AZƏRBAYCAN RESPUBLİKASININ PREZİDENTİ HEYDƏR ƏLİYEV AŞQABADA GƏLMİŞDİR
Azərbaycan Respublikasının Prezidenti Heydər Əliyev aprelin 23-də Türkmənistanın paytaxtı Aşqabada gəlmişdir.
Dövlətimizin başçısının şərəfinə “Türkmənbaşı” beynəlxalq hava limanında fəxri qarovul dəstəsi düzülmüşdü. Prezident Heydər Əliyevi Türkmənistanın mədəniyyət naziri Orazgəldi Aydoğdıyev səmimiyyətlə qarşıladı. Azərbaycan rəhbərinə duz-çörək, gül dəstəsi təqdim edildi.
Prezident Heydər Əliyev fəxri qarovul dəstəsinin qarşısından keçdi.
Dövlətimizin başçısı maşın karvanının müşayiəti ilə onun üçün ayrılmış “Nebitçi” iqamətgahına gəldi.
X x x
Elə həmin gün “Nebitçi” iqamətgahında Azərbaycan Prezidenti Heydər Əliyev ilə Qazaxıstan Prezidenti Nursultan Nazarbayev arasında təkbətək görüş oldu. Prezidentlər Xəzəryanı ölkələrin dövlət başçılarının zirvə görüşünü müsbət qiymətləndirərək, bunun qarşılıqlı surətdə faydalı əməkdaşlıq üçün əhəmiyyətli olacağını bildirdilər.
X x x
Daha sonra “Qrand Türkmən” mehmanxanasında Azərbaycan Prezidenti Heydər Əliyev ilə İran Prezidenti Seyid Məhəmməd Xatəminin təkbətək görüşü oldu. Dövlət başçıları hər iki tərəfi maraqlandıran məsələlər barədə fikir mübadiləsi apardılar.
ZİRVƏ GÖRÜŞÜ BAŞLANDI
Aprelin 23-də günortadan sonra Türkmənistan paytaxtının “Ruhiyyət” sarayında Xəzəryanı ölkələrin dövlət başçılarının ilk zirvə görüşü öz işinə başladı. Zirvə görüşünü Türkmənistan Prezidenti Saparmurad Niyazov açdı. Sonra Rusiya Federasiyasının Prerzidenti Vladimir Putin, Qazaxıstan Respublikasının Prezidenti Nursultan Nazarbayev, İran İslam Respublikasının Prezidenti Seyid Məhəmməd Xatəmi, Azərbaycan Respublikasının Prezidenti Heydər Əliyev çıxış etdilər. Prezidentlər Xəzərin hüquqi statusu ilə bağlı öz ölkələrinin mövqelərini açıqladılar.
Azərbaycan Prezidenti Heydər Əliyev zirvə görüşünün sahilyanı ölkələrin Xəzər dənizində daha sıx əməkdaşlığının başlanğıcı olacağını vurğulayaraq bildirdi ki, yeni şəraitdə Xəzərin hüquqi statusunu müəyyənləşdirmək zərurəti yaranmışdır. Hələ ötən əsrin 40-cı illərindən başlayaraq, Xəzər dənizində bütün neft və qaz yataqlarının kəşfiyyatı və istismarının Azərbaycan neftçiləri tərəfindən həyata keçirildiyini xatırladan Prezident Heydər Əliyev dedi ki, müstəqillik qazandıqdan sonra ölkəmiz dənizin Azərbaycan sektorunda mineral ehtiyatların işlənilməsi ilə fəal məşğul olur. Xəzər dənizinin hələ 1970-ci ildə SSRİ-nin sahilyanı respublikaları arasında orta xətt üzrə sektorlara bölünməsi beynəlxalq hüquqa uyğun gəlir.
Dövlətimizin başçısı xüsusi vurğuladı ki, hüquqi statusun olmaması sahilyanı dövlətlərin Xəzərdə öz suveren hüquqlarının həyata keçirilməsini davam etdirməsinə mane olmamalıdır və artıq təşəkkül tapmış müvafiq sektorlarda təbii ehtiyatlardan istifadə edilməsinə dair işlərin dayandırılması üçün əsas ola bilməz. Xəzərin hüquqi statusu məsələsi sahilyanı dövlətlərin suveren hüquqlarına hörmət edilməsi, qarşılıqlı surətdə faydalı tərəfdaşlıq ruhunda, dinc vasitələrlə, danışıqlar yolu ilə həll olunmalıdır.
Dövlət başçılarının çıxışlarından sonra zirvə görüşü öz işini qapalı davam etdirdi.
X X X
Həmin axşam Türkmənistan Prezidenti adından zirvə görüşündə iştirak edən dövlət başçılarının şərəfinə rəsmi qəbul təşkil olundu. Qəbulda Azərbaycan Prezidenti Heydər Əliyev də iştirak edirdi.
Aslan Aslanov
AZƏRTAC-ın xüsusi müxbiri
Aşqabad
Bölmənin digər xəbərləri
