AZƏRBAYCAN PREZİDENTİ İLHAM ƏLİYEVİN YEKUN NİTQİ
Bir də demək istəyirəm ki, indi ölkənin maddi imkanları artır. İlk növbədə, biz bundan istifadə edib, onu insanlarımızın daha da yaxşı yaşamasına yönəltməliyik. İnsanın yaxşı həyatını təmin edən amillərdən biri də ekoloji vəziyyət, sağlamlıq və təbiətin, ətraf mühitin qorunmasıdır. Biz bütün inkişaf etmiş ölkələrin təcrübəsini bilirik və görürük ki, o ölkələrdə bu məsələyə böyük diqqət göstərilir.
Hesab edirəm ki, qısa müddət ərzində tədbirlər planı hazırlanmalıdır, orada bütün sahələr öz əksini tapmalıdır: ekoloji vəziyyət, Xəzər dənizi, ətraf mühitə zərbə vuran təşkilatlar, onların fəaliyyəti, şəhər təsərrüfatının təkmilləşməsi və rolu, eyni zamanda, şirkətlərin fəaliyyəti. Ekologiya və Təbii Sərvətlər Nazirliyi, əlbəttə, burada aparıcı rol oynamalıdır. Eyni zamanda, hökumətə də tapşırıq verirəm ki, əlaqələndirmə işlərini ciddi aparsın.
Çox geniş proqram qəbul olunmalıdır.
Qeyd etdiyim kimi, Proqramda bütün aspektlər öz əksini tapmalıdır. Maksimum proqram bu məsələləri əhatə etməlidir. Biz, əlbəttə, bunu tədricən, mərhələ-mərhələ həll edəcəyik. Ancaq istərdim ki, proqramda bütün məsələlər öz əksini tapsın. Maddi imkanlarımız bizə nəyə imkan verərsə, onu da biz edərik.
Hesab edirəm ki, biz artıq bu ildən başlamalıyıq. Gələn ili gözləməməliyik. Bu ilin sonuna hansı işlər görülə bilər? Buna da biz gərək maliyyə imkanlarını səfərbər edək. Bütün bu işləri qısa müddət ərzində görməliyik. Əminəm ki, bütün bu işlər görüləndən sonra gözəl şəhərimiz, Bakımız daha da gözəlləşəcək və insanlarımız daha da rahat, yaxşı yaşayacaqlar. Sağ olun.
Bölmənin digər xəbərləri
