AZƏRBAYCAN RESPUBLİKASI PREZİDENTİNİN MƏTBUAT XİDMƏTİNİN MƏLUMATI
Fərman əsasında 70 şəxs əfv olunaraq azadlıqdan məhrum etmə cəzasının çəkilməmiş hissəsindən azad edilmiş, 16 nəfərin cəzasının çəkilməmiş hissəsi yarıyadək azaldılmışdır.
Əfv olunmuşların 44 nəfəri Azərbaycan Respublikasının müstəqilliyinə, dövlətçiliyinə və ərazi bütövlüyünə qarşı törədilmiş cinayətlərdə iştiraka görə məhkum edilmiş şəxslərdir.
Onlardan 18 nəfəri 1994-cü ilin oktyabr ayında qanunvericilikdə nəzərdə tutulmayan silahlı dəstələrin tərkibində Gəncə və Mingəçevir şəhərlərində baş vermiş dövlət çevrilişi cəhdində, 26 nəfəri isə Daxili İşlər Nazirliyinin sabiq Xüsusi Təyinatlı Polis dəstəsinin əməkdaşları və bu cinayətə qoşulmuş digər şəxslər olaraq 1995-ci ilin mart ayında hakimiyyəti zorakılıqla ələ keçirmək məqsədilə Bakı şəhərində, Qazax və Ağstafa rayonlarında Azərbaycan xalqına və Konstitusiyalı dövlət orqanlarına qarşı sui-qəsddə iştirak etmişlər.
Azərbaycan Respublikasının Prezidenti əmin olduğunu bildirmişdir ki, əfv edilmiş şəxslər bu humanist aktdan düzgün nəticə çıxaracaq, islah olunub tezliklə cəmiyyətə qovuşacaq və gələcəkdə Azərbaycan dövlətinin qanunlarına dönmədən əməl edəcəklər.
***
AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ
Cənabınızı Azərbaycan Respublikasının Baş naziri təyin edilməsi münasibətilə təbrik etməkdən şərəf duyduğumuzu bildirir və bu gözəl fürsətdən istifadə edərək, Cənabınıza ən xoş arzularımızı çatdırırıq. Sizə möhkəm cansağlığı və səadət arzulayırıq.
Böyük Allah tərəqqiyə, rifaha və çiçəklənməyə can atan qardaş Azərbaycan xalqından öz istəklərinə qovuşmasında kömək əlini əsirgəməsin! Səmimi salamlarımı qəbul edin!
İki Müqəddəs Məscidin Xadimi
Fəhd bin Əbdüləziz Al Səud
Səudiyyə Ərəbistanının Kralı.
***
AZƏRBAYCANIN BAŞ NAZİRİ İLHAM ƏLİYEV TÜRKİYƏNİN İPƏK YOLU VƏQFİNİN FƏXRİ ÜZVÜ SEÇİLMİŞDİR
Azərbaycan Respublikasının Baş naziri İlham Əliyev Türkiyənin İpək Yolu Vəqfinin fəxri üzvü seçilmişdir. Bu barədə Vəqfin İdarə heyətinin sədri doktor Həsən Moğolun Azərbaycan hökumətinin başçısına göndərdiyi məktubda məlumat verilir. Məktubda deyilir:
AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ
Hörmətli Baş nazir,
İpək Yolu Vəqfinin nizamnaməsinə əsasən, türkdilli dövlətlərin prezidentləri və baş nazirləri Vəqfin təbii fəxri üzvləridir. O cümlədən, Azərbaycan Respublikasının Prezidenti hörmətli Heydər Əliyev və Siz fəxri üzvlərsiniz.İpək Yolu Vəqfinin İdarə heyəti 1997-ci ildən etibarən hörmətli Prezidentin və Sizin fəaliyyətlərinizi diqqətlə izləmiş, 1998-ci ildən isə cənab Heydər Əliyevi müxtəlif mükafatlara layiq görmüşdür.
Azərbaycan xalqını və dövlətini dünyaya tanıdan hörmətli atanıza, dünyanın ən böyük siyasət adamlarının önündə gedən əziz Prezident Heydər Əliyevə cansağlığı və uzun ömür arzulayıram.
Dünyanın ən böyük siyasət dahisi hörmətli Heydər Əliyevin məktəbinin yetirməsi olan zati-alinizin Baş nazir vəzifəsinə təyin edilməsi xəbərini böyük sevinclə qarşıladım. Bu vəzifəyə təyin olunmağınızı Azərbaycan dövləti və xalqı üçün bir fürsət hesab etdiyimizi, fəaliyyətiniz sayəsində sabitlik və inkişafın daha da artacağına inandığımızı, zati-alinizə lazımi dəstək verməyə davam edəcəyimizi bildirmək istəyirəm.
Baş nazir vəzifəsinə təyin olunmağınız münasibətilə Sizi, ailənizi və Azərbaycan xalqını təbrik edərək, bir daha cənab Prezidentə cansağlığı arzulayıram.
Müvəffəqiyyətləriniz daimi olsun.
Hörmətlə,
Doktor Həsən Moğol
İpək Yolu Vəqfi İdarə heyətinin sədri
Ankara, 27 avqust 2003-cü il.
Bölmənin digər xəbərləri
