Azərbaycan Respublikası Gənclər Təşkilatları Milli Şurasına yeni üzvlər qəbul olunub
Bakı, 5 noyabr, AZƏRTAC
Noyabrın 5-də Bakı Konqres Mərkəzində Azərbaycan Respublikası Gənclər Təşkilatları Milli Şurasının (ARGTMŞ) Üzvlər Məclisi keçirilib.
AZƏRTAC xəbər verir ki, tədbir Azərbaycanın Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Tədbirdə ARGTMŞ sədri Rafael Hacıbəyli çıxış edərək Prezident İlham Əliyevin dəstəklədiyi gənclər siyasətinin gənclərin müxtəlif sahələrdə fəal iştirakına şərait yaratdığını vurğulayıb: “ARGTMŞ olaraq əsas vəzifə gənclər təşkilatlarını bu yolda dəstəkləməkdir. ARGTMŞ-yə üzv olan təşkilatların sayı 154-ə çatıb və bu gün daha iki yeni təşkilat üzvlük üçün müraciət edib. Bu müraciətlər gənclər təşkilatları üçün geniş platforma yaratmaq məqsədini daşıyır və təşkilatlara özlərini inkişaf etdirmək, səslərini ictimaiyyətə daha geniş şəkildə çatdırmaq üçün imkan verir”.
Daha sonra Azərbaycan Respublikası Gənclər Fondunun şöbə müdiri vəzifəsini icra edən Orduxan Qəhrəmanzadə qurumun gənclər təşkilatlarına göstərdiyi diqqət və dəstəyin, onların layihələrinin uğurla həyata keçirilməsi üçün yaradılan şəraitin, eləcə də Məclisin ümumi işinin təşkilinin əhəmiyyətini vurğulayıb.
Sonra iştirakçıların sayı müəyyən edilib və yetərsay təsdiqləndikdən sonra Məclis sədri vəzifəsinə Elməddin Behbud seçilib.
Tədbirin gündəliyi təqdim edilib və səsvermə yolu ilə təsdiqləndikdən sonra ARGTMŞ-nin 2024-cü ilin iyul-oktyabr ayları üzrə fəaliyyət hesabatı təqdim olunub. Hesabat zamanı sədr Rafael Hacıbəyli, baş katib Nərminə Hüseynzadə və Mərkəzi Nəzarət-Təftiş Komissiyasının sədri Aynurə Salmanlı çıxış edərək NAYORA-nın fəaliyyətləri haqqında məlumat veriblər. Bununla yanaşı, təşkilatın cari fəaliyyətinə dair videohesabat da nümayiş olunub.
Məclisin davamında ARGTMŞ-yə üzvlük üçün müraciət edən gənclər təşkilatlarının müraciətlərinə baxılıb. “ADDIM” Gənclərin İnkişaf Mərkəzi İctimai Birliyinin sədr müavini Kamil Həmidov və “SOS Uşaq Kəndləri-Azərbaycan” İctimai Birliyinin milli gənclər inkişafı üzrə məsləhətçisi Gülsüm Məmmədova təşkilatlarının məqsəd və fəaliyyətləri barədə məlumat veriblər.
Səsvermə nəticəsində yeni üzvlərin ARGTMŞ-yə qəbulu təsdiqlənib.
Bölmənin digər xəbərləri
