyə qədər görülən işləri davam və daha da sürətlə inkişaf etdirəcəksiniz.

Mən həm də çox məmnunam ki, sizinlə yenidən görüşürəm. Çünki 1998-ci ildə mən Tokioda - Yaponiyada rəsmi səfərdə olarkən siz gərək ki, Xarici İşlər Nazirliyində Müstəqil Dövlətlər Birliyi şöbəsinə rəhbərlik edirdiniz. Mən və nümayəndə heyətimiz orada olduğumuz zaman bizə çox diqqət və qayğı göstərmişdiniz, daim bizimlə bir yerdə olmuşdunuz. Ona görə də artıq bizim aramızda yaxşı münasibətlər yaranıbdır. Təkcə mənim yox, mənimlə birlikdə Yaponiyada olan nümayəndə heyətinin üzvləri ilə də. Bu da sizin üçün və bizim üçün çox əhəmiyyətlidir.

Sizin Azərbaycanca danışmağınız da məni çox sevindirdi. Doğrudur, sizdə bir balaca türk ləhcəsi var, yəni Anadolu türkcəsinin ləhcəsi var. Amma deyə bilərəm ki, 98 faiz siz tam Azərbaycanca danışdınız. Demək, siz hələ vaxtilə Azərbaycanı öyrənmiş bir adamsınız. Azərbaycana maraq göstərmiş bir diplomatsınız. Bunların hamısı belə düşünməyimə əsas verir ki, sizin səfirliyiniz zamanı Yaponiya ilə Azərbaycan arasında əlaqələr daha da sürətlə inkişaf edəcəkdir. Mən bunu arzulayıram. Əmin ola bilərsiniz ki, sizə burada bütün hakimiyyət orqanları tərəfindən lazımi yardım, qayğı və diqqət göstəriləcəkdir. Sizin səmərəli işləməyiniz üçün bütün imkanlar yaradılacaqdır.

Sizi bir daha təbrik edirəm, sizə yeni-yeni uğurlar arzulayıram.

X X X

Sonra Azərbaycan Prezidenti Heydər Əliyev Yaponiyanın Azərbaycandakı fövqəladə və səlahiyyətli səfiri Toşiyuki Fucivara, onun xanımı, səfirliyin əməkdaşları xatirə şəkli çəkdirdi.

X X X

Etimadnamənin təqdim edilməsi mərasimindən sonra Prezident Heydər Əliyev ilə səfir Toşiyuki Fucivara arasında səmimi söhbət oldu.

Azərbaycan Prezidenti HEYDƏR ƏLIYEV səfirə müraciətlə dedi:

- Azərbaycan-Yaponiya iqtisadi əlaqələri indi çox sahələrdə inkişaf edir. İndi mən bunları müzakirə etmək istəmirəm. Güman edirəm ki, siz bu məsələləri bizim iqtisadiyyat naziri Fərhad Əliyevlə geniş danışacaqsınız.

Baş nazirin müavini Abid Şərifovla, - siz onu tanıyırsınız, o, mənimlə birlikdə Yaponiyaya gəlmişdi və mən ona tapşırmışdım ki, bu məsələlərlə məşğul olsun, indi də məşğul olur, - danışacaqsınız. İndi sizin kreditinizlə Şimal Dövlət Rayon Elektrik Stansiylası tikilir. Mənə söz veriblər ki, bu ilin noyabr ayında həmin tikinti başa çatacaqdır və biz stansiyanı istismara verəcəyik, birlikdə açacağıq. Ona görə bildirmək istəyirəm ki, siz də biləsiniz və bu işi birlikdə görəsiniz.

Sizin başqa sahələrdə də həm kreditlər vermək, həm də qrantlar vermək imkanlarınız var. Mən bilirəm ki, siz bizim səhiyyə, təhsil sahələrinə, kənd təsərrüfatında sahibkarlığın inkişaf etdirilməsinə, mədəniyyətə, simfonik orkestrə qrantlar vermisiniz. Bunlara görə təşəkkür edirəm. Güman edirəm ki, belə əməkdaşlıq davam etməlidir.

Sizin neft şirkətləri də istədikləri payları aldılar. İndi “Yanan Tava” neft yatağında onlar qazma işləri aparırlar. Bir quyu qazdılar, yenisini də qazacaqlar. Onlar oradan yaxşı nəticə gözləyirlər. “İtoçi” şirkəti əvvəldən bizim ilk neft müqaviləsinə daxil olubdur. Yəni Yaponiyanın burada neft sahəsində də fəaliyyəti böyükdür. İndi belə yaxşı şərait yaranıbdır. Ancaq siz də səfirliyiniz zamanı gərək göstərəsiniz ki, sizin dövrünüzdə nə olubdur. Ona görə də sizdən təşəbbüslər gözləyəcəyəm.

TOŞİYUKİ FUCİVARA: Zati-alinizin çox mehriban münasibətinə görə minnətdaram və ürəkdən təşəkkür edirəm. Mən zati-alinizin söylədiyi kimi, Yaponiya ilə Azərbaycan arasında münasibətlər Sizin Yaponiyaya səfərinizdən sonra daha da inkişaf etmişdir.

Buraya səfir təyin olunarkən ölkələrimiz arasında əməkdaşlığın daha da inkişaf etdirilməsi, mənim qarşımda vəzifə kimi qoyulmuşdur. Bu istiqamətdə işlərimiz davam edir. Bu yaxınlarda qədim İpək yolu ilə bağlı neft sahəsindəki əməkdaşlığımızla əlaqədar Yaponiyadan bir nümayəndə heyəti Azərbaycana gələcəkdir. İnşallah, Yaponiya təmsilçiləri başda hörmətli Prezident olmaqla hökumət nümayəndələri ilə də görüşəcək, fikir mübadiləsi aparacaqlar. Məqsəd neft sənayesində təhlükəsizliklə bağlı Asiya qitəsində əməkdaşlıq məsələlərini müzarkirə etməkdir. Həmin görüşlər zamanı Azərbaycan iqtisadiyyatının daha hansı sahələrində əməkdaşlıq yaradılmasının mümkünlüyü nəzərdən keçiriləcəkdir. Görüşlər zamanı sərmayə qoyulması sahəsində də mümkün variantlar müzakirə olunacaqdır. Şimal Dövlət Rayon Elektrik Stansiyasının tikintisinin, zati-alinizin qeyd etdiyi kimi, bu ilin noyabr ayında başa çatacağını mən də bilirəm. Ancaq mənim başlıca vəzifəm bundan sonrakı layihələrin kreditləşdirilməsinə kömək etməkdən ibarət olacaqdır. Bunun üçün əlimdən gələni əsirgəməyəcəyəm. Bununla əlaqədar mən araşdırmalar aparacaq və öz fikrimi bildirəcəyəm. Zati-alinizə söz verirəm ki, vəzifəmi layiqincə yerinə yetirəcəyəm.

Etimadnamənin təqdim olunması mərasimində Azərbaycanın xarici işlər naziri Vilayət Quliyev, Prezidentin Katibliyinin rəisi Dilarə Seyidzadə və digər rəsmi şəxslər iştirak edirdilər.

AZƏRTAC

Foto Y.Xəlilovundur