Azərbaycan Prezidenti Heydər Əliyevin Ermənistan Prezidenti Robert Koçaryanla təkbətək görüşü
Xəbər verdiyimiz kimi, avqustun 1-də, Soçi şəhərindəki Daqomıs iqamətgahında Azərbaycan Respublikasının Prezidenti Heydər Əliyevin Ermənistan Prezidenti Robert Koçaryan ilə təkbətək görüşü olmuşdur.
Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsi məsələsi barədə ətraflı müzakirə aparan prezidentlər kompromis variantların axtarılıb tapılması üçün ikitərəfli görüşlərin və danışıqların davam etdirilməsinin zəruriliyini bildirdilər.
Birbaşa danışıqların xüsusi əhəmiyyət daşıdığını vurğulayan prezidentlər münaqişənin aradan qaldırılmasında ATƏT-in Minsk qrupuna həmsədrlik edən ölkələrin - ABŞ-ın, Rusiyanın, Fransanın səylərinin daha da artırılmasının vacib olduğunu nəzərə çarpdırdılar.
Dövlət başçıları tam sülh əldə olunana qədər tərəflərin atəşkəs rejiminə əməl edəcəklərini və bunu möhkəmləndirəcəklərini bildirdilər.
Prezidentlər Minsk qrupu çərçivəsində və birbaşa aparılan danışıqların bundan sonra da davam etdirilməsi haqqında yekdil fikirdə olduqlarını təsdiq etdilər.
x x x
Təkbətək görüş başa çatdıqdan sonra Azərbaycan Prezidenti Heydər Əliyev və Ermənistan Prezidenti Robert Koçaryan jurnalistlərin suallarına cavab verdilər.
Ermənistan Prezidenti R o b e r t K o ç a r y a n: Əlbəttə, biz Dağlıq Qarabağ münaqişəsinin nizama salınması problemini müzakirə etdik. Deyə bilmərəm ki, biz yekdil rəyə gəldik. Biz müzakirələrimizi davam etdirməyi qərara aldıq. Əlbəttə, söhbət asan olmadı, lakin biz, hər halda, belə bir əhval-ruhiyyədəyik ki, qəti qərar tapmaq lazımdır.
Azərbaycan Prezidenti H e y d ə r Ə l i y e v: Mən bu fikirlə razıyam. Həqiqətən, bu məsələnin həllinin hər hansı variantlarını tapmaq üçün hətta bizə ayrılmış vaxtdan da çox vaxt sərf etdik. Biz müxtəlif variantları müzakirə etdik, amma hələlik hər hansı bir qəti qərara gələ bilmədik və ona görə də iki prezident arasında dialoqu davam etdirmək barədə razılığa gəldik.
S u a l: Demək olarmı ki, düyün açılmışdır?
H e y d ə r Ə l i y e v: Xeyr, mən hesab etmirəm ki, düyün açılmışdır.
S u a l: Həmsədrlər deyirlər ki, danışıqlar Parisdə və Ki Uestdə işlənib hazırlanmış prinsiplər əsasında davam etdirilməlidir. Siz bunu neçə şərh edərdiniz? Azərbaycanın xarici işlər naziri Quliyev demişdir ki, bu, ermənilərin prinsipidir.
H e y d ə r Ə l i y e v: Gəlin, kimin nə dediyindən söhbət açmayaq. Biz sizə nə deyiriksə, ona da inanın.
R o b e r t K o ç a r y a n: Biz razılaşmışıq bu barədə təmkinli olaq. Sadəcə, bir dövr var idi ki, mətbuat vasitəsilə bir-birimizə qol vurmağa çalışırdıq. Hesab etmirəm ki, bu cür yanaşmalar qəti bir qərarın axtarışı üçün daha əlverişli şərait yaranmasına gətirib çıxaracaqdır.
H e y d ə r Ə l i y e v: Yeri gəlmişkən, nə barədə danışdığımızı biz tərəfdən, demək olar,heç kim bilmir. Odur ki, kim nə danışırsa, öz fikrini söyləyir.
X x x
Avqustun 2-də, Müstəqil Dövlətlər Birliyinin üzvü olan ölkələrin dövlət başçılarının Soçidə keçirilən qeyri-rəsmi zirvə görüşü başa çatdıqdan sonra, səfər proqramına uyğun olaraq, prezidentlər axşamüstü “Qafqaz” gəmisində Qara dənizdə gəzintiyə çıxdılar. Vaxtilə SSRİ hərbi dəniz qüvvələrinə məxsus olan “Qafqaz” gəmisi 1980-ci ildə istifadəyə verilmişdir.
“Qafqaz” gəmisi 50 min mil məsafə qət etmiş, 40-dan çox xüsusi tapşırığı yerinə yetirmişdir. Bu gəmi 1994-cü ildən Rusiya Federasiyası Prezidentinin Sərəncamı ilə Prezident gəmisi adlandırılmış və ali qonaqların dəniz gəzintisi üçün nəzərdə tutulmuşdur.
“Qafqaz” gəmisində səyahətə çıxan Müstəqil Dövlətlər Birliyinin üzvü olan ölkələrin dövlət başçıları sammitdə müzakirə etdikləri məsələlər, ikitərəfli görüşlərdə toxunulan problemlər, öz ölkələrini maraqlandıran mövzular barədəətraflı fikir mübadiləsi apardılar.
Səfər başa çatdı
Azərbaycan Respublikasının Prezidenti Heydər Əliyevin MDB-nin üzvü olan ölkələrin dövlət başçılarının qeyri-rəsmi zirvə görüşündə iştirak etmək üçün Soçiyə səfəri avqustun 3-də başa çatdı.
Respublikamızın rəhbəri həmin gün səhər Daqomıs iqamətgahının fəxri qonaqlar kitabına öz ürək sözlərini yazdı:
“Soçidə çoxdan olmamışam. Bu gözəl şəhərlə yeni görüş məni sevindirdi. Daqomıs sağlamlıq kompleksi özünün bütün imkanlarına, gözəl memarlığına görə nadir komplekslərdən biridir. Burada qaldığımız günlər MDB dövlətləri başçılarının qeyri-rəsmi görüşünün keçirilməsi üçün əla şərait yaratdı və mən bu görüşü olduqca səmərəli hesab edirəm.
Soçinin bütün sakinlərinə, Daqomıs kompleksinin bütün işçi heyətinə cansağlığı, firavanlıq, əmin-amanlıq, uğurlar və nailiyyətlər arzulayıram.
Minnətdarlıq hissi ilə,
Heydər Əliyev
Azərbaycan Respublikasının Prezidenti
3.08.2001-ci il”.
x x x
Daqomısda dincələn Rusiya Federasiyasının vətəndaşları və xarici qonaqlar görkəmli dövlət xadimi Heydər Əliyev ilə sağollaşmaq üçün iqamətgahın foyesinə toplaşmışdılar. Onlar Azərbaycan Prezidenti Heydər Əliyev ilə hərarətlə, hörmət və ehtiramla xudahafizləşdilər.
MDB-nin icraçı katibi Yuri Yarov və Rusiya Federasiyası hökumətinin rəsmi şəxsləri dövlətimizin başçısını Daqomıs iqamətgahından mehribanlıqla yola saldılar.
Azərbaycan Prezidenti Heydər Əliyev maşın karvanının müşayiəti ilə Soçidən Adler hava limanına gəldi. Respublikamızın rəhbərini hava limanında Krasnodar diyar icra hakimiyyətinin başçısı Aleksandr Tkaçov, Rusiya Federasiyası xarici işlər nazirinin müavini Valeri loşinin, Soçi şəhərinin meri Leonid Mostovoy və digər rəsmi şəxslər yola saldılar.
Dövlətimizin başçısı həmin gün günorta Vətənə qayıtdı.
x x x
Azərbaycan Prezidenti Heydər Əliyevi Binə hava limanında Milli Məclisin sədri Murtuz Ələsgərov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.
Dövlətimizin başçısı hava limanında jurnalistlərə müsahibə verdi. (Müsahibənin mətni qəzetin 4 avqust nömrəsində dərc olunmuşdur.
Aslan Aslanov,
Yaşar Xəlilov /foto/
AZƏRTAC-ın xüsusi müxbirləri,
Rafiq Bağırov /foto/
Bölmənin digər xəbərləri
