RƏSMİ XRONİKA
AZƏRBAYCAN RESPUBLİKASININ PREZİDENTİ HEYDƏR ƏLİYEVİN TÜRKİYƏYƏ SƏFƏRİ
Heydər Əliyevin Türkiyə Milliyyətçi Çalışma Partiyasının rəhbəri Alparslan Türkeş ilə görüşündə ölkələrimiz arasında əlaqələrin inkişafından, dövlət müstəqilliyinin inkişafından, dövlət müstəqilliyinin, demokratiya və istiqlaliyyətin möhkəmləndirilməsi yolunda siyasi partiyaların fəaliyyətindən, demokratik seçki sistemindən və başqa məsələlərdən danışıldı.
Həmin gün axşam Türkiyə prezidenti Süleyman Dəmirəl Azərbaycan prezidenti Heydər Əliyevin iqamətgahına gəldi. İki ölkənin dövlət başçıları səmimi görüşdükdən sonra Məhəmməd Füzulinin yubiley tədbirlərinin təntənəli açılış mərasimində iştirak etmək üçün Bilkənd Universiteti şəhərciyinə getdilər.
Bilkəndin konsert salonunda yubiley şənliklərinin rəsmi açılış mərasimi oldu. Mərasimdə Heydər Əliyev, Süleyman Dəmirəl, Türkiyə Böyük Millət Məclisinin sədri Hüsaməddin Cindoruk, baş nazirin birinci müavini Murad Qarayalçın, xarici işlər naziri Mümtaz Soysal, dövlət nazirləri, mədəniyyət və incəsənət xadimləri iştirak edirdilər.
Türkiyədə Füzuli yubiley şənliklərinin təşkilatçısı, alim, milyonçu, Bilkənd Universitetinin və şəhərciyinin sahibi İhsan Doğramacı, hər iki ölkənin mədəniyyət nazirləri, incəsənət ustaları mərasimdə çıxış etdilər.
Heydər Əliyevin və Süleyman Dəmirəlin çıxışları qardaş xalqların mədəni sərvətlərinin ümumi və bölünməz olduğu fikrini bir daha təsdiqlədi. Azərbaycan prezidenti Heydər Əliyev bildirdi ki, Məhəmməd Füzulinin yaradılacaq xəzinəsi bütün türk xalqlarına aiddir, böyük Atatürkün yolu bütün türkdilli dövlətlərin yoludur. Respublikamızın dövlət başçısı dərin inam hissi ilə dedi ki, Azərbaycan öz müstəqilliyini bir daha əldən verməyəcək, Türkiyə ilə Azərbaycanı heç bir qüvvə bir-birindən ayıra bilməyəcəkdir. Bu sözlər böyük salonda sürəkli alqışlarla qarşılandı. Azərbaycan rəhbərinin çıxışı dəfələrlə alqışlara səbəb oldu və Süleyman Dəmirəl “Eşq olsun, Heydər Əliyev! Eşq olsun, Heydər Əliyev! Eşq olsun, Heydər Əliyev! deyərək onu qucaqladı.
Təntənəli mərasimdə Füzuli əsərlərindən parçalar söyləndi. Mərasim iştirakçıları Füzulinin yubiley şənliklərinin təşkilatçısına “sağ ol, xocamız İhsan Doğramacı” sözləri ilə minnətdarlıq etdilər.
Türkiyədə Füzulinin yubileyi şərəfinə şənliklər davam edir.
Noyabrın 2-də Azərbaycan Respublikasının prezidenti Heydər Əliyev Ankarada Türkiyə Respublikasının prezidenti Süleyman Dəmirəl və ölkənin digər rəhbər xadimləri ilə görüşmüşdür.
Heydər Əliyevin Türkiyəyə səfəri davam edir.