AZƏRBAYCAN PREZİDENTİ İLHAM ƏLİYEV RUSİYANIN ÖLKƏMİZDƏ YENİ TƏYİN OLUNMUŞ SƏFİRİNİN ETİMADNAMƏSİNİ QƏBUL ETMİŞDİR
Azərbaycan Respublikasının Prezidenti İlham Əliyev avqustun 4-də Prezident sarayında Rusiya Federasiyasının ölkəmizdə yeni təyin olunmuş fövqəladə və səlahiyyətli səfiri Vasili İstratovun etimadnaməsini qəbul etmişdir. Diplomat Vasili İstratov Prezident sarayı qarşısında fəxri qarovul dəstəsinin önündən keçmişdir.
Səfir VASİLİ İSTRATOV etimadnaməsini Azərbaycan Prezidenti İlham Əliyevə təqdim edərək demişdir:
- Cənab Prezident, Rusiya Federasiyasının Azərbaycan Respublikasında səfiri kimi etimadnaməmi, habelə sələfimin geri çağırılması haqqında məktubu Sizə təqdim etmək mənim üçün yüksək şərəfdir. Rusiya Federasiyasının Prezidenti Vladimir Putin ən xoş arzularını Sizə yetirməyi xahiş etdi. O, çox məmnundur ki, son illər strateji tərəfdaşlıq səviyyəsinə qalxan münasibətlərimiz indi Rusiya və Azərbaycan xalqlarının mənafeləri naminə dinamik inkişaf edir. O, mənə ölkələrimiz arasında dostluğun möhkəmlənməsi və genişlənməsi üçün əlimdən gələni əsirgəməməyi tapşırdı.
Dövlətimizin başçısı səfirlə və Rusiya diplomatik nümayəndəliyinin əməkdaşları ilə xatirə şəkli çəkdirdi.
Sonra Prezident İLHAM ƏLİYEV səfirlə səmimi söhbət edərək dedi:
- Mən Sizi Azərbaycanda salamlayır və təyinatınız münasibətilə təbrik edirəm. Əminəm ki, ölkəmizdə işlədiyiniz dövrdə münasibətlərimiz daha da yaxşılaşacaqdır. Qeyd etdiyiniz kimi, Rusiya ilə Azərbaycan arasında münasibətlər dostlar arasında olan münasibətlərdir, bu münasibətlər qarşılıqlı anlaşmanın, qarşılıqlı etimadın çox yüksək səviyyəsi ilə fərqlənir. Sizin onları strateji tərəfdaşlıq kimi səciyyələndirməyiniz, zənnimcə, artıq çox şey deyir.
Son illər bütün sahələrdə - iqtisadi əməkdaşlıq çərçivəsində, humanitar, əlbəttə ki, siyasi müstəvidə bizim aramızda qarşılıqlı anlaşma və əməkdaşlıq ən yüksək səviyyədədir. Bu, niyyətlərimizi tam dolğunluğu ilə əks etdirir və mənafelərimizə cavab verir.
Bu yaxınlarda mən Moskvada oldum və Prezident Vladimir Vladimiroviç Putinlə görüşdüm. Biz ikitərəfli münasibətlərin bir çox məsələlərini müzakirə etdik. İndi bizim aramızda, necə deyərlər, həll edilməmiş məsələlər yoxdur. Əgər 90-cı illəri xatırlasaq və indi vəziyyətin necə olduğuna nəzər salsaq, görərik ki, bu, əslində, çox böyük nailiyyətdir. Əlbəttə, bu, müqayisəedilməz vəziyyətdir. Bütün bunlar yenə də xalqlarımızın, ölkələrimizin mənafelərinə xidmət edir. Bütün bunlar bir daha sübut edir ki, qonşular arasında, dostlar, tərəfdaşlar arasında münasibətlər qarşılıqlı anlaşma, qarşılıqlı dəstək və dostluq əsasında qurulduqda onlar həmişə, ümumən, regionda vəziyyətin yaxşılaşmasına doğru aparır.
Ümidvaram ki, əlaqələrimizin möhkəmlənməsinə Siz də öz tərəfinizdən töhfə verəcəksiniz, çünki səfirlərin fəaliyyətindən çox şey asılıdır. Sizə bu vəzifədə uğurlar arzulayır və ümid edirəm ki, ölkəmizdə keçirəcəyiniz illər yadınızda qalacaq, Sizin üçün çox mühüm və əziz illər olacaqdır.
Bölmənin digər xəbərləri
