AZƏRBAYCAN RESPUBLİKASI ƏRAZİLƏRİNİN MİNALARDAN TƏMİZLƏNMƏSİ ÜZRƏ MİLLİ AGENTLİK 10 YAŞINI QEYD EDİR
AZƏRTAC xəbər verir ki, iyulun 18-də Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) 10 yaşı tamam olur.
1998-ci ildə ümummilli lider Heydər Əliyevin Sərəncamı ilə təşkil edilən ANAMA-nın məqsədi müharibə zamanı zərər çəkmiş ərazilərdə yerli sakinlərin yaşaması və fəaliyyəti üçün təhlükəsiz şərait yaratmaqdır.
Agentlik güclü minatəmizləmə potensialının yaradılması ilə yanaşı Azərbaycanda mina təhlükəsi üzrə maarifləndirmə və minadan zərər çəkmiş şəxslərə yardımla bağlı proqramları həyata keçirərək nəzərəçarpacaq şəkildə inkişaf etmişdir.
Əməliyyatlarda 500 mütəxəssis və yardımçı heyət iştirak edir. İndiyədək 70 milyon 580 min 331 kvadratmetr ərazi təmizlənmiş, 314 min 140 ədəd mina, mərmi, əl qumbarası və digər partlayıcı silah və sursat zərərsizləşdirilmişdir.
ANAMA-nın gündən-günə inkişafı hər il Füzuli, Tərtər, Tovuz, Ağdam, Goranboy, Xocavənd, Ağcabədi, Ağstafa və digər rayonların çirklənmiş 18-20 milyon kvadratmetr ərazilərinin təmizlənməsinə imkan verir.
Agentlik müxtəlif beynəlxalq təşkilat və forumlarda Azərbaycanı layiqincə təmsil edir.
