AZƏRBAYCAN PREZİDENTİ İLHAM ƏLİYEVİN BƏYANATI
- Hörmətli cənab Prezident!
Əziz qardaşım!
Hörmətli qonaqlar, xanımlar və cənablar!
Mən sizin hamınızı ürəkdən salamlayıram, bir daha “Azərbaycana xoş gəlmisiniz!” deyirəm.
Biz Türkiyə Cümhuriyyətinin Prezidenti Əhməd Necdət Sezərin Azərbaycana rəsmi səfərinə çox böyük əhəmiyyət, böyük önəm veririk. Bu səfər bizim aramızda olan əlaqələrə yeni təkan verəcəkdir.
Bildiyiniz kimi, Azərbaycanla Türkiyə arasındakı münasibətlər ən yüksək səviyyədədir və Azərbaycan öz dövlət müstəqilliyini bərpa etdikdən sonra daim Türkiyənin dəstəyini, köməyini hiss edirdi. Biz bunu bu gün də hiss edirik. Bütün sahələrdə əməkdaşlıq çox uğurludur və bu gün biz onun əsas istiqamətlərini müzakirə etdik, gələcək perspektivlər haqqında fikir mübadiləsi apardıq. Həm siyasi, həm iqtisadi, həm də humanitar sahələrdə münasibətlərimiz ən yüksək zirvədədir.
Bu gün eyni zamanda, beynəlxalq layihələr haqqında söhbət açılmış, regional əməkdaşlıq məsələləri müzakirə edilmişdir. Türkiyə və Azərbaycan dünya üçün çox önəmli, əhəmiyyətli enerji layihələrini həyata keçirirlər. Bizim birgə fəaliyyətimiz, uğurlu işbirliyimiz bu layihələri irəliyə aparır. Bakı-Tbilisi-Ceyhan və Bakı-Tbilisi-Ərzurum neft və qaz kəmərləri uğurla inşa edilir və bu il biz onların istismarına nail olacağıq. Əlbəttə, açılan bu enerji dəhlizi yeni imkanlar yaradacaqdır. Bu, bizi daha da sıx birləşdirəcək və ölkələrimizin əhəmiyyətini artıracaqdır.
Bu gün biz başqa bir layihə - Qars-Tbilisi-Bakı dəmir yolunun tikintisi haqqında da danışdıq. Bu məsələdə də bizim aramızda heç bir fikir ayrılığı yoxdur. Türkiyə, Azərbaycan və Gürcüstan bu layihədə də fəal iştirak etmək əzmindədirlər. Mən əminəm ki, biz bu layihədə də uğura nail olacağıq.
Təbii ki, Ermənistan-Azərbaycan, Dağlıq Qarabağ münaqişəsinin həlli məsələsi də müzakirə olundu. Türkiyə bu məsələdə daim Azərbaycanın yanındadır, bizi dəstəkləyir və bu, bizim üçün çox önəmlidir. Biz bu dəstəyə görə minnətdarıq. Münaqişənin həlli məsələsində Azərbaycanın mövqeyi dəyişməz olaraq qalır. Bu məsələ yalnız beynəlxalq hüquq normaları əsasında öz həllini tapa bilər. Azərbaycanın ərazi bütövlüyü bərpa olunmalıdır. Bu işğala son qoyulmalı, Ermənistanın azərbaycanlılara qarşı etnik təmizləmə siyasəti nəticəsində yurd-yuvasından didərgin düşmüş soydaşlarımız öz doğma torpaqlarına qayıtmalıdırlar. Bu prinsiplər həm reallığı, ədaləti əks etdirir, eyni zamanda, beynəlxalq hüquq normalarına da uyğundur. Türkiyənin bu məsələyə dair mövqeyi ədalətlidir və biz buna görə çox minnətdarıq.
Ölkələrimiz arasında ticarət əlaqələri də yüksək sürətlə inkişaf edir. Bu onu göstərir ki, həm Türkiyədə, həm də Azərbaycanda müşahidə olunan iqtisadi artım yeni imkanlar açır. Azərbaycanda son il iqtisadiyyat çox yüksək sürətlə inkişaf edib, iqtisadi artım 26 faizdən çox olubdur. Bu il həmin rəqəm daha da böyük olacaqdır. İqtisadiyyat artdıqca, əlbəttə, qarşılıqlı ticarət əlaqələrinin inkişafı üçün də yaxşı imkan yaranır. İş adamları bu gözəl imkanlardan səmərəli istifadə etməlidirlər. Ancaq bununla yanaşı, əlbəttə, iqtisadi əlaqələrin, ticarət dövriyyəsinin indiki səviyyəsi bizim potensialımızı tam əks etdirmir. Bizim imkanlarımız daha da genişdir.
Bir sözlə, ikitərəfli münasibətləri ehtiva edən bütün məsələlər bu gün müzakirə olundu. Mən çox məmnunam ki, danışıqlar çox səmərəli keçdi. Şübhə etmirəm ki, bu səfərdən sonra bizim əlaqələrimiz daha yüksək zirvəyə qalxacaqdır. Təşəkkür edirəm.
Bölmənin digər xəbərləri
