Azərbaycan Prezidenti Heydər Əliyevin Rusiya Prezidenti Vladimir Putin ilə təkbətək görüşü
Xəbər verdiyimiz kimi, avqustun 2-də Soçi şəhərindəki Daqomıs iqamətgahındaAzərbaycan Respublikasının Prezidenti Heydər Əliyevin Rusiya Federasiyasının Prezidenti Vladimir Putinlə təkbətək görüşü olmuşdur.
Azərbaycan Prezidenti Heydər Əliyevi mehribanlıqla salamlayan Rusiya Federasiyasının Prezidenti Vladimir Putin Müstəqil Dövlətlər Birliyinin üzvü olan ölkələrin dövlət başçılarının qeyri-rəsmi zirvə görüşündə iştirak etmək üçün Soçiyə gəldiyinə görə respublikamızın rəhbərinə minnətdarlığını bildirdi.
Siyasətdə və dövlətçilik fəaliyyətində böyük təcrübəsi olan Heydər Əliyev ilə görüşündən çox məmnun qaldığını nəzərə çarpdıran Vladimir Putin Azərbaycan ilə bütün sahələrdə əlaqələrin daha da möhkəmləndirilməsinə Rusiyanın xüsusi əhəmiyyət verdiyini vurğuladı.
Dostluq, mehribanlıq, qarşılıqlı anlaşma şəraitində keçən söhbət zamanı dövlət başçıları ikitərəfli əməkdaşlığın daha da genişləndirilməsi, habelə regional və beynəlxalq problemlərə dair bir sıra məsələlər barədə geniş müzakirələr apardılar.
Son vaxtlar Xəzərin cənubunda meydana çıxan gərginlik elementlərindən narahatlıqla söhbət açılarkən Prezident Putin bildirdi ki, Xəzər dənizinin sülh və sabitlik dənizi olması ücün, qarşıya çıxan bütün məsələlərin yalnız dinc vasitələrlə, birbaşa dialoq yolu ilə, beynəlxalq hüququn prinsipləri nəzərə alınmaqla mehriban qonşuluq və qarşılıqlı anlaşma ruhunda həlli üçün mümkün olan hər şeyi etmək bizim ümumi vəzifəmizdir. Rusiya buna hər vasitə ilə kömək göstərməyə hazırdır. Güc metodlarından istifadə olunması yolverilməzdir. Cənab Putin dedi ki, Xəzər dənizi keçmişdən SSRİ-yə mənsub olubdur və İran ilə SSRİ-nin sərhədi vardı. Biz, yəni dörd Xəzəryanı dövlət - müstəqillik əldə etmiş dövlətlər SSRİ-nin varisləriyik.
Prezident Vladimir Putin ilə yenidən görüşündən razılıqla söhbət açan Prezident Heydər Əliyev Xəzərin statusu məsələsində Azərbaycan Respublikası ilə Rusiya Federasiyasının eyni mövqedə olmasından çox məmnun qaldığını nəzərə çarpdırdı.
Prezident Heydər Əliyev və Prezident Vladimir Putin görüşdə Qafqaz regionunda sabitliyin və təhlükəsizliyin bərqərar edilməsi məsələsinə də geniş yer ayırdılar. Ermənistan-Azərbaycan, Dağlıq Qarabağ münaqişəsinin ölkəmiz üçün ağrılı nəticələrindən söhbət açan dövlətimizin başçısı Heydər Əliyev Ermənistan silahlı qüvvələrinin təcavüzü nəticəsindəAzərbaycanın torpaqlarının 20 faizinin indiyədək işğal altında qalmasından, bir milyondan çox vətəndaşımızın yerindən-yurdundan zorla çıxarılaraq ağır şəraitdə yaşamasından ətraflı bəhs etdi. Azərbaycan Prezidenti Heydər Əliyev təkcə Qafqazda deyil, ümumən MDB məkanında ən uzun sürən bu münaqişənin sülh yolu ilə aradan qaldırılması sahəsində Rusiya Prezidenti Vladimir Putinin göstərdiyi səylərdən razılıqla söhbət açdı və ümidvar olduğunu bildirdi ki, ATƏT-in Minsk qrupunun həmsədri olan Rusiya bu münaqişənin həll edilməsı üçün öz fəaliyyətini daha da gücləndirəcəkdir.
Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması barədə ətraflı fikir mübadiləsi aparan dövlət başçıları ATƏT-in Minsk qrupu çərçivəsində və birbaşa keçirilən danışıqların gedişini təhlil edərək, həmsədr ölkələrin, xüsusilə Rusiya Federasiyasının bu sahədə səylərinin artırılmasının vacibliyi barədə eyni fikirdə olduqlarını bildirdilər.
Görüşdə Azərbaycan-Rusiya əlaqələrinin perspektivləri, beynəlxalq təşkilatlar, habelə MDB çərçivəsində əməkdaşlığın daha da inkişaf etdirilməsi, qeyri-rəsmi Soçi zirvə görüşünün əhəmiyyəti və hər iki ölkəni maraqlandıran bir sıra digər məsələlər barədə müzakirələr apardılar.
Bölmənin digər xəbərləri
