AZƏRBAYCAN RESPUBLİKASININ NAZİRLƏR KABİNETİNDƏ
“Azərbaycan Respublikası vətəndaşlarının 2002-ci ilin iyul ayının 1-dən 20-dək həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” Azərbaycan Respublikası Prezidentinin 2002-ci il 13 iyun tarixli Fərmanının icrasını təmin etmək məqsədi ilə Nazirlər Kabineti qərara almışdır ki, 2002-ci il iyulun 1-dən 20-nə qədər həqiqi hərbi xidmətə çağırış vaxtı rayon (şəhər) çağırış komissiyalarına rəhbərlik və onların fəaliyyətinə nəzarət üzrə Respublika Çağırış Komissiyasının tərkibi təsdiq edilsin.
Naxçıvan Muxtar Respublikasının Nazirlər Kabineti Naxçıvan Muxtar Respublikasının çağırış komissiyasını, respublikanın şəhər və rayonlarının icra hakimiyyəti orqanları isə müvafiq şəhər və rayon çağırış komissiyalarını yaratmalıdır.
Azərbaycan Respublikası Çağırış Komissiyasının sədrinə tapşırılmışdır ki, 1984-cü ildə doğulmuş və çağırış gününədək 18 yaşı tamam olmuş, habelə 1967-1983-cü illərdə doğulmuş, yaşı 35-dək olan, həqiqi hərbi xidmətə çağırışdan möhlət hüququ olmayan Azərbaycan Respublikası vətəndaşlarının Respublikanın Silahlı Qüvvələrinə və qanunvericilikdə nəzərdə tutulmuş digər silahlı birləşmələrinə həqiqi hərbi xidmətə çağırışını “Azərbaycan Respublikasında hərbi xidmətə çağırışın əsasları haqqında” Azərbaycan Respublikası Qanununun tələblərinə uyğun olaraq təşkil etsin; ilk növbədə həqiqi hərbi xidmətə çağırışdan möhlət hüququnu itirəcək yuxarı yaşlı çağırışçıların, eləcə də çağırışdan yayınanların hərbi xidmətə çağırılması üçün müvafiq tədbirlər görsün; çağırışçıların hərbi komissarlıqlardan yola salınmasını yerli icra hakimiyyəti orqanlarını, Böyük Vətən Müharibəsi veteranlarını və Azərbaycan Respublikasının müharibə veteranlarını cəlb etməklə, təntənəli şəraitdə keçirilməsini təmin etsin; vətəndaşların qəbuluna, ərizə və şikayətlərinə baxılmasına həssaslıqla yanaşsın və başqa vəzifələri yerinə yetirsin.
Şəhər və rayon icra hakimiyyəti orqanları vətəndaşların həqiqi hərbi xidmətə çağırışının hazırlanması və keçirilməsi işinin təşkili ilə bağlı məsələlərdə hərbi komissarlıqlara hərtərəfli kömək göstərməlidir.
Azərbaycan Respublikasının Daxili İşlər Nazirliyinə, Səhiyyə Nazirliyinə, Rabitə Nazirliyinə, “Azərbaycan Hava Yolları” Dövlət Konserninə, Azərbaycan Dövlət Dəmir Yoluna, şəhər və rayon icra hakimiyyəti orqanlarına da konkret tapşırıqlar verilmişdir.
Mədəniyyət Nazirliyi çağırış dövründə respublika toplanış məntəqəsində, həmçinin rayon və şəhər hərbi komissarlıqlarının çağırış məntəqələrində mədəni hamilik işinin aparılmasını təşkil etməlidir.
Bu qərar imzalandığı gündən qüvvəyə minmişdir.
Bu qərar barədə AZƏRTAC-a Nazirlər Kabinetinin mətbuat mərkəzindən məlumat vermişlər.
Bölmənin digər xəbərləri
