Azərbaycan Respublikasının Prezidenti Heydər Əliyev iyulun 20-də Livadiya sarayına gəldi. Dövlətimizin başçısını burada Ukrayna Prezidenti Leonid Kuçma mehribanlıqla qarşıladı. 

Sonra Livadiya sarayında GUÖAM-ın üzvü olan ölkələrin dövlət başçılarının zirvə görüşü öz işinə başladı. Ukrayna Prezidenti Leonid Kuçma giriş sözü söylədi, sonra GUÖAM -a sədrlik edən Azərbaycan Respublikasının Prezidenti Heydər Əliyevə söz verdi. Respublikamızın rəhbəri GUÖAM-ın üzvü olan ölkələrin dövlət başçılarını və sammitdə müşahidəçi kimi iştirak edən dövlətlərin nümayəndələrini salamladı, zirvə görüşünün iclasını açıq elan etdi. Azərbaycan Prezidenti Heydər Əliyev iclasda geniş nitq söylədi.

Gürcüstan Prezidenti Eduard Şevardnadze, Moldova Prezidenti Vladimir Voronin, Ukrayna Prezidenti Leonid Kuçma da iclasda nitq söylədilər.

Azərbaycan Prezidenti Heydər Əliyev iclasa yekun vurdu.

Daha sonra GUÖAM-ın üzvü olan ölkələrin dövlət başçıları “Regionda sabitliyin və təhlükəsizliyin təmin edilməsinə dair ümumi səylər haqqında bəyannamə”ni, “GUÖAM-ın fəaliyyətində müşahidəçilərin statusu haqqında GUÖAM-ın üzvü olan ölkələrin dövlət başçılarının qərarı”nı, “GUÖAM dövlətlərinin Xarici İşlər Nazirləri Şurası haqqında Əsasnamə”ni, “GUÖAM-ın zirvə görüşünün yekunları”na dair birgə rəsmi məlumatı imzaladılar.

Üzv ölkələrin xarici işlər, mədəniyyət nazirləri, ticarət-sənaye palatalarının başçıları da müvafiq sənədlər imzaladılar.

İmzalanma mərasimindən sonra GUÖAM-ın üzvü olan ölkələrin dövlət başçıları birgə mətbuat konfransı keçirdilər. Mətbuat konfransını GUÖAM-a sədrlik edən Azərbaycan Respublikasının Prezidenti Heydər Əliyev açdı. Dövlət başçıları jurnalistlərin suallarına cavab verdilər.

Mətbuat konfransından sonra dövlət başçıları Livadiya sarayının qarşısında birgə xatirə şəkli çəkdirdilər.

Günortadan sonra Ukrayna Prezidenti Leonid Kuçmanın adından GUÖAM-ın üzvü olan ölkələrin dövlət başçılarının şərəfinə rəsmi qəbul təşkil olundu. Azərbaycan Prezidenti Heydər Əliyev qəbulda iştirak edirdi.

İyulun 20-də Azərbaycan Prezidenti Heydər Əliyev ABŞ Dövlət Departamentinin Avropa və Asiya ölkələri üzrə əlaqələndiricisi Uilyam Teylor ilə görüşdü. Görüşdə hər iki ölkəni maraqlandıran məsələlər barədə geniş fikir mübadiləsi aparıldı, GUÖAM təşkilatının perspektivlərindən söhbət açıldı.

Elə həmin gün dövlətimizin başçısı Heydər Əliyev Ukraynada yaşayan azərbaycanlılarla görüş keçirdi. Salona toplaşanlar Azərbaycan Prezidentini hərarətlə qarşıladılar.

Görüşü Azərbaycanın Ukraynadakı səfiri Tələt Əliyev açaraq, soydaşlarımızla görüşə gəldiyinə görə respublikamızın rəhbərinə minnətdarlığını bildirdi.

Ukrayna Azərbaycanlıları Konqresinin sədri Oqtay Əfəndiyev görüşdə çıxış edərək, konqresin fəaliyyəti barədə dövlətimizin başçısına məlumat verdi.

Azərbaycan Prezidenti Heydər Əliyev görüşdə geniş nitq söylədi, soydaşlarımıza dəyərli tövsiyələr verdi.

Respublikamızın rəhbərinə Ukraynada yaşayan soydaşlarımız adından xatirə hədiyyələri təqdim edildi. Prezident Heydər Əliyev görüş iştirakçıları ilə xatirə şəkli çəkdirdi.

İyulun 20-də axşam Azərbaycan Prezidenti Heydər Əliyev Yaltadakı dövlət iqamətgahından maşın karvanının müşayiəti ilə Belbek hava limanına gəldi. Hava limanında dövlətimizin başçısının şərəfinə fəxri qarovul dəstəsi düzülmüşdü. Respublikamızın rəhbəri fəxri qarovul dəstəsinin qarşısından keçdi.

Dövlətimizin başçısı Heydər Əliyev onu yola salmağa gəlmiş azərbaycanlı icmasının nümayəndələri ilə səmimiyyətlə sağollaşdı. Uşaqlar Azərbaycan Prezidentinə gül dəstəsi təqdim etdilər.

Respublikamızın rəhbəri Heydər Əliyevi Belbek hava limanında Ukraynanın, habelə Krım Muxtar Respublikasının yüksək vəzifəli şəxsləri, Azərbaycanın Ukraynadakı səfiri Tələt Əliyev və digər rəsmi şəxslər yola saldılar.

Dövlətimizin başçısı elə həmin gün gecə Vətənə qayıtdı.

X X X

Azərbaycan Prezidenti HEYDƏR ƏLİYEV Binə hava limanında kütləvi informasiya vasitələrinin nümayəndələrinə qısa müsahibə verdi.

Axşamınız xeyir olsun. Hər halda, heç bir sutka keçməyib ki, mən buradan gedəndə sizinlə görüşmüşəm. İndi mən qayıtmışam. Orada olarkən bizim apardığımız işlər haqqında informasiya orqanlarında məlumatlar verilibdir. Qısa onu deyə bilərəm ki, bu, GUÖAM təşkilatının növbəti görüşü idi. Təşkilatın nizamnaməsinə görə, son bir ildə GUÖAM-a Azərbaycan Respublikası sədrlik edirdi.

Orada bir çox vacib məsələləri müzakirə etdik, o məsələlər haqqında lazımi qərarlar qəbul etdik. Həmin məsələlər də sizə məlumdur. Qərarların qəbul edilməsində fikir müxtəlifliyi olmayıbdır. GUÖAM-ın sammiti öz işini müvəffəqiyyətlə başa çatdırdı. İndi, bundan sonra GUÖAM-a Gürcüstan sədrlik edəcəkdir. Sizə bundan başqa bir şey deyə bilmərəm. Əgər köklü sualınız varsa, buyurun, verin.

SUAL: Cənab Prezident, bölgələrdə qaçqınlar üçün evlər tikildi. Sizin bu ay ərzində qaçqınlarla görüşünüz planlaşdırılmışdır. Bu, nə zaman olacaqdır?

CAVAB: Bunlarin hamısını mən bilirəm, ay cavan oğlan, ay mənim oğlum. Əsas məsələ onların tikilməsidir, qaçqınların böyük bir hissəsinin oraya köçüb yaşamasıdır. Mən isə söz vermişəm ki, o evlər hazır olanda oraya gedəcəyəm. İndi mənim 5 gün tez və ya gec getməyimin əhəmiyyəti yoxdur. Məqsəd ondan ibarətdir ki, o evlər tikilsin. Orada qaçqınların yaşaması üçün şərait yaradaq və onlar orada yaşamağa başlasınlar. Bunu etmişik. Oraya gedəcəyimi demişdim və bu gün də yenə deyirəm, təsdiq edirəm. Gedin öz gözünüzlə görün, hər şey istənilən kimi olub. Bəlkə daha bir iş görmək lazımdır. Göranboy rayonunda, Ağcakənddə tikilən evlərin hamısı vaxtilə, 1988-ci ildən Ermənistandan qovulmuş azərbaycanlılar üçündür. Çünki o vaxt 200 mindən artır azərbaycanlı Ermənistandan qovulmuşdu, ötən dövrdə onlar müəyyən qədər yerləşiblər. Kimsə o vaxt, münaqişə başlayanda evini dəyişdiribdir, kiməsə ev veriblər. Hər halda, az qismi yersiz qalmışdır. Ona görə də mən birinci növbədə Dövlət Neft Fondundan ayrılan vəsaitlə məhz Ermənistandan qovulmuş insanlar üçün evlər tikdirmək istədim. Ona görə ki, onlar artıq Ermənistana qayıtmayacaqlar. Demək, onlar üçün şərait yaratmaq lazımdır ki, yaşasınlar. Yaxşı iqlimi, yaxşı torpağı var. Hər ailə üçün yaxşı bir ev tikilibdir. Hər evin qabağında 12 sot torpaq var. Ondan əlavə, hər ailəyə istifadə etmək üçün bir hektar torpaq sahəsi verilibdir. Beləliklə, biz bu məsələni həll edirik.

Amma təkcə orada deyil, onların bir qismi Şəmkirdə məskunlaşmaq istəyib, digər qisminə burada, Mehdiabadda yer ayırmışıq, onlar üçün evlər tikilir. Bu, prosesdir, bunun birinci hissəsi oradadır. İndi vaxt tapıb gedəcəyik.

SUAL: Cənab Prezident GUÖAM-ın perspektivsiz qurum olması barədə müxtəlif fikirlər söylənilir. Yalta sammitindən sonra bu fikirlər arxa plana keçəcəkmi?

CAVAB: Bilirsiniz, bu fikirlər ola bilər ki, gələcəkdə də söylənsin. Burada təəcüblü bir şey yoxdur. Kimsə GUÖAM-ı istəyir, kimsə istəmir. Kİmsə ona inanır, kimsə inanmır. Bu, təbiidir, bunlar yenə olacaq-olmayacaq, mən deyə bilmərəm. Amma güman edirəm ki, yenə də olacaqdır.

SUAL: Cənab Prezident, bir gündən sonra mətbuat işçilərinin bayramıdır. Mümkünsə, bununla bağlı fikirlərinizi bölüşəydiniz. Ötən il Sizin mətbuat işçiləri ilə daha da yaxınlaşmağınız müşahidə olundu.

CAVAB: Mən mətbuat günü münasibətilə təbrik göndərmişəm. Ondan sonra da baxarıq.

SUAL: Cənab Prezident, bu yaxınlarda Siz bildirdiniz ki, Ermənistan Prezidenti ilə görüşəcəksiniz. Bu görüşün vaxtı məlumdurmu?

CAVAB: Hələ məlum deyildir.

SUAL: Cənab Prezident, Amerika Birləşmiş Ştatları Dövlət Departamentinin nümayəndəsi Uilyam Teylorla görüşünüz oldu. Bu görüş barədə nə deyə bilərsiniz?

CAVAB: Orada görüşdük, elə bir söhbətimiz olmadı. Yəni elə bir əhəmiyyət kəsb edən söhbətimiz yox idi.

SUAL: Cənab Prezident, GUÖAM təşkilatına yeni üzv qəbul oluna bilərmi, kiməsə orada müşahidəçi statusu verilə bilərmi?

CAVAB: Ola bilər, bir çox ölkələrdən müşahidəçilər gəlmişdi. Amma heç kəs istəmir ki, mütləq yeni üzvlər gəlsin. İndi nə varsa, odur. Amma ola bilər. Bu da təbii bir şeydir. Sağ olun.

X x x

Azərbaycan Prezidenti Heydər Əliyevi Binə hava limanında Milli Məclisin sədri Murtuz Ələsgərov, baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.