AZƏRBAYCAN PREZİDENTİNİN GÜRCÜSTANLI SOYDAŞLARIMIZA QAYĞISININ DAHA BİR TƏZAHÜRÜ
AZƏRTAC-ın müxbiri xəbər verir ki, bu yaxınlarda azərbaycanlıların sıx məskunlaşdıqları Dmanisi rayonunun sakinləri - ağır xəstələnmiş Fəxri Həsənovun valideynləri körpəni xilas etmək, onun müalicəsinə kömək göstərmək üçün Azərbaycan rəhbərliyinə müraciət etmişdilər. Həsənovlar ailəsinin bu müraciəti cavabsız qalmamışdır. Gürcüstanda yaşayan soydaşlarımızın sosial problemlərinin həllində səyini əsirgəməyən, onların hər bir dərdinə şərik olan Şəmkir rayonunun rəhbərliyi məsələyə dərhal reaksiya vermiş, Fəxri Həsənovun Tbilisi mərkəzi uşaq xəstəxanasında müalicəsini təşkil etmişdir.
Bu xəstəxana Gürcüstanın tanınmış pediatrlarının çalışdığı müalicə müəssisələrindən biridir. Müalicə müddətində Şəmkir rayonunun nümayəndələri hər an körpənin vəziyyəti ilə maraqlanmış, xəstəxanaya gələrək Fəxriyə baş çəkmişlər.
Artıq Fəxri Həsənov özünü yaxşı hiss edir. Onun valideynləri diqqət və qayğıya görə Azərbaycan Prezidenti İlham Əliyevə minnətdarlıqlarını bildirir, övladlarının şəfa tapmasında əməyi olanların hamısına “sağ olun” deyirlər.
