AZƏRBAYCAN RESPUBLİKASININ PREZİDENTİ HEYDƏR ƏLİYEVİN TÜRKİYƏYƏ İŞGÜZAR SƏFƏRİ
Qara Dəniz İqtisadi Əməkdaşlıq Təşkilatının (QİƏT) üzvü olan ölkələrin dövlət və hökumət başçıları iyunun 24-də axşam gəmi ilə QİƏT-in Baş Katibliyinə gəldilər. Burada Baş katib səfir Valeri Çeçelaşvilinin adından rəsmi qəbul təşkil olundu. Azərbaycan Prezidenti Heydər Əliyev rəsmi qəbulda iştirak edirdi.
İyunun 25-də Azərbaycan Prezidenti Heydər Əliyev “Çırağan” hotelinin “Bal” salonuna gəldi. Dövlətimizin başçısını Türkiyə Prezidenti Əhməd Necdət Sezər mehribanlıqla qarşıladı. Həmin gün burada Qara Dəniz İqtisadi Əməkdaşlıq Təşkilatının üzvü olan ölkələrin dövlət və hökumət başçılarının zirvə görüşü öz işinə başladı.
Zirvə görüşünü Türkiyə Respublikasının Prezidenti Əhməd Necdət Sezər açdı. Albaniya Prezidenti Rəcab Meydani, Azərbaycan Prezidenti Heydər Əliyev, Bolqarıstan Prezidenti Georgi Pırvanov, Gürcüstan Prezidenti Eduard Şevardnadze, Moldova Prezidenti Vladimir Voronin, Rumıniya Prezidenti İon İliyesku, Ukrayna Prezidenti Leonid Kuçma, Rusiya Federasiyası hökuməti sədrinin müavini Valentina Matviyenko, Ermənistanın xarici işlər naziri Vartan Oskanyan, Yunanıstanın xarici işlər naziri Georgios Papandreu zirvə görüşündə nitq söylədilər.
(Azərbaycan Prezidentinin nitqi qəzetin birinci səhifəsində dərc olunur).
Sonra QİƏT-in Baş katibi Valeri Çeçelaşvilinin hesabatı dinlənildi. Zirvə görüşündə dövlət və hökumət başçıları “Əməkdaşlığın 10 ili və gələcəyə baxış” birgə bəyannaməsini imzaladılar.
Daha sonra prezidentlər və zirvə görüşünün iştirakçıları xatirə şəkli çəkdirdilər.
X X X
Elə həmin gün Türkiyə Prezidenti Əhməd Necdət Sezərin adından rəsmi qəbul təşkil olundu. Azərbaycan Prezidenti Heydər Əliyev qəbulda iştirak edirdi.
X X X
İyunun 25-də Azərbaycan Prezidenti Heydər Əliyev öz iqamətgahında Rumıniya Prezidenti İon İliyesku ilə görüşdü. Söhbət zamanı Rumıniya ilə Azərbaycan arasında siyasi, iqtisadi, humanitar sahələrdə əlaqələrin genişləndirilməsi, regionda vəziyyət, Ermənistan-Azərbaycan, Dağlıq Qarabağ münaqişəsinin sülh yolu ilə həlli, Rumıniya dövləti başçısının bu ilin oktyabrında Bakıya nəzərdə tutulan rəsmi səfəri, habelə hər iki ölkəni maraqlandıran bir sıra digər məsələlər haqqında fikir mübadiləsi aparıldı.
X X X
Prezident Heydər Əliyev görüşdən sonra səfərdə onu müşayiət edən Azərbaycan jurnalistləri ilə səmimi söhbət etdi, onları maraqlandıran suallara cavab verdi.
X X X
Həmin gün Azərbaycan Prezidenti Heydər Əliyev onun üçün ayrılmış iqamətgahda Ukrayna Prezidenti Leonid Kuçma ilə görüşdü. Dövlət başçıları ölkələrimiz arasında qarşılıqlı əlaqələrin perspektivləri, hər iki tərəfi maraqlandıran bir sıra məsələlər ətrafında müzakirələr apardılar.
X X X
Azərbaycan Prezidenti Heydər Əliyev iyunun 25-də günortadan sonra “Konrad” hotelinə gəldi. Burada rəmzi olaraq “Üç dənizin əfsanəsi” adlandırılan konfransın açılışı oldu. Konfransı giriş sözü ilə Türkiyənin “Teksen” şirkətinin prezidenti, konfransın həmsədri Nihad Göyyigit açdı, Teksen-Qara dəniz orkestrini iştirakçılara təqdim etdi. Orkestr ali qonaqlar və konfransın iştirakçıları qarşısında çıxış etdi. Orkestrin musiqiçiləri əsasən Mərkəzi Asiya, Qafqaz ölkələrini, Qara dəniz və Aralıq dənizi ölkələrini təmsil edən ifaçılardan ibarətdir.
Sonra konfransın digər həmsədri Cozef Stanislav çıxış etdi.
Daha sonra Türkiyə Prezidenti Əhməd Necdət Sezər, Ukrayna Prezidenti Leonid Kuçma, Rumıniya Prezidenti İon İliyesku, Gürcüstan Prezidenti Eduard Şevardnadze və Azərbaycan Prezidenti Heydər Əliyev konfransda çıxış etdilər. (Dövlətimizin başçısının çıxışı qəzetin növbəti nömrəsində dərc olunacaqdır).
X X X
Azərbaycan Prezidenti Heydər Əliyev konfransdan sonra Atatürk hava limanına gəldi. Burada Prezident Heydər Əliyev və Rumıniya Prezidenti İon İliyesku Azərbaycan dövlətinin başçısı haqqında çəkilmiş və Bakıdan yayımlanan “Bir həsədin tarixi” filminə baxdılar.
Daha sonra Prezident Heydər Əliyev və onu müşayiət edən şəxslər Ankaraya yola düşdülər.
Azərbaycan Prezidenti Heydər Əliyev həmin gün gecə Ankaraya gəldi. Dövlətimizin başçısını Esenboğa hava limanında Türkiyə hökumətinin yüksək vəzifəli şəxsləri, Ankara valisi Yəhya Gur, millət vəkilləri, dünya şöhrətli alim, Azərbaycan-Türkiyə Dostluq və Əməkdaşlıq Fondunun sədri professor İhsan Doğramacı qarşıladılar.
Aslan Aslanov
AZƏRTAC-ın xüsusi müxbiri
İstanbul-Ankara
Bölmənin digər xəbərləri
